ជាតិ
រថយន្ត
លោក សុភាស់ បានចំណាយជាង៥ពាន់ដុល្លារ ទិញនិងជួសជុលឡានបុរាណដែលខ្លួនស្រឡាញ់ 19, Sep 2022 , 8:19 pm
× ភ្នំពេញ៖ លោក យាន សុភាស់ ផ្តល់តម្លៃទៅលើរថយន្ដ ដែលមនុស្សម្នាចាត់ទុកជាវត្ថុអត់ប្រយោជន៍ ។ លើសពីការអភិរក្ស អ្វីដែលគាត់ចូលចិត្តបំផុតគឺស្វែងរកយានយន្ដបុរាណ ជាពិសេសឡានបុរាណ ពីទសវត្សរ៍១៩៨០។ គាត់ស្នាក់នៅរាជធានីភ្នំពេញ ក៏ប៉ុន្តែគាត់មានឱកាសទៅតាមខេត្តញឹកញាប់។ គាត់មើលជុំវិញដងផ្លូវ នៅគ្រប់កន្លែង។ លោក សុភាស់ ឧស្សាហ៍សួរអ្នកស្រុក ហើយយូរៗម្ដងគាត់ឮនិយាយ ឬឃើញយានកញ្ចាស់ណាមួយ។ គាត់ក៏មានបណ្ដាញអ្នកស្នេហាយានយន្ដបុរាណ ដែលធ្លាប់ប្រាប់គាត់អំពីកន្លែង ដែលមានឡានចាស់ៗទុកចោល។ គាត់កត់ទុកព័ត៌មានទាំងអស់នោះ រហូតដល់អាចទាក់ទងម្ចាស់យានយន្ដបុរាណនោះ និងសុំទិញ។ ទិញហើយ គាត់ធ្វើទំនើបកម្ម និងប្រើយានយន្ដបុរាណនោះ រហូតដល់មានឱកាសលក់ឱ្យគេវិញ ដោយចំណេញខ្លះ។
សូមអញ្ជើញទស្សនាវីដេអូខាងក្រោមនេះ៖
ឧទាហរណ៍រថយន្ដម៉ាក MAZDA ប្រភេទ B ម៉ូឌែល 2000 ពណ៌ខ្មៅ ផលិតឆ្នាំ១៩៨៣ ដែលលោក សុភាស់ បានប្រទះឃើញខែមុន។ វាខូចច្រើន ដែលធ្វើឱ្យគាត់ទិញវាតម្លៃប្រមាណ ១០លានរៀលប៉ុណ្ណោះ។ ក៏ប៉ុន្តែគាត់ឱ្យយានដ្ឋានមួយកន្លែង នៅខណ្ឌដង្កោ ជួសជុល ដោយបានដូរកង់ទាំង៤ ដូរស៊ីញ៉ូខាងមុខសងខាង ដូរកញ្ចក់ឆ្លុះសងខាង ធ្វើបែនឡើងវិញ និងបាញ់ថ្នាំពណ៌ខ្មៅដដែលឡើងវិញ។ តម្លៃជួសជុលសរុបលើសពី ១២លានរៀល ! តម្លៃនេះថ្លៃជាងតម្លៃទិញឡានតែម្ដង។ យ៉ាងណាក្ដី វាក៏មានប្រយោជន៍ដែរ ពីព្រោះគឺជារថយន្ដមួយ ដែលមានអាយុកាលជិត៤០ឆ្នាំ និងដែលកម្រមែនទែន ក្នុងប្រទេស។ នេះជាមូលហេតុដែលធ្វើឱ្យធ្វើទំនើបកម្ម ហើយ ឡាន MAZDA B2000 នេះ មានតម្លៃថ្លៃជាងថវិកាទាំងអស់ ដែលលោក សុភាស់ បានចំណាយលើវា។
រថយន្ដ MAZDA ប្រភេទ B គឺជាឡានបែបទ្រង់ទ្រាយមានបែន នៅខាងក្រោយ ដែលត្រូវបាន៥ជំនាន់ គឺពីឆ្នាំ១៩៦១ រហូតដល់ឆ្នាំ២០០៦។ ជំនាន់ទី៣ ត្រូវបានផលិតពីឆ្នាំ១៩៧៧ ដល់ឆ្នាំ១៩៨៥ ក្នុងរោងចក្រ៣គឺនៅប្រទេសជប៉ុន អ៊ីរ៉ង់ និងនៅប្រទេសកូឡុំប៊ី។ MAZDA B2000 ត្រូវបានផលិតពី ឆ្នាំ១៩៨០ ដល់ឆ្នាំ១៩៨៧។
ក្រុមហ៊ុន MAZDA ត្រូវបានបង្កើតឡើង ឆ្នាំ១៩២០ នៅប្រទេសជប៉ុន ក៏ប៉ុន្តែវាបានយកឈ្មោះថា MAZDA ឆ្នាំ១៩៣៤។ រហូតដល់សព្វថ្ងៃនេះ គឺជាក្រុមហ៊ុនឯករាជ្យ៕
Tag:
យានយន្ត
រថយន្ត
ឡានបុរាណ
© រក្សាសិទ្ធិដោយ thmeythmey.com