សម្តេចនាយករដ្ឋមន្រ្តី ថែមទាំងជំរុញអាជ្ញាធរ ឲ្យខិតខំដោះស្រាយជម្លោះរវាងកម្មករ ជាមួយរោងចក្រ និងរវាងបុគ្គលិក ជាមួយក្រុមហ៊ុន។ សម្តេច ក៏បានលើកទឹកចិត្តឲ្យអាជ្ញាធរព្យាយាមដោះស្រាយជម្លោះរបស់ប្រជាជនក្រៅប្រព័ន្ធតុលាការផងដែរ។ បន្ថែមពីនេះ សម្តេច តាស់តឿនអាជ្ញាធរឲ្យផ្តល់សេវាចាំបាច់នានាជូនប្រជាពលរដ្ឋឲ្យបានលឿន ចៀសវាងការបង្កបញ្ហាផ្សេងៗ ហើយត្រូវខិតខំលុបបំបាត់ឲ្យអស់នូវភាពអសកម្ម។

ជាមួយគ្នានេះ ប្រមុខគណបក្សកាន់អំណាច បានក្រើនរម្លឹកសមាជិក-សមាជិកាគណបក្ស ដែលមានតួនាទីក្នុងជួររដ្ឋាភិបាល ឲ្យបន្តបម្រើប្រជាជន និងរក្សាសន្តិសុខ សណ្ដាប់ធ្នាប់សង្គម ហើយត្រូវអនុវត្តគោលនយោបាយភូមិ-ឃុំ មានសុវត្ថិភាព ដោយបង្ក្រាបបទល្មើសផ្សេងៗ ដូចជា ចោរឆក់ ចោរប្លន់ និងការជួញដូរគ្រឿងញៀន ជាដើម៕