ប៉ុន្មានម៉ោងក្រោយលោក Rishi Sunak ត្រូវបានតែងតាំងជានាយករដ្ឋមន្រ្តីអង់គ្លេសនៅថ្ងៃទី២៥ ខែតុលា ប្រធានាធិបតីអាម៉េរិក ចូ បៃដិន បានជជែកជាមួយនាយករដ្ឋមន្រ្តីអង់គ្លេសថ្មីរូបនេះជាលើកដំបូងតាមទូរស័ព្ទ។ ទន្ទឹមនឹងអបអរសាទរលោក Sunak ប្រធានាធិបតី លោក បៃដិន លើកឡើងថា អង់គ្លេសនៅតែជាសម្ព័ន្ធមិត្តដ៏ជិតស្និទ្ធបំផុតរបស់អាម៉េរិក។ 

 

បន្ថែមពីលើនេះ មេដឹកនាំទាំងពីរបានបញ្ជាក់ជាថ្មីពីទំនាក់ទំនងដ៏ពិសេសរវាងអង់គ្លេស និងអាម៉េរិក ព្រមទាំងអះអាងថា នឹងធ្វើការជាមួយគ្នាដើម្បីលើកស្ទួយសន្តិសុខ និងវិបុលភាពពិភពលោក។ 

 

«មេដឹកនាំព្រមព្រៀងគ្នាលើសារសំខាន់នៃការធ្វើការជាមួយគ្នាគាំទ្រអ៊ុយក្រែន និងនាំឱ្យរុស្ស៊ីទទួលខុសត្រូវលើការឈ្លានពានរបស់ខ្លួន»។ សេចក្តីប្រកាសព័ត៌មានរបស់សេតវិមានចេញផ្សាយបែបនេះដោយបញ្ជាក់ថា លោក បៃដិន និងលោក Sunak ក៏បានព្រមព្រៀងដោះស្រាយបញ្ហាប្រឈមដែលបង្កដោយភាគីចិនផងដែរ។ 

 

បើតាមសេចក្តីប្រកាសព័ត៌មានរបស់ការិយាល័យនាយករដ្ឋមន្រ្តីអង់គ្លេស Downing Street វិញ មេដឹកនាំទាំងពីរពិភាក្សាពីការពង្រីកកិច្ចសហប្រតិបត្តិការអង់គ្លេស-អាម៉េរិកទាំងទ្វេភាគី​ និងក្នុងតំបន់ដូចជាតំបន់ឥណ្ឌូប៉ាស៊ីហ្វិក ព្រមទាំងបញ្ហានៅអៀរឡង់ខាងជើងផងដែរ។

 

មេដឹកនាំទាំងពីររំពឹងថានឹងជួបគ្នាដោយផ្ទាល់នៅពាក់កណ្តាលខែវិច្ឆិកានាកិច្ចប្រជុំកំពូលក្រុមប្រទេសមានសេដ្ឋកិច្ចជឿនលឿនទាំង២០ (G20)នៅឥណ្ឌូណេស៊ី៕