«លោករដ្ឋមន្រ្តី អូស្ទីន បានពិភាក្សាពីសង្គ្រាមឈ្លានពានរបស់រុស្ស៊ីលើអ៊ុយក្រែន ហើយលោក បានបញ្ជាក់ពីរបៀបដែលអាម៉េរិក និងចិន រួមគ្នាប្រឆាំងនឹងការប្រើប្រាស់អាវុធនុយក្លេអ៊ែ ឬប្រឆាំងនឹងការគំរាមកំហែងពីការប្រើប្រាស់អាវុធនេះ»។ នេះជាខ្លឹមសារក្នុងសេចក្តីប្រកាសព័ត៌មានរបស់ក្រសួងការពារជាតិអាម៉េរិក ដែលចេញភ្លាមៗ ក្រោយពីជំនួបរវាងលោក អូស្ទីន និងលោក វ៉ី ត្រូវបានបញ្ចប់។ 
 

សេចក្តីប្រកាសព័ត៌មាន បានឲ្យដឹងទៀតថា នៅចំពោះមុខលោក វ៉ី លោក អូស្ទីន បានបង្ហាញក្តីបារម្ភពីការបង្កហេតុឡើងរបស់កូរ៉េខាងជើងនាពេលថ្មីៗនេះ។ លោក អូស្ទីន នៅបានជជែកជាមួយលោក វ៉ី លើប្រធានបទផ្សេងៗទៀត ដូចជា សារសំខាន់នៃកិច្ចចរចាលើការកាត់បន្ថយហានិភ័យ ការពង្រឹងទំនាក់ទំនងដែលមានវិបត្តិ និងការលើកកម្ពស់សុវត្ថិភាពផ្នែកប្រតិបត្តិការ ជាដើម។ 
 

ក្រៅពីនេះ លោក អូស្ទីន និងលោក វ៉ី បានពិភាក្សាគ្នាពីទំនាក់ទំនងលើវិស័ការពារជាតិនៃប្រទេសទាំង២ និងពីបញ្ហាសន្តិសុខសាកល។ នេះបើផ្អែកលើសេចក្តីប្រកាសព័ត៌មានពីភាគីអាម៉េរិកដដែល។ 

 

លោក តាន់ ខឺហ្វី (Tan Kefei) អ្នកនាំពាក្យក្រសួងការពារជាតិចិន ដែលមានវត្តមានលើទឹកដីកម្ពុជាដែរនោះ បានប្រាប់ក្រុមអ្នកកាសែតថា វា មានសារសំខាន់ណាស់ ក្នុងការនាំទំនាក់ទំនងចិន-អាម៉េរិក និងការអភិវឌ្ឍប្រកបដោយស្ថិរភាពត្រឡប់មកវិញ។ លោក តាន់ បញ្ជាក់បែបនេះថា៖«វា ជាទំនាក់ទំនងយុទ្ធសាស្រ្ត ដែលមានភាពស្មោះត្រង់ជាមួយគ្នា មានភាពស៊ីជម្រៅ និងប្រកបដោយការស្ថាបនា»។ 
 

ក្នុងពិធីបើកការប្រកួតកីឡាជាតិលើកទី៣ និងកីឡាជនពិការលើកទី១ នៅពហុកីឡដ្ឋានជាតិមរតកតេជោ កាលពីយប់ថ្ងៃទី២១ ខែវិច្ឆិកា ឆ្នាំ២០២២ សម្តេចនាយករដ្ឋមន្រ្តី ហ៊ុន សែន បង្ហាញក្តីសង្ឃឹមថា រដ្ឋមន្រ្តីក្រសួងការពារជាតិអាម៉េរិក និងរដ្ឋមន្រ្តីក្រសួងការពារជាតិចិន នឹងធ្វើកិច្ចការដ៏ល្អជាមួយគ្នា។ មេដឹកនាំកម្ពុជា ថ្លែងដូច្នេះថា៖«… អាចចាត់ទុកថា កម្ពុជា ជាទីកន្លែងនៃការសម្រុះស​ម្រួល១ របស់មហាអំណាច ដែលនាំទៅដល់ស្ថិរភាពក្នុងតំបន់ និងក្នុងពិភពលោក»។
 

សូមបញ្ជាក់ថា ប្រមុខការពារជាតិនៃប្រទេសមហាអំណាចទាំង២ខាងលើ មកកម្ពុជាលើកនេះ ដើម្បីចូលរួមកិច្ចប្រជុំរដ្ឋមន្រ្តីការពារជាតិអាស៊ាន និងកិច្ចប្រជុំរដ្ឋមន្រ្តីការពារជាតិអាស៊ានបូក។ កិច្ចប្រជុំនេះ ប្រព្រឹត្តទៅនៅខេត្តសៀមរាប ចាប់ពីថ្ងៃទី២១ ដល់ថ្ងៃទី២៣ ខែវិច្ឆិកា ឆ្នាំ២០២២ ក្រោមការរៀបចំរបស់កម្ពុជា ដែលជាម្ចាស់ផ្ទះ និងជាប្រធានអាស៊ាន៕