រថយន្ត
អន្តរជាតិ
Mitsubishi អះអាងថា មិនបានបញ្ជូនរថយន្ត Pajeros ទៅកូរ៉េខាងជើងឡើយ 19, Sep 2022 , 8:39 pm
× ក្រុមហ៊ុនជប៉ុន Mitsubishi Motors បានថ្លែងប្រាប់ភ្នាក់ងារស៊ើបអង្កេតលើការដាក់ទណ្ឌកម្មថា ខ្លួនគ្មានតួនាទីអ្វីក្នុងផ្តល់រថយន្ត SUVs ដល់កូរ៉េខាងជើងនោះឡើយ។ នេះបើតាមការផ្សាយរបស់ NK News ដោយផ្អែកលើរបាយការណ៍របស់ក្រុមការងារអង្គការសហប្រជាជាតិ (U.N.)។
ក្រុមអ្នកវិភាគ បានពិនិត្យឃើញថា រថយន្ត Mitsubishi Pajeros ត្រូវបានប្រើប្រាស់ក្នុងព្យុហយាត្រាយោធាកូរ៉េខាងជើងចន្លោះពីខែតុលា ឆ្នាំ២០២០ ដល់ខែមករា ឆ្នាំ២០២១។ ករណីនេះ បានបង្កើតចេញជាការចោទសួរទាក់ទងនឹងប្រភព និងស្ថាប័នដែលផ្តល់រថយន្តទៅកាន់ប្រទេសឯកោមួយនេះ។
«គោលនយោបាយរបស់យើង គឺមិនដំឡើងរថយន្តសម្រាប់តម្រូវការយោធា ហើយក៏មិនដែលមានរថយន្តណាមួយធ្លាប់ត្រូវបានកែច្នៃសម្រាប់តម្រូវការយោធានោះដែរ»។ នេះជាការអះអាងរបស់ក្រុមហ៊ុន Mitsubishi។
ក្រុមហ៊ុនបានសង្កត់ធ្ងន់ថា ភ្នាក់ងារចែកចាយក៏សុទ្ធតែមានកិច្ចព្រមព្រៀងផងដែរ ក្នុងការហាមឃាត់ការលក់ ការកែច្នៃ ឬប្រើប្រាស់សម្រាប់តម្រូវការយោធា ឬដើម្បីរំខានដល់សណ្តាប់ធ្នាប់អន្តរជាតិ។
យោងតាម NK News រថយន្តដែលស្ថិតក្នុងព្យុហយាត្រាកូរ៉េខាងជើង កាលពីខែមករា ឆ្នាំ២០២១ គឺជាប្រភេទរថយន្ត Mitsubishi Pajero SUV ផលិតតាំងពីឆ្នាំ២០១៥។ ជាមួយគ្នានេះ គេក៏សង្កេតឃើញលោក Jo Yong Won មន្ត្រីកំពូលម្នាក់របស់កូរ៉េខាងជើង ប្រើប្រាស់រថយន្ត Pajero ផងដែរ នាអំឡុងខែមិនា និងខែមេសា ឆ្នាំ២០២២ កន្លងមក។
លោក គីម ជុងអ៊ុន និងមន្ត្រីដឹកនាំកំពូលកូរ៉េខាងជើងរបស់ខ្លួន ធ្លាប់ត្រូវបានឃើញប្រើប្រាស់រថយន្តទំនើបនៃក្រុមហ៊ុន Mercedes, Toyota-Lexus និង Rolls Royce ជាដើម។ សម្រាប់ម៉ូដែល Pajero ដែលលោក Jo ប្រើប្រាស់ អាចមានតម្លៃប្រមណា ៦១០០០ដុល្លារអាម៉េរិក។
ក្រុមជំនាញការ U.N. ធ្លាប់បានរាយការណ៍កន្លងមកថា បើទោះបីជាមានការបិទព្រំដែននាអំឡុងនៃការរាលដាលកូវីដ-១៩ ក៏ដោយ ក៏កូរ៉េខាងជើង នៅតែព្យាយាមនាំចូលរថយន្តទំនើបៗពីបរទេស នាដើមឆ្នាំ២០២១ ៕
© រក្សាសិទ្ធិដោយ thmeythmey.com