ទីភ្នាក់ងារព័ត៌មានកូរ៉េខាងត្បូង Yonhap ដែលដកស្រង់ប្រភពពីការិយាល័យប្រធានាធិបតី បានបញ្ជាក់ថា កុមារអាយុ១៤ឆ្នាំរូបនោះ មានជំងឺបេះដូងពីកំណើត។ តាមការគ្រោងទុក គេត្រូវជួបលោកស្រី Kim Keon-hee នៅមន្ទីរពេទ្យ Hebron Medical Center ក្នុងរាជធានីភ្នំពេញ ដែលកសាងដោយវេជ្ជបណ្ឌិតកូរ៉េខាងត្បូង Kim Woo-jung កាលពីឆ្នាំ២០០៧។

 

ដោយសារកុមាររូបនោះ មិនសូវស្រួលខ្លួន ទើបលោកស្រី Kim បានសម្រេចចិត្តទៅផ្ទះរបស់គេដោយផ្ទាល់។ 

 

«សូមឆាប់ជាសះស្បើយ ហើយចាំជួបគ្នានៅកូរ៉េខាងត្បូង»។ លោកស្រីបាននិយាយបែបនេះទៅកាន់កុមារដែលជាអ្នកជំងឺ ដោយទៅថែមទាំងនិយាយទៅកាន់ក្រុមគ្រួសារកុមារថា៖ «ក្តីសង្ឃឹមនៅតែមាន សូមកុំបោះបង់ក្នុងកាលៈទេសៈណាក៏ដោយ ហើយបន្តទៅមុខ»។

 

តាមការផ្សាយរបស់ការិយាល័យប្រធានាធិបតីកូរ៉េខាងត្បូង ឪពុករបស់កុមារនោះ បានស្លាប់មុនពេលគេកើត ហើយម្តាយ និងបងប្រុសសុទ្ធតែមានសុខភាពមិនល្អទេ។ កុមារកម្សត់ស្ថិតក្រោមការមើលថែទាំពីបងស្រីសាច់ថ្លែម្នាក់ ដែលមានរបរជាអ្នកអនាម័យ។

 

លោកស្រី Kim បានមកដល់រាជធានីភ្នំពេញ កាលពីថ្ងៃសុក្រ ដោយអមដំណើរជាមួយលោកប្រធានាធិបតី Yoon Suk-yeol ដែលជាស្វាមី សម្រាប់កិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធ។

 

ទាក់ទងនឹងមន្ទីរពេទ្យ Hebron Medical Center អ្នកនាំពាក្យរងការិយាល័យប្រធានាធិបតីលោក Lee Jae-myoung បានបញ្ជាក់ថា លោកប្រធានាធិបតី Yoon Suk-yeol ចាប់អារម្មណ៍យ៉ាងខ្លាំងដោយសារតែជាគំនិតផ្តួចផ្តើមរបស់វេជ្ជបណ្ឌិតកូរ៉េខាងត្បូង។

 

ដោយឡែកលោកស្រី Kim បានអះអាងថា គាត់នឹងជួយផ្សព្វផ្សាយពីមន្ទីរពេទ្យមួយនេះ។ បើតាម Yonhap លោកស្រីបានលើកឡើងថា៖ «ពេលនេះ ខ្ញុំមកដល់ទីនេះ ខ្ញុំមើលឃើញថា មិនមែនជាមន្ទីរពេទ្យធម្មតាឡើយ ប៉ុន្តែជាកន្លែងនៃក្តីសង្ឃឹម និងជាកន្លែងនៃសុបិន។ នៅពេលខ្ញុំត្រឡប់ទៅវិញ ខ្ញុំនឹងនិយាយអំពី Hebron»។

 

ក្នុងដំណើរទស្សនកិច្ចនៅដដែល ស្ត្រីទីមួយកូរ៉េខាងត្បូងក៏បានទៅកាន់មន្ទីរពេទ្យអង្គឌួង ផងដែរ។ លោកស្រីបានបញ្ជាក់ពីទំនាក់ទំនងដ៏ស៊ីជម្រៅរវាងកម្ពុជា និងកូរ៉េខាងត្បូង តាមរយៈសហប្រតិបត្តិការពង្រឹងវិស័យសុខាភិបាល។

 

លោកស្រី Kim Keon-hee ក៏បានទៅកាន់ហាង Smateria ផងដែរ។ Smateria ជាហាងលក់វត្ថុ និងសម្ភារអនុស្សាវរីយ៍ ដែលបានផ្តល់ឱកាសការងារដល់ស្ត្រីខ្មែរជាច្រើននាក់។ នៅទីនោះ លោកស្រីបានទិញវត្ថុអនុស្សារីយ៍ផ្ញើជូនដល់គ្រួសារយោធាកូរ៉េខាងត្បូងមួយគូ ដែលទើបកើតបានកូនភ្លោះ៥នាក់។

 

លោកស្រីបានសរសេរលិខិតដោយផ្ទាល់ដៃទៅគូស្វាមីភរិយា។ វត្ថុអនុស្សារីយ៍ជាប្រដាប់លេងកុមារធ្វើពីឈើ ដោយលោកស្រីជូនពរឲ្យកូនភ្លោះទាំង៥ធំធាត់ជាមួយសុខភាពល្អ និងកក់ក្តៅដូចជាឈើដ៏រឹងមាំ។ នេះជាលើកដំបូងក្នុងរយៈពេល៣៤ឆ្នាំ ដែលគ្រួសារនៅកូរ៉េខាងត្បូង កើតបានកូនភ្លោះ៥៕