អន្តរជាតិ
សាកលវិទ្យាល័យនៅចិនបញ្ជូននិស្សិតទៅស្រុកកំណើតវិញខណៈមានបាតុកម្មផ្ទុះឡើង
01, Dec 2022 , 8:29 am
×![]()
ដោយ: VOA
បាតុករកាន់ក្រដាសសទទេ ក្នុងការតវ៉ាប្រឆាំងនឹងវិធានការបង្ការជំងឺកូវីដ១៩ នៅទីក្រុងប៉េកាំងប្រទេសចិន កាលពីថ្ងៃទី២៨ ខែវិច្ឆិកា ឆ្នាំ២០២២ ក្រោយពីមានការជួបជុំដើម្បីរំឭកដល់អ្នកស្លាប់នៅក្នុងអគ្គិភ័យនៅទីក្រុង Urumqi តំបន់ Xinjiang៕
សាកលវិទ្យាល័យនានានៅប្រទេសចិនកំពុងបញ្ជូននិស្សិតរបស់ខ្លួនទៅកាន់គេហដ្ឋានវិញ ខណៈគណបក្សកុម្មុយនីស្តចិនរឹតបន្តឹងវិធានការបង្ការកូវីដ និងព្យាយាមបង្ការកុំឱ្យមានបាតុកម្មបន្ថែមទៀត បន្ទាប់ពីមានហ្វូងមនុស្សដែលខឹងសម្បានឹងវិធានការតឹងតែងបំបាត់ជំងឺកូវីដឱ្យអស់ទាំងស្រុងឬហៅថា «សូន្យកូវីដ» (Zero Covid) បានអំពាវនាវឱ្យប្រធានាធិបតីចិនលោក Xi Jinping ចុះចេញពីតំណែង នៅក្នុងការបង្ហាញការប្រឆាំងរបស់សាធារណជនដ៏ខ្លាំងបំផុតជាច្រើនទសវត្សរ៍មកនេះ។ នេះបើតាមការរាយការណ៍របស់ទីភ្នាក់ងារព័ត៌មាន AP។
ដោយក្រុមប៉ូលិសបានចេញមកពង្រឹងកម្លាំងយ៉ាងព្រោងព្រាត គេមិនឮមានការប្រកាសពីបាតុកម្មកាលពីថ្ងៃអង្គារ ទី ២៩ ខែវិច្ឆិកា នៅទីក្រុងប៉េកាំង សៀងហៃ ឬទីក្រុងធំៗដទៃទៀតនោះទេ។
វិធានការរឹតបន្តឹងបង្ការជំងឺកូវីដខ្លះត្រូវបានបន្ធូរបន្ថយកាលពីថ្ងៃចន្ទ ដែលអាចជាកិច្ចប្រឹងប្រែងដើម្បីបន្ថយកំហឹងសាធារណជនបន្ទាប់ពីបាតុកម្មកាលពីចុងសប្តាហ៍នៅតាមបណ្ដាទីក្រុងយ៉ាងហោចណាស់ចំនួន៨។ ប៉ុន្តែមន្ត្រីគណបក្សកាន់អំណាចរបស់ចិនបានបញ្ជាក់ថាខ្លួននឹងបន្តយុទ្ធសាស្ត្រ «សូន្យកូវីដ» ដែលតម្រូវឱ្យបិទខ្ទប់មនុស្សរាប់លាននាក់នៅគេហដ្ឋានរបស់ខ្លួន ដើម្បីព្យាយាមបំបែករាល់ករណីឆ្លងនីមួយៗ។
សាកលវិទ្យាល័យ Tsinghua ដែលជាកន្លែងលោកប្រធានាធិបតី Xi ធ្លាប់រៀនហើយនិងមានការតវ៉ារបស់និស្សិតកាលពីថ្ងៃអាទិត្យ ព្រមទាំងសាកលវិទ្យាល័យផ្សេងទៀតនៅរដ្ឋធានីប៉េកាំងនិងនៅខេត្តភាគខាងត្បូងក្វាងទុង (Guangdong) និយាយថា ពួកគេបញ្ជូននិស្សិតទៅគេហដ្ឋានវិញដើម្បីការពារនិស្សិតពីការឆ្លងកូវីដ។ ក៏ប៉ុន្តែការបញ្ជូននិស្សិតទៅស្រុកកំណើតវិញយ៉ាងឆ្ងាយនោះ ក៏បន្ថយលទ្ធភាពដែលពួកគេអាចប្រមូលផ្តុំគ្នាក្នុងបរិវេណសាលាដើម្បីតវ៉ាដូចកាលពីចុងសប្តាហ៍។
សាកលវិទ្យាល័យខ្លះបានរៀបចំរថយន្តក្រុងដើម្បីដឹកជញ្ជូននិស្សិតទៅកាន់ស្ថានីយរថភ្លើង។ ពួកគេថាថ្នាក់រៀននិងការប្រឡងបញ្ចប់នឹងធ្វើតាមអនឡាញជំនួសវិញ។
សាកលវិទ្យាល័យវនវប្បកម្មប៉េកាំង បាននិយាយនៅលើគេហទំព័ររបស់ខ្លួនថា៖ «យើងនឹងរៀបចំឱ្យនិស្សិតដែលចង់ត្រឡប់ទៅស្រុកកំណើតរបស់ពួកគេវិញ»។ សាកលវិទ្យាល័យថាមកដល់ពេលនេះ បុគ្គលិកនិងនិស្សិតទាំងអស់ធ្វើតេស្តឃើញអវិជ្ជមានជំងឺកូវីដ១៩។
បរិវេណសាកលវិទ្យាល័យនានាធ្លាប់ជាប្រភពនៃការតស៊ូមតិកាលពីកិច្ចប្រឹងប្រែងជំរុញកំណែទម្រង់ប្រជាធិបតេយ្យចុងក្រោយបង្អស់នៅចិនដីគោកកាលពីទសវត្សរ៍១៩៨០ ដែលវិវត្តរហូតក្លាយជាចលនាដឹកនាំដោយនិស្សិតនៅឆ្នាំ១៩៨៩ ដែលបានកាន់កាប់ទីលាន Tiananmen (ធានអានមេន) ដែលត្រូវបានបង្ក្រាបយ៉ាងខ្លាំងដោយកងទ័ព។
© រក្សាសិទ្ធិដោយ thmeythmey.com
