ថ្ងៃទី២៤ ខែតុលា ជាខួបនៃការបង្កើតអង្គការសហប្រជាជាតិរយៈពេល ៧៧ឆ្នាំ ក្រោយសង្រ្គាមលោកលើកទីពីរត្រូវបានបញ្ចប់។ ស្របពេលនេះ អ្នកនាំពាក្យក្រសួងការបរទេសចិន លោក Wang Wenbin បានលើកឡើងថា ចិនមានឆន្ទៈ ក្នុងការបំពេញតួនាទីប្រកបដោយភាពវិជ្ជមានក្នុងការលើកតម្កើងតួនាទីរបស់អង្គការសហប្រជាជាតិ ដើម្បីពង្រឹងសន្តិភាព និងការអភិវឌ្ឍរបស់មនុស្សជាតិ។ 

 

មិនតែប៉ុណ្ណោះ មន្រ្តីក្រសួងការបរទេសចិនរូបនេះ បានអំពាវនាវប្រទេសទាំងអស់ឱ្យអនុវត្តប្រព័ន្ធពហុប៉ូល និងការពារប្រព័ន្ធអន្តរជាតិ។ នេះមិនមែនជាលើកទីមួយឡើយសម្រាប់ចិន ដែលជំរុញឱ្យមានការអនុវត្តបែបនេះ ដោយសារចិន តែងមានភាពតានតឹងជាមួយអាម៉េរិក និងប្រទេសសម្ព័ន្ធមិត្ត។ 

 

«យើងបានត្រៀមខ្លួនជាស្រេចក្នុងការពារសន្តិភាព រួមចំណែកការអភិវឌ្ឍសកល និងកសាងសហគមន៍ជាមួយអនាគតរួមគ្នាសម្រាប់មនុស្សជាតិ»។ លោក Wang បានបន្ថែមបែបនេះ ដោយបន្តថា ចិនតែងការពារគោលបំណង និងគោលការណ៍របស់ធម្មនុញ្ញអង្គការសហប្រជាជាតិ រួមទាំងតួនាទីស្នូលរបស់អង្គការសហប្រជាជាតិក្នុងកិច្ចការអន្តរជាតិ។ នេះបើតាមការចុះផ្សាយរបស់សារព័ត៌មាន CGTN។ 

 

បន្ថែមពីនេះ អ្នកនាំពាក្យក្រសួងការបរទេសចិន ក៏បានរំឭកពីតួនាទីចិន ក្នុងការស្នើឱ្យមានគំនិតផ្តួចផ្តើមសន្តិសុខសកល, ការបញ្ជូនទាហានចំនួន ៥ម៉ឺននាក់ទៅចូលរួមក្នុងប្រតិបត្តិការថែរក្សាសន្តិភាព, ចូលរួមក្នុងកិច្ចការគ្រប់គ្រងអាវុធអន្តរជាតិ រួមទាំងដំណើរការមិនរីកសាយ និងការកាត់បន្ថយអាវុធ៕