អន្តរជាតិ
G7 ដាក់សំណើ ១៥ពាន់លានដុល្លារដល់វៀតណាម ដើម្បីជួយកាត់បន្ថយការប្រើប្រាស់ធ្យូងថ្ម 07, Dec 2022 , 8:43 pm
× ក្រុមប្រទេសដែលមានសេដ្ឋកិច្ចជឿនលឿនទាំង៧ (G7) ក្នុងកិច្ចប្រជុំកំពូលមួយនៅសប្តាហ៍ក្រោយ បានដាក់សំណើទំហំ១៥ ពាន់លានដុល្លារដល់វៀតណាម ដើម្បីគាំទ្រ និងពន្លឿនការផ្លាស់ប្តូរចេញពីការប្រើប្រាស់ធ្យូងថ្ម។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters នៅថ្ងៃទី៧ ខែធ្នូ។
វៀតណាមដែលជាប្រទេសប្រើប្រាស់ថាមពលធ្យូងថ្មច្រើនបំផុតទាំង ២០ របស់ពិភពលោក បានចាប់ផ្ដើមភ្ជាប់ទំនាក់ទំនងភាពជាដៃគូផ្លាស់ប្តូរថាមពលជាមួយក្រុមប្រទេសដែលមានសេដ្ឋកិច្ចជឿនលឿនទាំង៧ (G7) ក្នុងកិច្ចប្រជុំកំពូលស្តីពីអាកាសធាតុ COP27 សកលកាលពីខែវិច្ឆិកាកន្លងទៅ។
ដើម្បីបញ្ចុះបញ្ចូលវៀតណាមឱ្យផ្លាស់ប្ដូរចេញពីការប្រើប្រាស់ធ្យូងថ្មនេះ អ្នកចរចារបស់ G7 ដែលដឹកនាំដោយសហភាពអឺរ៉ុប និងអង់គ្លេសបានស្នើកញ្ចប់ថវិកាជាង ៧,៥ ពាន់លានដុល្លារពីវិស័យសាធារណៈ និងជាង ៧,៥ ពាន់លានដុល្លារពីវិស័យឯកជន។ នេះបើតាមមន្ត្រី ៣ រូបពីក្រុមប្រទេស G7 ដោយបន្ថែមថានេះជាកិច្ចពិភាក្សាសម្ងាត់។
ប្រភពដែលសុំមិនបញ្ចេញឈ្មោះដដែលបាននិយាយថា សំណើនេះនឹងជាសំណើចុងក្រោយរបស់ G7 មុនពេលកិច្ចប្រជុំកំពូលនៃសហភាពអឺរ៉ុប និងអាស៊ាននៅទីក្រុងព្រុចសែលចាប់ផ្ដើមនៅថ្ងៃទី១៤ ខែធ្នូ ដែលជាកាលបរិច្ឆេទដែល សហភាពអឺរ៉ុបដាក់ស្នើ។
គួរបញ្ជាក់ថា កញ្ចប់ជំនួយនេះបានរីកធំឡើងបន្តិចម្តងៗ ដោយ G7 ដំបូងសន្យាផ្ដល់ជំនួយត្រឹមតែ ២ ពាន់លានដុល្លារនៅក្នុងមូលនិធិសាធារណៈ ជាមួយនឹងជំនួយឯកជនបន្ថែមដែលមិនបានកំណត់។ យ៉ាងណាមិញ កិច្ចព្រមព្រៀងនេះនៅមិនទាន់ច្បាស់នៅឡើយ ខណៈអាចមានការកែសម្រួលបន្ថែមទៀត។
លើសពីនេះ ការសម្រេចចិត្តរបស់វៀតណាមក៏នៅមិនទាន់ប្រាកដនៅឡើង ដ្បិតកង្វល់ចម្បងរបស់វៀតណាមហាក់ដូចមិនទាន់អាចដោះស្រាយបានក្នុងកិច្ចព្រមព្រៀង។ កន្លងមក វៀតណាមបានស្នើសុំជំនួយបន្ថែមទៀត ព្រោះវៀតណាមមានគោលនយោបាយមិនខ្ចីប្រាក់ច្រើនពីបរទេស។
បញ្ហាថាមពលរបស់វៀតណាមនៅតែជាបញ្ហាប្រឈមមុខ ដោយសារផែនការរបស់ក្រុមប្រទេស G7 ផ្តោតលើថាមពលកកើតឡើងវិញ ដែលអាចបណ្តាលឱ្យមានការខ្វះខាតថាមពលនៅក្នុងប្រទេសកំពុងអភិវឌ្ឍ។ ភ្លាមៗបន្ទាប់ពីបញ្ចប់កិច្ចចរចានៅខែវិច្ឆិកា នៅពេលដែលអាជ្ញាធរវៀតណាមបានលុបចោលកិច្ចប្រជុំដែលនឹងត្រូវធ្វើឡើងនៅទីក្រុងហាណូយជាមួយប្រេសិតអាកាសធាតុកំពូលរបស់អាម៉េរិក និងសហភាពអឺរ៉ុប ក្រសួងឧស្សាហកម្មវៀតណាមបានផ្សព្វផ្សាយសេចក្តីព្រាងច្បាប់ថ្មីមួយសម្រាប់ផែនការថាមពលរយៈពេលវែងរបស់ខ្លួនដែលជំរុញឱ្យមានការប្រើប្រាស់ធ្យូងថ្មកាន់តែច្រើន៕
© រក្សាសិទ្ធិដោយ thmeythmey.com