«ប្រជានេសាទទាំងអស់ នឹងបន្តធ្វើនេសាទជាធម្មតាឡើងវិញ នៅពេលផុតរយៈពេលនៃការបិទការនេសាទនេះ»។ នេះបើតាមលិខិតរបស់អភិបាលខេត្តកោះកុង ដែលប្រាប់ឱ្យប្រជានេសាទទាំងអស់ បញ្ឈប់សកម្មភាពតាមសេចក្តីជូនដំណឹងជាកំហិត។
 

បើតាមអភិបាលខេត្តកោះកុង ការបិទនេសាទបណ្ដោះអាសន្ននេះ ដើម្បីគ្រប់គ្រងផលស្ដុកត្រីកាម៉ុង ឱ្យមាននិរន្តរភាពស្របតាមគោលនយោបាយវិស័យជលផលជាតិ និងធានាបាននូវប្រព័ន្ធអេកូឡូស៊ីដែនជម្រកសុវត្ថិភាពត្រីកាម៉ុង ឱ្យមានភាពប្រសើរ។ ជាពិសេសជួយលើកកម្ពស់ជីវភាពរស់នៅរបស់ប្រជាពលរដ្ឋ និងសហគមន៍មូលដ្ឋាន ការពារអភិរក្ស និងប្រើប្រាស់ត្រីកាម៉ុងប្រកបដោយនិរន្តរភាព ។
 

«ក្នុងករណីប្រជានេសាទ មិនអនុវត្តតាមសេចក្តីជូនដំណឹងនេះ នឹងត្រូវផ្ដន្ទាទោសតាមច្បាប់ជាធរមាន»។ នេះបើតាមលិខិតរបស់លោកស្រី មិថុនា ភូថង។

ដែនជម្រកសុវត្ថិភាពត្រីកាម៉ុង នៅពាមក្រសោប មានផ្ទៃដី ១២៨៣ហិកតា ស្ថិតនៅភូមិសាស្រ្តឃុំពាមក្រសោប ស្រុកមណ្ឌលសីមា និងឃុំកោះកាពិ ស្រុកកោះកុង។ ដែនជម្រកនេះ ត្រូវបានបង្កើតឡើង កាលពីខែកញ្ញា ឆ្នាំ ២០១៩។
 

យោងតាមរបាយការណ៍ក្រសួងកសិកម្ម រុក្ខាប្រមាញ់ និងនេសាទ ក្នុងឆ្នាំ២០២១ កម្ពុជាទទួលបានផលិតផលជលផលសមុទ្រជាង១២ម៉ឺនតោន កើនឡើង២៣០០តោន ធៀបនឹងឆ្នាំ២០២០៕