អន្តរជាតិ
ក្បួនខ្នាតសិប្បកម្ម និងវប្បធម៌នៃ «នំប៉័ង Baguette បារាំង» ត្រូវបានចុះក្នុងបញ្ជីបេតិកភណ្ឌ
03, Dec 2022 , 9:29 am
×![]()
ដោយ: ធីតា
ក្បួនខ្នាតសិប្បកម្ម និងវប្បធម៌នៃ «នំប៉័ង Baguette បារាំង» (Les savoir-faire artisanaux et la culture de la baguette de pain/Artisanal know-how and culture of baguette bread) ត្រូវបានចុះក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិ របស់អង្គការយូណេស្កូ នាកិច្ចប្រជុំគណៈកម្មាធិការអន្តររដ្ឋាភិបាលសម្រាប់ការថែរក្សាបេតិកភណ្ឌវប្បធម៌អរូបីលើកទី១៧ នៅក្រុង Rabat ប្រទេសម៉ារ៉ុក កាលពីថ្ងៃទី៣០ ខែវិច្ឆិកា។
វប្បធម៌នៃការធ្វើនំប៉័ង Baguette បានរីកដុះដាលខ្លាំងបន្ទាប់ពីសង្គ្រាមលោកលើកទី២ ហើយសិប្បកម្មនៃការធ្វើនំប៉័ងវែងនេះ មានកំណើតចាប់តាំងពីសតវត្សរ៍ទី១៧មកម្ល៉េះ។ យោងតាមឯកសារដែលបារាំងស្នើសុំចុះបញ្ជី Baguette មានលក្ខណៈខុសប្លែកពីនំប៉័ងទូទៅ ដោយមានគ្រឿងផ្សំសំខាន់តែបួនប៉ុណ្ណោះ គឺ ម្សៅ ទឹក អំបិល ដំបែ/ឬ ម្សៅជូរ)។
បច្ចុប្បន្ន Baguette ជាអាហារដ៏ពេញនិយមនៅក្នុងសង្គមបារាំង រួមទាំងបណ្តាប្រទេសហ្វ្រង់កូហ្វូនមួយចំនួនទៀត ដូចជា អាល់ហ្សេរី ម៉ារ៉ុក ទុយនីស៊ី វៀតណាម និងកម្ពុជា ជាដើម។
មុនការស្នើសុំចុះបញ្ជីបេតិកភណ្ឌវប្បធម៌អរូបីនៃមនុស្សជាតិ បារាំងបានធ្វើកិច្ចជាច្រើនលើការផ្សាព្វផ្សាយ ដូចជាការបង្កើតគណៈកម្មការជំនាញដើម្បីវាយតម្លៃ សិក្ខាសាលា និងការប្រកួតប្រជែងគុណភាពនំ ដោយមានការចូលរួមពីអ្នកជំនាញ និងបណ្តាហាងនំប៉័ងផ្សេងៗ។
កាលពីថ្ងៃទី៣០ ខែវិច្ឆិកា គណៈកម្មាធិការអន្តររដ្ឋាភិបាលសម្រាប់ការថែរក្សាបេតិកភណ្ឌវប្បធម៌អរូបី បានចុះបញ្ជី ក្បួនខ្នាតសិប្បកម្ម និងវប្បធម៌នៃ «នំប៉័ង Baguette បារាំង» ជាសម្បត្តិបេតិកភណ្ឌវប្បធម៌អរូបី នៃមនុស្សជាតិ រួមជាមួយនឹងសំណើ៤៥ទៀត ក្នុងនោះ មានគុនល្បុក្កតោរបស់កម្ពុជា ផងដែរ៕
Tag:
បេតិកភណ្ឌ
© រក្សាសិទ្ធិដោយ thmeythmey.com
