មានវ័យ២២ឆ្នាំ កញ្ញា សៀក សិរីវឌ្ឍនា ជានិស្សិតខ្មែរមួយរូប ដែលងកំពុងសិក្សាជំនាញផ្នែកវេជ្ជសាស្ត្រ នៅសកលវិទ្យាល័យ មួយកន្លែងនៅរាជធានីភ្នំពេញ។ មមាញឹកនឹងការងាររៀនសូត្រនៅសកលវិទ្យាល័យហើយ ប៉ុន្តែយុវតីរូបនេះ ឆ្លៀតពេលវេលាផ្ទាល់ខ្លួន រៀងរាល់ថ្ងៃសៅរ៍ និងអាទិត្យ ចូលរួមចំណែក ជាមួយរដ្ឋាភិបាលកម្ពុជា ក្នុងដំណើរការកិច្ចប្រជុំអាស៊ាន ដែលកម្ពុជា ក្លាយជាម្ចាស់ផ្ទះ នាថ្ងៃទី១០ ដល់១៣ វិច្ឆិកា ។ ការចូលរួមចំណែកនេះ តាមរយៈការងារជា អ្នកសម្របសម្រួលគណៈប្រតិភូ ក្នុងកិច្ចប្រជុំអាស៊ាន ឬត្រូវបានគេហៅថា Liaison Officer។
  

 

ការពិតទៅការងារជាអ្នកសម្របសម្រួលគណៈប្រតិភូ ក្នុងកិច្ចប្រជុំអាស៊ាន​​​ ជាក្ដីសុបិន្តមួយរបស់កញ្ញា សិរីវឌ្ឍនា តាំងពីនាងនៅជាសិស្សវិទ្យាល័យមកម្លេះ បន្ទាប់ពីនាង បានរៀនមេរៀនមួយ ស្ដីពី អាស៊ាន ។ កញ្ញា​រំឭកពីអតីតកាល កាលនៅជាសិស្សវិទ្យាល័យរបស់ខ្លួនដូច្នេះ៖ «អ្នកសម្របសម្រួលគណៈប្រតិភូ​ វាជាក្ដីស្រមៃរបស់ខ្ញុំ! យើងទាំងអស់បានសិក្សាពីសមាគមប្រជាជាតិអាស៊ានតាំងពីវិទ្យាល័យមកម្លេះ ហើយចំពោះខ្ញុំផ្ទាល់ខ្ញុំតែងស្រមៃថា ថ្ងៃណាមួយខ្ញុំនឹងមានឱកាសចូលរួមចំណែកការងារ ក្នុងកិច្ចប្រជុំដ៏ធំមួយនេះ នៅពេលកម្ពុជាមានឱកាសក្លាយជាប្រធានអាស៊ាន»។
 

បានទទួលឱកាសដូចការរំពឹងទុក និងដូចនឹងក្ដីស្រមៃរបស់ខ្លួន បច្ចុប្បន្ន វឌ្ឍនា បានខិតខំប្រឹងប្រែង ដុសខាត់សមត្ថភាព ជាមួយនឹងគោលដៅច្បាស់លាស់ ស្របតាមឆន្ទៈ ប្រកបដោយភាពក្លាហានរបស់ខ្លួន។ 
  

 

ក្រៅពីសុបិន្ត ក្លាយជាការពិតហើយនោះ យុវតីរូបនេះ ក៏បានដាក់គោលដៅមួយទៀត ក្នុងការប្រើសមត្ថភាពខ្លួន លើកកម្ពស់មុខមាត់ប្រទេសកម្ពុជា តាមរយៈការបង្ហាញចំណេះដឹង ទៅកាន់គណៈប្រតិភូអាស៊ាន ក៏ដូចជាពិភពលោកផងដែរ។ យុវតីសម្ដីម៉ាត់ៗរូបនេះ និយាយដូច្នេះ៖ «គោលបំណងទី១ របស់ខ្ញុំ ក្នុងនាមខ្ញុំជាយុវជនជាសសរទ្រូងប្រទេសជាតិ គួរគប្បីចូលរួមការងារសង្គមដើម្បីជាប្រយោជន៍ដល់ប្រទេស​ជាតិយើង។ ជាក់ស្ដែងកន្លងមកនេះ យើងបានសម្របសម្រួលគណៈប្រតិភូបានយ៉ាងខ្ជាប់ខ្ជួន ហើយ(បាន)បង្ហាញពីសមត្ថភាព ដល់បណ្ដាប្រទេសអន្តរជាតិ និង ឆាកអន្តរជាតិ ដើម្បីបង្ហាញថាយុវជនខ្មែរយើងពិតជាមានសមត្ថភាព សម្របសម្រួលក្នុងកិច្ចការផ្សេងៗ របស់គណៈប្រតិភូ បានយ៉ាងរលូន»។ 
 

