កញ្ញា សុង សុធាវី៖ នាងខ្ញុំសង្កេតឃើញថា បេះដូងជាគ្រូបង្រៀនមានភាពរវល់ច្រើន ហើយពេលខ្លះមិនបានញាំបាយទៀងពេលផង និងមានការប្រជុំញឹកញាប់! តើកញ្ញាអាចគ្រប់គ្រងសាលារៀននេះទាំងបីសាខាបានដោយរបៀបណា?

កញ្ញា ប៉ិល មករា៖ ចាស ជាការពិត នាងខ្ញុំគ្រប់គ្រងរួមនូវសាខាទាំងបី ប៉ុន្តែជាក់ស្តែងតាមសាខាយើងនីមួយៗ មានគណៈគ្រប់គ្រងសាខាផ្ទាល់។ អ៊ីចឹងនៅសាខានីមួយៗមាន នាយកសាខាដែលគាត់គ្រប់គ្រងប្រតិបត្តិការទូទៅ ហើយមាននាយករង ឬ នាយិការង ដែលពួកគាត់គ្រប់គ្រងលើកម្មវិធីសិក្សាផងដែរ។ ទន្ទឹមនោះយើងមានគោលការណ៍ និងរចនាសម្ព័នគ្រប់គ្រងច្បាស់លាស់។ យើងមានកម្មវិធីសិក្សាច្បាស់លាស់ យើងមានសូចនាករណ៍តាមដាន និងរង្វាយតម្លៃគុណភាពសិក្សារបស់សិស្សតាមសាខានីមួយៗ។ អ៊ីចឹងហើយ មិនជាលំបាកប៉ុន្មានទេ សម្រាប់នាងខ្ញុំ ក្នុងការគ្រប់គ្រងជារួមទាំងបីសាខានេះ។

 

កញ្ញា សុង សុធាវី៖  កញ្ញា ក្រៅពីការគ្រប់គ្រងធនធានគ្រូបង្រៀនជាង៣០នាក់ និងសិស្សទាំងអស់ជាង៣០០នាក់ក្នុងដៃ តើមានការពង្រឹងគុណភាពអប់រំក្នុងស្ថាប័នផ្ទាល់យ៉ាងដូចម្តេច?

កញ្ញា ប៉ិល មករា៖ សម្រាប់សាលារៀនសហគមន៍២១យើងផ្ទាល់ យើងមានផែនការប្រចាំឆ្នាំច្បាស់លាស់ មិនថាតែការពង្រឹងគុណភាពអប់រំរបស់យើងទេ សូម្បីតែហេដ្ឋារចនាសម្ព័នរបស់សាលារៀនទាំងមូល ក៏យើងមានផែនការត្រឹមត្រូវដែរ។ អ៊ីចឹង រាល់ឆ្នាំ យើងត្រៀមផែនការអភិវឌ្ឍន៍កម្មវិធីសិក្សារបស់យើង និងអភិវឌ្ឍសមត្ថភាពគ្រូ។ ដូចនេះយើងមានការប្រជុំ ការពិភាក្សាគ្នា លើរង្វាយតម្លៃជាក់ស្តែងរបស់សាលារៀន ដែលយើងតែងតែផ្តល់ការបណ្តុះបណ្តាល ទាំងទំនើបកម្មក្នុងការសិក្សា ក៏ដូចជាជំរុញសមត្ថភាពរបស់គ្រូលើចំណុចណាមួយ? អ៊ីចឹងហើយ យើងអភិវឌ្ឍន៍ផែនការរបស់យើងជាប្រចាំ។ 

កញ្ញា​ សុង សុធាវី៖ ឆ្លងកាត់បទពិសោធជិត២០ឆ្នាំក្នុងវិស័យអប់រំ ផ្នែកឯកជន និងមានតួនាទីជា នាយិកាប្រតិបត្តិការទាំងបីសាខាផង តើកញ្ញាមានមតិផ្តាំផ្ញើបែបណា សម្រាប់បងប្អូនស្រ្តីខ្មែរយើង?

កញ្ញា ប៉ិល មករា៖ សម្រាប់នាងខ្ញុំ ពិតជាមានមោទកភាពណាស់ ដែលបានចូលរួមជាមួយ មាតាបិតាសិស្ស ក្នុងការចូលរួមអភិវឌ្ឍន៍វិស័យអប់រំ និងបណ្តុះបណ្តាល ប្អូនៗ ក្មួយៗជំនាន់ក្រោយ ហើយខ្ញុំជឿជាក់ថា មានបងប្អូនយើងច្រើនទៀត ដែលមានបេះដូង និងឆន្ទៈក្នុងវិស័យនេះ ដើម្បីក្លាយជាសរសរទ្រូងនៃប្រទេសជាតិយើងទាំងមូល៕  

 កញ្ញា ប៉ិល មករា  នាយិកាប្រតិបត្តិការទាំងបីសាខា នៃសាលារៀនសហគមន៍ ២១