ជាមួយនឹងការតាំងចិត្តខ្ពស់កីឡាករដែលមានរហស្សនាមថារាហ៊ូប្រាក់ ស៊ន រ៉ាគីម បន្តហ្វឹកហ្វឺនកម្លាំងកាយ បង្កើនការហ្វឹកហាត់សាច់ស្នៀតជាប្រចាំ ដើម្បីពង្រឹងសមត្ថភាពបន្ថែមក៏ដូចជាការត្រៀមខ្លួនឱ្យបានសមស្របក្នុងដំណើរឆ្ពោះទៅព្រឹត្តិការណ៍កីឡាស៊ីហ្គេមលើកទី៣២ ឆ្នាំ២០២៣ ខាងមុខ។ ការតាំងចិត្តនោះដែរ រ៉ាគីម ប្រាប់សារព័ត៌មានថ្មីៗតាមសារអេឡិចត្រូនិក នៅថ្ងៃទី៤ ខែធ្នូ ឆ្នាំ២០២២ ថារូបគេយល់កាន់តែច្បាស់ពីកីឡាឃីកបុកស៊ីង។

 

«ក្រោយបញ្ចប់ការប្រកួតកីឡាជាតិលើកទី៣ នេះខ្ញុំទទួលបានមេដាយមាស១ ខ្ញុំគិតថាការប្រកួតកីឡាឃីកបុកស៊ីងនេះធ្វើឱ្យខ្ញុំយល់កានតែច្បាស់ពីលក្ខខន្តិកៈនៃការប្រកួត ហើយក៏ជាកម្លាំងចិត្តសម្រាប់ខ្ញុំ ក្នុងដំណើរឆ្ពោះទៅស៊ីហ្គេម២០២៣ ដែលកម្ពុជាធ្វើជាម្ចាស់ផ្ទះ»។ នេះជាការបញ្ជាក់របស់ ស៊ន រ៉ាគីម។

 

បន្ថែមពីនេះរាហ៊ូប្រាក់ ស៊ន រ៉ាគីម បញ្ជាក់ថាមេដាយមាសពីព្រឹត្តិការណ៍កីឡាជាតិលើកទី៣ គឺជាកម្លាំងចិត្តដ៏ធំមួយដែរសម្រាប់រូបគេក្នុងការតាំងចិត្តប្រជែងយកមេដាយមាសនាព្រឹត្តិការណ៍កីឡាស៊ីហ្គេម២០២៣។ ស៊ន រ៉ាគីម ជឿជាក់ និងរំពឹងថារូបគេនឹងអាចដណ្តើមបានមេដាយមាស១ នៅឆ្នាំ២០២៣ ខាងមុខ៕