ដោយសារចង់បានចំណេះដឹងថ្មី បទពិសោធន៍ថ្មី ទំនាក់ទំនងជាមួយមនុស្សថ្មីៗ ដើម្បីវាស់ស្ទង់សមត្ថភាពខ្លួនឯងនោះ និស្សិតពេទ្យរូបនេះ បានចិញ្ចឹមចិត្ត សន្សំចំណេះវិជ្ជា តាំងពីនៅជាសិស្សវិទ្យាល័យ។ ជាពិសេស​ការសិក្សាភាសាបរទេសឱ្យបានស្ទាត់ជំនាញ។ 
 

« អ្វីដែលចំបាច់ហើយសំខាន់ គឺការពង្រឹងសមត្ថភាពភាសាបរទេស ព្រោះភាសាបរទេសនេះហើយដែល សម្រាប់ធ្វើការប្រាស្រ័យទាក់ទង។ ហើយវាពិតជាសំខាន់ណាស់ដែលបុគ្គលម្នាក់ៗ ត្រូវមានលក្ខណៈសម្បត្តិផ្ទាល់ខ្លួន ដូចជាភាពជាអ្នកដឹកនាំ ភាពអំណត់ ភាពវៃឆ្លាត និង ភាពបន់បែន ហើយមួយទៀតនោះ គឺជំនាញក្នុងការទំនាក់ទំនង»។ នេះជាការលើកឡើងរបស់យុវតីវ័យ២២ឆ្នាំ ដែលបានបន្ថែមថា ការងារជាមន្ត្រីទំនាក់ទំនងនេះ មិនមែនទាល់តែជាយុវជន ឬនិស្សិត ដែលរៀនផ្នែកទំនាក់ទំនងនោះទេ ពោលគឺយុវជនគ្រប់រូប សុទ្ធតែអាចធ្វើវាបាន ប៉ុន្តែត្រូវមានទំនួលខុសត្រូវលើការងារខ្ពស់។ 
  

 

កិច្ចប្រជុំអាស៊ានថ្នាក់ដឹកនាំកំពូល នឹងឈានចូលមកដល់ ដល់ថ្ងៃទី១០ ខែវិច្ឆិកា ។ ប៉ុន្តែគេក៏ឃើញមានកិច្ចប្រជុំពាក់ព័ន្ធផ្សេងៗបណ្ដើរៗផងដែរ។ កិច្ចប្រជុំពាក់ព័ន្ធនេះទៀតសោត ក៏ជាពេលដែល យុវតី សិរីវឌ្ឍនា បានបញ្ចេញសមត្ថភាព និងទំនួលខុសត្រូវ ក្រោមតួនាទី ជាអ្នកសម្របសម្រួលគណៈប្រតិភូ ដែលវាក៏ជាលើកដំបូងសម្រាប់កញ្ញាផងដែរ។ 
 

យុវតីវ័យ២២ឆ្នាំរូបនេះ រៀបរាប់ពីអារម្មណ៍របស់ខ្លួនដូច្នេះ៖ «ចំពោះខ្ញុំអាចនិយាយថា វាជាលើកទី១របស់ខ្ញុំវារៀងភ័យដែរ ក្នុងការជួយការងារផ្សេងៗ ដល់គណៈប្រតិភូ ដូច្នេះខ្ញុំមានបញ្ហាប្រឈមច្រើន ខ្ញុំអត់ដឹងថា តើគួរចាប់ផ្ដើមពីកន្លែងណា​ទៅកន្លែងណា។ ប៉ុន្តែពេលដែលខ្ញុំទទួលបានការ train (ហ្វឹកហ្វឺន) កន្លងមក ខ្ញុំមានអារម្មណ៍ថាខ្ញុំមានសមត្ថភាពអាចធ្វើវាបាន ហើយជាលទ្ធផលខ្ញុំអាចធ្វើវាបានមែន»។ 
 

កញ្ញា កញ្ញា សៀក សិរីវឌ្ឍនា ក៏បានលើកទឹកចិត្តដល់យុវជនជំនាន់ក្រោយ ដែលមាន​បំណងចង់ចូលរួម ជាអ្នកសម្របសម្រួលគណៈប្រតិភូ ក្នុងកិច្ចប្រជុំអាស៊ាននេះ មិនត្រូវភ័យខ្លាច​ ហើយត្រូវត្រៀមខ្លួនជាមុន ទាំងចំណេះដឹង ភាសាបរទេស សម្រាប់ទំនាក់ទំនង និងជំនាញទន់ផ្សេងៗទៀត៕