លោក Rishi Sunak ត្រូវបានមហាក្សត្រឆាលស៍ទី៣ តែងតាំងជានាយករដ្ឋមន្ត្រីអង់គ្លេសថ្មីនៅថ្ងៃទី២៥ ខែតុលា។ 

 

ជុំវិញការឡើងតំណែងរបស់នាយករដ្ឋមន្រ្តីអង់គ្លេសថ្មី អ្នកនាំពាក្យវិមានក្រេមឡាំងលោក Dmitry Peskov បញ្ជាក់ថា មិនថាអ្នកណាធ្វើជានាយករដ្ឋមន្ត្រីអង់គ្លេសថ្មីនោះទេ ក៏រុស្សីមិនឃើញមានឱកាសណាមួយ ដែលអាចធ្វើឱ្យទំនាក់ទំនងប្រទេសទាំងពីរប្រសើរឡើងនោះឡើយ។ នេះបើតាមទីភ្នាក់ងារពត៌មាន ​Reuters។

 

«នៅពេលនេះ យើងមើលមិនឃើញមានហេតុផលណាមួយសម្រាប់ជាក្តីសង្ឃឹមថា នឹងមានការផ្លាស់ប្តូរវិជ្ជមានជាមួយអង់គ្លេសនាពេលអនាគតដ៏ខ្លីខាងមុខនោះទេ។ រុស្ស៊ី​នៅ​តែ​បើក​ចំហ និង​ត្រៀម​ខ្លួន​ជា​ស្រេច​ដើម្បី​ពិភាក្សា​បញ្ហានានា ដែល​លំបាក​បំផុត​នៅ​តុ​ចរចា។ ប៉ុន្តែ​ យើងមិនពិភាក្សាលើរឿង ដែល​ធ្វើ​ឲ្យ​ខូច​ប្រយោជន៍​ជាតិយើង​ទេ។» លោក Dmitry Peskov និយាយបែបនេះ។ 

 

ចាប់តាំងពីសង្គ្រាមរុស្សីអ៊ុយក្រែនផ្ទុះឡើង ទំនាក់ទំនងរវាងរុស្សី និងអង់គ្លេសមានភាពល្អក់កករ ដោយសារតែអង់គ្លេសបានបង្ហាញជំហរគាំទ្រអ៊ុយក្រែន និងសម្តែងការមិនពេញចិត្តយ៉ាងខ្លាំងលើភាគីរុស្សី ដែលជាអ្នកចាប់ផ្តើមសង្គ្រាមមួយនេះ៕