ស្ថានភាពជំនន់ទឹកភ្លៀង នៅក្នុងភូមិសាស្រ្តស្រុកក្រឡាញ់ នៃខេត្តសៀមរាប មិនទាន់ធ្ងន់ធ្ងរនៅឡើយទេ។ លោក សុខ ណារ៉េត អភិបាលស្រុកក្រឡាញ់ស្ដីទី អះអាងថា អាជ្ញាធរបានត្រៀមទីទួលសុវត្ថិភាព និងទូកកាណូតសម្រាប់ជម្លៀសពលរដ្ឋ ក្នុងករណីជន់លិចខ្លាំង។ 
 

«ទឹកផ្នែកខាងលើទំនប់ស្ទឹងស្រែង នៅនឹងកម្ពស់ ១៤ម៉ែត្រ។ រហូតមកដល់ពេលរសៀលនេះ ទឹកមិនទាន់ហក់ឡើងទៀតទេ។ សម្រាប់ទឹកនៅស្ទឹងក្រឡាញ់វិញ មានកម្ពស់៨,៩៧ម៉ែត្រ លើសកម្រិតប្រុងប្រយ័ត្ន។ ប៉ុន្តែមិនទាន់ធ្ងន់ធ្ងរនោះទេ»។ នេះជាការលើកឡើងរបស់លោក សុខ ណារ៉េត ដោយបន្តថា អាជ្ញាធរបានបិទចរាចរណ៍សម្រាប់រថយន្តធុនធ្ងន់លើកំណាត់ផ្លូវលេខ៦៨។

បើតាមអភិបាលស្រុកស្ដីទីរូបនេះ ជំនន់ទឹកភ្លៀង បានប៉ះពាល់ដល់ឃុំចំនួន ១០ ខណៈឃុំតាអោន ចាប់ផ្ដើមលិចមុនគេ និងលិចច្រើនជាងគេ។ ជាមួយគ្នានេះ ជំនន់ទឹកភ្លៀងក៏ធ្វើឱ្យប្រជាពលរដ្ឋរងគ្រោះចំនួន ១៧៣៩គ្រួសារ ដោយលិចផ្ទះកម្រិតស្រាលចំនួន ១៦៧៩ខ្នង, លិចទីធ្លាសាលារៀនចំនួន ១៧, លិចបរិវេណវត្តចំនួន ៤ និងលិចមន្ទីរពេទ្យបង្អែកស្រុកក្រឡាញ់ផងដែរ។ លើសពីនេះ ក៏ប៉ះពាល់ស្រូវចំនួន ៦៥៥៥ហិកតា និងផ្លូវលំក្នុងភូមិ ប្រវែង  ១៦០៨៨ម៉ែត្រ។

 

លោក សុខ ណារ៉េត បញ្ជាក់បន្ថែមបែបនេះ៖«ក្នុងនាមអាជ្ញាធរយើងបានជូនដំណឹង និងត្រៀមទីទួលសុវត្ថិភាព ដោយអាជ្ញាធរភូមិ-ឃុំ បានផ្សព្វផ្សាយជូនពលរដ្ឋឱ្យត្រៀមលក្ខណៈ ជាពិសេសយកចិត្តទុកដាក់ចំពោះអាយុជីវិតមនុស្ស និងសត្វ។ បច្ចុប្បន្ននេះ មិនទាន់មានគ្រួសារណាមួយត្រូវបានជម្លៀសនោះទេ។ ខ្ញុំសង្ឃឹមថាទឹកនឹងស្រក បើសិនមិនមានភ្លៀងធ្លាក់»។ 

 លោក សុខ ណារ៉េត ក៏បានអំពាវនាវដល់ពលរដ្ឋទាំងអស់ បង្កើនការប្រុងប្រយ័ត្ន ទាំងសុវត្ថិភាពផ្ទាល់ខ្លួន ក្រុមគ្រួសារ សត្វពាហនៈ និងទ្រព្យសម្បត្តិ ជាពិសេសទំនាក់ទំនងទៅអាជ្ញាធរក្នុងករណីបន្ទាន់ណាមួយ៕