លោក ឃៀង យិង បានលើកឡើងថា អ្នកពិការភាពមានប្រមាណជាង ៣០នាក់ ក្នុងនោះមានអ្នកពិការភ្នែក ត្រចៀក និងពិការជើង។ ក្នុងចំណោមជនពិការ ៣០នាក់ មានតែជាង ១០នាក់ប៉ុណ្ណោះ ដែលបានទៅទទួលសេវានៅសាលាឃុំ។ អ្នកពិការភាគច្រើនមិនមែនអ្នកដែលពិការធ្ងន់ធ្ងរ រហូតរុញរទេះនោះទេ។
 

នៅក្នុងឃុំពុំសូវមានអ្នកពិការភាពទៅធ្វើសំបុត្រកំណើត និងឯកសារផ្សេងៗនោះទេ ព្រោះភាគច្រើនក្រុមគ្រួសារ និងបងប្អូនរបស់ពួកគេអ្នកទៅធ្វើជំនួស។ នេះជាកាលើកឡើងរបស់មេឃុំ ហើយបន្ថែមថា ក្នុងសាលាឃុំអណ្ដូងទឹក មិនមានជម្រាលជនពិការ ព្រោះកាលពេលសាងសង់នៅក្នុងគម្រោង គឺមិនបានដាក់បញ្ចូល។ លោក យិង បញ្ជាក់ថា៖«ខ្ញុំពុំទាន់មានគម្រោងនឹងធ្វើជម្រាលជនពិការនោះទេ ព្រោះឃុំមិនអាចកែឱ្យខុសពីទម្រង់ដើមបាននោះទេ ហើយបើកែមិនដឹងថាធ្វើយ៉ាងម៉េច ដាក់ឡើងយ៉ាងម៉េច»។

 

ប្រសិនបើមានជនពិការ ឬប្រជាពលរដ្ឋក្នុងឃុំសំណូមពរឱ្យសាងសង់ជម្រាល គឺត្រូវតែស្នើទៅខាងរដ្ឋាភិបាលសាងសង់ជម្រាល នៅក្នុងសាលាឃុំអណ្ដូងទឹក ដើម្បីជួយសម្រួលដល់អ្នកពិការភាព។ លោកមេឃុំលើកឡើងបែបនេះ ហើយបន្តថា ដ្បិតតែមិនទាន់មានជម្រាល ប៉ុន្តែក្រុមការងារឃុំ បានយកចិត្តទុកដាក់ដល់អ្នកពិការភាព ដោយចុះផ្សាព្វផ្សាយ​ និងណែនាំដល់ពួកគេឱ្យទៅទទួលសេវានៅសាលាឃុំឱ្យបានគ្រប់ៗគ្នា។ លោក ឃៀង យិង បន្លឺសម្ដីថា៖ «តែអ្នកខ្លះមានសេវានៅជិតហើយមិនមកទេ តែចង់ទៅកន្លែងឆ្ងាយអស់លុយច្រើន។ នៅឃុំមិនមានអ្វីរំខានពេលវេលាពួកគាត់ច្រើនទេ ឱ្យតែពួកគាត់មកដល់ពួកខ្ញុំនឹងរៀបចំឱ្យគាត់មុនគេមិនឱ្យរង់ចាំយូរទេ»។ 

 

 

ជាមួយគ្នានេះ ឃៀង យិង បានស្នើឱ្យអ្នកពិការភាពទៅទទួលសេវាឱ្យបានគ្រប់គ្នា ព្រោះនៅសាលាឃុំមិនគិតកម្រៃពីពួកគេឡើយ។

 

លោក ពៅ ឆែប អាយុ ៣៥ឆ្នាំ រស់នៅភូមិជីមាល ឃុំអណ្ដូងទឹក ស្រុកបទុមសាគរ ខេត្តកោះកុង បានពិការជើងខាងស្ដាំ។ រូបគេអាចធ្វើដំណើរដោយខ្លួនឯងបាន ហើយក៏ធ្លាប់បានទៅធ្វើអត្តសញ្ញាណប័ណ្ណ និងធ្វើឯកសារផ្សេងៗដោយខ្លួនឯងនៅសាលាឃុំអណ្ដូងទឹកផងដែរ។ 

 

លោក ពៅ ឆែប បានរៀបរាប់ថា កន្លងមករូបគេពេលទៅទទួលសេវានៅឃុំ គឺជិះម៉ូតូទៅដោយខ្លួនឯង និងពេលខ្លះក្រុមគ្រួសារជូនទៅ។ កាយសម្បទាពុំសូវមាំមួន មិនអាចឈរបានយូនោះទេ។

 

លោក ឆែប បញ្ជាក់យ៉ាងដូច្នេះ៖«ពេលទៅដល់ឃុំអ្នកខ្លះគេយកចិត្តទុកដាក់អ្នកខ្លះក៏អត់បានយកចិត្តទុកដាក់ពិបាកដែរកន្លែងនេះ។ ប៉ុន្តែខ្ញុំឈរអត់បានយូ អ៊ឹចឹងគេឱ្យខ្ញុំចូលមុន។ ឧទាហរណ៍ដូចពេលខ្ញុំទៅបោះឆ្នោត គេសម្រួលឱ្យខ្ញុំចូលមុន»។

 

លោក ឆែប បានអំពាវនាវដល់អាជ្ញាធរឃុំឱ្យសាងសង់ជម្រាលជនពិការ ដើម្បីងាយស្រួលអ្នកពិការភាពអាចដើរ និងរុញរទេះឡើងបាន ពេលទៅរកសេវានៅសាលាឃុំ៕

 

អានអត្ថបទពាក់ព័ន្ធផ្សេងទៀត៖ យុវជនសកម្ម សេវាល្អ