ដោយមិនលម្អិតពីកាលបរិច្ឆទ ឬនរណាជាអ្នកសម្លាប់ អ្នកនាំពាក្យរបស់ក្រុមសកម្មប្រយុទ្ធរដ្ឋអ៊ីស្លាម(ISIS) ប្រកាសនៅថ្ងៃទី៣០ ខែវិច្ឆិកាថា មេដឹកនាំរបស់ខ្លួន លោក Abu Hasan al-Hashimi al-Qurashi ដែលជាជនជាតិអ៊ីរ៉ាក់ត្រូវបានសម្លាប់ក្នុងការប្រយុទ្ធជាមួយសត្រូវរបស់ព្រះ។

 

ក្រោយការប្រកាសនេះ ទីបញ្ជាការកណ្តាលរបស់យោធាអាម៉េរិកអះអាងថា មេដឹកនាំ ISIS ត្រូវបានសម្លាប់ថ្មីៗនេះ អំឡុងការវាយឆ្មក់ដោយកងកម្លាំងស៊ីរីក្នុងតំបន់។ កន្លងមក យោធាអាម៉េរិកបញ្ជាក់ថា លោក Hashimi ត្រូវបានសម្លាប់នៅពាក់កណ្តាលខែតុលាក្នុងប្រតិបត្តិការរបស់ក្រុមឧទ្ទាមកងទ័ពស៊ីរីសេរីក្នុងខេត្ត Daraa ភាគខាងត្បូងស៊ីរី។ 

 

«​ការស្លាប់របស់ Abu al-Hassan al-Hashimi al-Qurayshi នៅពាក់កណ្តាលខែកុម្ភៈគឺជាការបំផ្លាញមួយទៀតដល់ក្រុម ISIS»។ អ្នកនាំពាក្យទីបញ្ជាការកណ្តាលរបស់យោធាអាម៉េរិក វរសេនីយ៍ឯក Joe Buccino លើកឡើងបែបនេះក្នុងសេចក្តីថ្លែងការណ៍ថ្ងៃទី៣០ ខែវិច្ឆិកា។

 

ទន្ទឹមនេះ ក្រុម ISIS ក៏បានប្រកាសមេដឹកនាំថ្មីដែរ។ ក្នុងសារជាសំឡេង អ្នកនាំពាក្យក្រុម ISIS ប្រកាសពីការតែងតាំងលោក Abu al-Hussein al-Husseini al-Qurashi ជាមេដឹកនាំក្រុម ISIS ថ្មី។ 

 

លោក al-Qurayshi ជាមេដឹកនាំ ISIS ទីពីរហើយដែលត្រូវបានសម្លាប់ក្នុងឆ្នាំនេះ។ មេដឹកនាំក្រុមសកម្មប្រយុទ្ធរដ្ឋឥស្លាមពីរនាក់ទៀតត្រូវបានសម្លាប់ក្នុងប្រតិបត្តិការប្រឆាំងភេរវកម្មរបស់អាម៉េរិកនៅស៊ីរី ដោយលោក Aby Ibrahim al-Hashimi al-Qurayshi ស្លាប់ក្នុងខែកុម្ភៈ ហើយ លោក Abu Bakr al-Baghdadi ស្លាប់ក្នុងឆ្នាំ២០១៩៕