បើតាមប្រព័ន្ធផ្សព្វផ្សាយក្នុងស្រុកមីយ៉ាន់ម៉ា ករណីវាយប្រហារដោយយន្តហោះចំនួន៣​នៅល្ងាច​ថ្ងៃទី​២៣ ខែតុលានៅរដ្ឋមីយ៉ាន់ម៉ាភាគខាងជើងរដ្ឋ Kachin បានសម្លាប់ប្រជាជន តារាចម្រៀង​ល្បី​ៗ​ក្នុង​តំបន់ និងព្រមទាំងមន្ត្រីមួយចំនួនរបស់កងទ័ពឯករាជ្យ Kachin (KIA) ផងដែរ។​ អ្នកនាំពាក្យរបស់ KIA លោក Naw Bu និយាយថា ការវាយប្រហារបានផ្តោតលើការប្រារព្ធខួបលើកទី៦២នៃការបង្កើតអង្គការឯករាជ្យ Kachin ដែលជាបក្សនយោបាយរបស់កងទ័ពKachin ។

 

«ការវាយឆ្មក់តាមអាកាសគឺដោយចេតនា។ KIA/KIO ថ្កោលទោសយ៉ាងខ្លាំងចំពោះរឿងនេះ។ នេះ​ជា​ទង្វើ​ដ៏​អាក្រក់​មួយ​ដែល​អាច​ចាត់​ទុក​ជា​ឧក្រិដ្ឋកម្ម​សង្គ្រាម​ផង​ដែរ»។ លោក Naw បាន សង្កត់ធ្ងន់បែបនេះ។

រដ្ឋាភិបាលរួបរួមជាតិ (NUG) ដែលប្រឆាំងនឹងរបបយោធាបានសម្ដែងការសោកស្ដាយ​យ៉ាង​ខ្លាំង​ចំពោះការបាត់បង់អាយុជីវិតជនស៊ីវិល និងបានជំរុញឱ្យអង្គការសហប្រជាជាតិ (UN) និង​សហគមន៍​អន្តរជាតិជួយអន្តរាគមន៍ក្នុងការបញ្ឈប់អំពើឃោរឃៅនេះជាបន្ទាន់។

 

ចាប់តាំងពីរដ្ឋប្រហារមក ការវាយប្រយុទ្ធនៅតែបន្តរវាងកងទ័ពមីយ៉ាន់ម៉ា និងក្រុមជនជាតិភាគតិចប្រដាប់អាវុធនានា ពិសេសក្រុមជនជាតិភាគតិច KIA ដែលកំពុងប្រយុទ្ធដើម្បីស្វ័យភាព​សម្រាប់​ប្រជាជន Kachin និងបានសម្តែងការគាំទ្រចំពោះការតស៊ូប្រឆាំងរបបយោធា៕