ការចុះត្រួតពិនិត្យតំបន់ជម្លោះកើតឡើងតិចជាងមួយសប្ដាហ៍តាំងពីឧត្តមសេនីយ៍ Asim Munir ឡើង​កា​ន់​តំណែងជាប្រមុខដឹកនាំយោធារបស់ប្រទេសអាស៊ីខាងត្បូងមួយនេះ។

«ខ្ញុំសូមបញ្ជាក់ឱ្យបានច្បាស់ថា កងកម្លាំងប៉ាគីស្ថានគឺត្រៀមខ្លួនរួចរាល់ហើយ មិនត្រឹមតែការ ពារ​ទឹក​ដី​មាតុភូមិនោះឡើយ ក៏ប៉ុន្តែក៏ត្រៀមខ្លួនរួចរាល់សម្រាប់ការវាយតបទៅវិញទៅកាន់​សត្រូវ​ប្រសិនជា​មាន​សង្គ្រាម»។ ឧត្តមសេនីយ៍ Asim សង្កត់ធ្ងន់បែបនេះក្នុងសេចក្ដីថ្លែងការណ៍មួ​យរបស់យោធា។ លោក Asim ព្រមានទៅកាន់ឥណ្ឌាចំៗថា ឥណ្ឌាមិនអាចសម្រេចបានការចង់បានមិនសមរម្យ។ 
 

មហាអំណាចនុយក្លេអ៊ែរអាស៊ីខាងត្បូងទាំងពីរ សុទ្ធតែបានទាមទារទាំងស្រុងទឹកដីកាស្មៀរ ហើយបានប្រយុទ្ធគ្នាពីរលើកដើម្បីគ្រប់គ្រងតំបន់នោះ។ ចាប់តាំងពីដើមឆ្នាំ ២០២១ មកតំបន់ខណ្ឌចែកជាក់ស្ដែង (LoC) ភាគច្រើនមានស្ងប់ស្ងាត់ បន្ទាប់ពីមានការបន្តកិច្ចព្រមព្រៀងឈប់បាញ់រវាង ឥណ្ឌា និងប៉ាគីស្ថាន។
 

នៅប៉ាគីស្ថាន ស្ថាប័នកងទ័ពរក្សាឥទ្ធិពលខ្លាំងលើបញ្ហាសន្តិសុខ និងកិច្ចការបរទេស។ មេទ័ព​ប៉ាគីស្ថាន ក៏ដើរតួយ៉ាងសំខាន់ក្នុងការគ្រប់គ្រងហានិភ័យនៃជម្លោះជាមួយឥណ្ឌានៅតាមព្រំដែនភាគខាងកើតរបស់ខ្លួន ខណៈដែលកំពុងដោះស្រាយបញ្ហាដែលអាចកើត​មានជាមួយអាហ្វហ្កានីស្ថា​ន​នៅព្រំដែន​ខាង​លិច​របស់ខ្លួន៕