ដោយ៖ ហេ អួញ (យុវជនឃុំអណ្តូងទឹក)

 ស្រុកបូទុមសាគរ, កោះកុង៖ ​អនុវិទ្យាល័យ ពន្លឺវិជ្ជា ដែល​ស្ថិតនៅភូមិកណ្តោល

ឃុំកណ្តោល ស្រុកបូទុមសាគរ ខេត្តកោះកុង​ មានសិស្សសរុប១១៩នាក់ ក្នុងនោះស្រីមាន៦៥នាក់

កំពុងសិក្សា ពីថ្នាក់ទី៧ ដល់ទី៩។ ​ បើតាម លោក ម៉ែន  ចាន់  ​នាយកអនុវិទ្យាល័យ ពន្លឺវិជ្ជា ​

​ក្នុងឆ្នាំសិក្សា២០២១-២០២២នេះ សាលាបានផ្តល់ អាហារូបករណ៍សិស្សនៅ​ចំនួន ៦៥ នាក់ ក្នុងនោះស្រី​៣៩នាក់ ដែលស្មើនឹងជាង៥០ភាគរយ នៃសិស្សសរុប។

 

 យុវសិស្ស ថា រីសា ជាសិស្សថ្នាក់ទី៧ ដែលបានទទួលអាហារូបករណ៍ តាំងពីថ្នាក់ទី៦មក អះអាងថាខ្លួនសប្បាយរីករាយណាស់ ដែលបានទទួលបានអាហារូបករណ៍។ បើតាម ស្រីនីត នាងទទួលបានប្រាក់អាហារូបករណ៍នេះ ៣ដង ក្នុង១ឆ្នាំ ដោយប្រាក់ដែលបើកបានម្តងៗនោះមានចំនួន៨ម៉ឺនរៀល។ យុវសិស្ស ថា រីសា បន្ថែមដូច្នេះ ៖« យើងបានយកទៅទិញសម្ភារៈសិក្សាគ្រប់គ្រាន់ មិនខ្វះខាតទេ ដូចជាទិញប៊ិក ទិញសៀវភៅ និងរបស់ដែលខ្ញុំខ្វះខាត(សម្រាប់សិក្សា) ខ្ញុំទិញប្រើ»។  

​

យុវសិស្ស ថា រីសា ជាសិស្សថ្នាក់ទី៧ នៃអនុវិទ្យាល័យ ពន្លឺវិជ្ជា ដែលបានទទួលអាហារូបករណ៍រយៈពេល២ឆ្នាំហើយ 
 

សិស្សអាហារូបករណ៍ម្នាក់ទៀត គឺយុវសិស្ស ពៅ សំណាង ក៏រីករាយដែរចំពោះ​អាហារូបករណ៍ ដែលខ្លួនទទួលបានរយៈពេល​២ឆ្នាំកន្លងមកដែរ។ មិនខុសពី រីសា ឡើយ ​ សំណាង ប្រើប្រាស់ប្រាក់​អាហារូបករណ៍ ទៅទិញសម្ភារៈសម្រាប់សិក្សា គឺប៊ិក សៀវភៅ កាតាប និងសម្លៀកបំពាក់ជាដើម។ កំពុងសិក្សាទី៧ នៅអនុវិទ្យាល័យ ពន្លឺ វិជ្ជា ពៅ សំណាង បន្តថាអាហារូបករណ៍នេះ បានជួយសម្រាលបន្ទុកគ្រួសាររបស់ខ្លួនបានមួយចំណែក ហើយក៏ជាផ្នែកមួយដែល​ធ្វើ​ឱ្យរូបគេបានបន្តការសិក្សាផងដែរ។ ពៅ សំណាង បានតាំងចិត្តថា នឹងខិតខំរៀនដល់ប្រឡប់ជាប់បាក់ឌុប ហើយបើមានលទ្ធភាព ឱ្យខ្លក៏នឹងបន្តការសិក្សាថ្នាក់ឧត្តមសិក្សាដែរ។ ​

 

 

ពាក់ព័ន្ធនឹងការផ្តល់អាហារូបករណ៍ដល់សិស្សនេះ ​លោក ម៉ែន ចាន់ នាយកអនុវិទ្យាល័យ ពន្លឺវិជ្ជា អះអាងថា បានចូលរួមក្នុងការកាត់បន្ថយការចំណាយរបស់អាណាព្យាបាលបានមួយចំណែក ហើយក៏ជាការលើកទឹកចិត្តឱ្យសិស្សប្រឹងរៀនសូត្រ ប្រឹងរៀនឱ្យបានខ្ពស់ដែរ​។

 

 លោកគ្រូ ម៉ែន ចាន់ នាយកអនុវិទ្យាល័យ ពន្លឺវិជ្ជា។ 

 

​«អាហារូបករណ៍ហ្នឹង គឺមានរួចស្រេចហើយនៅបឋមសិក្សា។ អ៊ីចឹងយើងអត់បានពិបាករើសទេ ពីព្រោះខាងបឋម គេជ្រើសរើសរួចស្រេចហើយ។ អ៊ីចឹងនៅពេល​ដែលសិស្សឡើងមក គឺយើងឱ្យ(អាហារូបករណ៍)ស្វ័យប្រវត្តិ។ អាហារូបករណ៍ហ្នឹង បានចូលរួម​កាត់បន្ថយការចំណាយរបស់អាណាព្យាបាលបានមួយចំណែក»។ ​លោក ម៉ែន ចាន់ បានបន្ថែមដូច្នេះ មុននឹងលើកឡើងការស្នើរបស់ខ្លួនទៅកាន់អាណាព្យាបាលសិស្ស ពាក់ព័ន្ធនឹងការប្រើប្រាស់ប្រាក់អាហារូបករណ៍នេះ ឱ្យចំគោលដៅ ពោលគឺ​គាំទ្រដល់ការសិក្សារបស់កូន៕

​

​អានអត្ថបទពាក់ព័ន្ធផ្សេងទៀត៖ យុវជនសកម្ម សេវាល្អ