រថយន្ត
អន្តរជាតិ
ឥណ្ឌាជាទីតាំងដំបូងសម្រាប់ Mercedes Benz ក្នុងការដំឡើងរថយន្តអគ្គិសនីនៅក្រៅអាល្លឺម៉ង់ 03, Oct 2022 , 8:29 am
× ក្រុមហ៊ុនយានយន្តអាល្លឺម៉ង់ Mercedes Benz កាលពីពេលថ្មីៗកន្លងមកនេះ បានសម្ពោធទីតាំងដំឡើងរថយន្តអគ្គិសនី EQS 580 ប្រភេទ Sedan នៅក្នុងប្រទេសឥណ្ឌា។ បើតាមការផ្សាយរបស់ ETAuto អាល្លឺម៉ង់នៅតែជាទីតាំងចម្បងនៃរោងចក្ររថយន្តអគ្គិសនីរបស់ Mercedes Benz ប៉ុន្តែឥណ្ឌាត្រូវចាត់ទុកទីតាំងខាងក្រៅដំបូងបំផុតផងដែរក្នុងការដំឡើងរថយន្ត EV នៅឥណ្ឌា ក្នុងចំណោមក្រុមហ៊ុនយានយន្តកំពូលៗលើពិភពលោក។
«ជាសាកល រថយន្ត EQS ផលិតនៅរោងចក្រមេក្នុងក្រុង Sindelfingen ប្រទេសអាល្លឺម៉ង់ ហើយឥណ្ឌាជាមូលដ្ឋាននៃរោងចក្រដំឡើងរថយន្ត EVs ដំបូងបំផុតដែលនៅក្រៅប្រទេសអាល្លឺម៉ង់»។ នេះជាការគូសបញ្ជាក់របស់លោក Venkatesh Kulkarni នាយកផ្នែកប្រតិបត្តិការនៃ Mercedes-Benz India។
មានមូលដ្ឋាននៅក្រុង Chakan នៃស្រុក Pune រដ្ឋ Maharashtra រោងចក្រនេះ កន្លងមក បានផលិតរថយន្ត១៤ម៉ូដែល ដោយមានបុគ្គលិក១៤០នាក់ និងជំនាញការផ្នែករថយន្តអគ្គិសនីប្រមាណ៣០នាក់។ រថយន្ត Mercedes-Benz EQS 580 ជាម៉ូដែលអគ្គិសនីទីពីររបស់ក្រុមហ៊ុន ហើយក៏ជាម៉ូដែលដំបូងបំផុតដែលដំឡើងនៅឥណ្ឌា។
ETAuto បានលើកឡើងថា ការនាំចូលរថយន្តទាំងមូល CBU (Completely Built Unit) ត្រូវចំណាយលើពន្ធខ្ពស់នៅឥណ្ឌា ខណៈរថយន្តដែលដំឡើង CKD (Completely Knocked Down) មានតម្លៃនាំចូលទាបជាង៕
© រក្សាសិទ្ធិដោយ thmeythmey.com