ជាតិ
សង្គមជាតិ
ក្រៅពីទំនាក់ទំនងទ្វេភាគី ប្រធានាធិបតីបារាំង ម៉ាក្រុង អរគុណសម្តេច ហ៊ុន សែន ដែលបានចូលរួមការពារប្រជាជនអ៊ុយក្រែន
14, Dec 2022 , 1:57 pm
លោកប្រធានាធិបតី បារាំង អេម៉ានុយអ៊ែល ម៉ាក្រុង ស្វាគមន៍ សម្តេចនាយករដ្ឋមន្ត្រី ហ៊ុន សែន នៅវិមានរដ្ឋាភិបាល អេលីហ្សេ មុនអាហារពេលល្ងាច ថ្ងៃទី ១៣ ខែធ្នូ ។
×![]()
ដោយ: វិច្ឆិកា
នៅក្នុងដំណើរទស្សនកិច្ចការងារនៅក្នុងប្រទេសបារាំង និងទីក្រុងព្រុចសែល ប្រទេសបែលហ្ស៊ិក សម្តេច ហ៊ុន សែន ក៏បានជួបសន្ទនាជាមួយប្រធានាធិបតីបារាំង លោក អេម៉ានុយអែល ម៉ាក្រុង អំពីការពង្រឹងទំនាក់ទំនងនៃប្រទេសទាំងពីរផងដែរ។ នៅក្នុងសន្និសីទកាសៃតខ្លីមួយដែលត្រូវបានរៀបចំនៅវិមានរដ្ឋាភិបាលអេលីហ្សេ ប្រមុខដឹកនាំទាំងពីរបានរម្លឹកប្រាប់គ្នាឡើងវិញដោយមោទនៈ អំពីទំនាក់ទំនងជាប្រវត្តិសាស្ត្រនៃប្រទេសទាំងពីរ។
ប្រធានាធិបតីបារាំង លោក អេម៉ានុយអែល ម៉ាក្រុង បានរម្លឹកមុនគេអំពីការលើកស្ទួយ និងការការពារសន្តិភាពនៅកម្ពុជាក្នុងអតីតកាល។ លោកប្រធានាធិបតី បានលើកឡើងអំពីសុន្ទរកថាដ៏ល្បីល្បាញរបស់លោកឧត្តមសេនីយ៍ ហ្សាល ដឺហ្គោល នៅក្នុងឆ្នាំ១៩៦៦នៅក្នុងរាជធានីភ្នំពេញ ដែលអំពាវនាវឱ្យសហរដ្ឋអាមេរិកកុំពង្រីកសង្គ្រាមនៅឥណ្ឌូនចិន។ ជាមួយគ្នានេះដែរ លោក ម៉ាក្រុង ក៏បានរម្លឹកឡើងវិញដែរអំពីការចុះហត្ថលេខាលើកិច្ចព្រមព្រៀងទីក្រុងប៉ារីសក្នុងឆ្នាំ១៩៩១ស្តីពីសន្តិភាពនៅកម្ពុជា ដើម្បីធានាអធិបតេយ្យភាព បូរណភាពទឹកដីរបស់កម្ពុជា សម្រាប់ការកសាងកម្ពុជាឡើងវិញ។
«នៅថ្ងៃនេះ ថ្ងៃទី១៣ ខែធ្នូ ២០២២ ខណៈដែលសង្គ្រាមកំពុងកើតឡើងនៅអឺរ៉ុប សម្តេចបានសម្រេចចិត្តអញ្ជើញមកទីក្រុងប៉ារីសដើម្បីចូលរួមក្នុងសន្និសីទស្តីពីការគាំទ្រប្រជាពលរដ្ឋអ៊ុយក្រែន នៅក្នុងក្របខណ្ឌនៃការបន្តអនុវត្តសេចក្តីសម្រេចចិត្តរបស់អង្គការសហប្រជាជាតិ ដែលថ្កោលទោសការធ្វើទុកបុកម្នេញរបស់ប្រទេសរុស្ស៊ី និងដើម្បីការពារសន្តិភាពជានិរន្ត។ ខ្ញុំសូមអរគុណសម្តេចជាឱឡារិក។»។ នេះជាសេចក្តីថ្លែងការណ៍របស់ប្រធានាធិបតីបារាំង មុននឹងលោកបន្តថា៖ «ការជួបគ្នារបស់យើងទាំងពីរ ក៏អនុញ្ញាតឱ្យយើងអាចពិភាក្សាអំពីកិច្ចសហប្រតិបត្តិការនៅក្នុងក្របខណ្ឌនៃយុទ្ធសាស្ត្ ឥណ្ឌូប៉ាស៊ីហ្វិក ដែលយើងយកចិត្តទុកដាក់ជាបញ្ហាថ្នាក់ជាតិ ដែលអនុលោមទៅតាមយុទ្ធសាស្ត្ររបស់អាស៊ានដែរ។»។
ក្រៅពីរម្លឹក និងបង្ហាញអំពីការគាំទ្ររបស់រដ្ឋាភិបាលបារាំងក្នុងការជួយអភិវឌ្ឍន៍កម្ពុជាលើវិស័យមួយចំនួនដូចជា ទឹក ថាមពល ទេសចណ៍ ការដឹកជញ្ជូន ហើយនោះ លោក ម៉ាក្រុង បានអត្ថាធិប្បាយផ្តល់ការកោតសរសើរជាពិសេសដល់កម្ពុជា ចំពោះការប្តេជ្ញាចិត្តរបស់ខ្លួនក្នុងការប្រយុទ្ធប្រឆាំងការប្រែប្រួលអាកាសធាតុ។
លោកប្រធានាធិបតី ម៉ាក្រុង ថ្លែងយ៉ាងដូច្នេះ៖«ខ្ញុំនឹងមានចន្លោះប្រហោង បើសិនជាខ្ញុំមិនបានស្វាគមន៍មហិច្ឆតាកម្ពុជាទាក់ទងនឹងបញ្ហាអាកាសធាតុដែលមានគោលបំណងអព្យាក្រឹតកាបូនដល់ឆ្នាំ ២០៥០។ នេះជាគំរូដ៏គួរឱ្យកត់សម្កាល់របស់ប្រទេសមួយក្នុងការចាត់ចែងការអភិវឌ្ឍដ៏លឿន ដោយគិតគូរពីគោលនយោបាយថាមពលដ៏ល្អអស្ចារ្យ។»។
សម្តេចនាយករដ្ឋមន្ត្រី ហ៊ុន សែន វិញ បានថ្លែងសេចក្តីអរគុណចំពោះប្រទេសបារាំងដែលបានចូលរួមចំណែកយ៉ាងសំខាន់នៅក្នុងដំណើរការកសាងសន្តិភាព និងការអភិវឌ្ឍប្រទេសកម្ពុជារហូតដល់បច្ចុប្បន្ន។ ប្រមុខរដ្ឋាភិបាលកម្ពុជាក៏បានអរគុណលោកប្រធានាធិបតីផងដែរ ដែលរដ្ឋាភិបាលបានទទួលប្រជាជនខ្មែរដែលបានរត់ភៀសខ្លួនពីសង្គ្រាម និងពីរបបប្រល័យពូជសាសន៍ប៉ុលពត។
ដើម្បីបង្ហាញអំពីការពង្រឹងមិត្តភាពរវាងប្រទេសទាំងពីរដែលមានទំនាក់ទំនងជាប្រវត្តិសាស្ត្រហើយនោះ សម្តេចនាយករដ្ឋមន្ត្រី ហ៊ុន សែន បានបង្ហើបលោកប្រធានាធិបតីបារាំងអំពីការកសាងរូបសំណាកមិត្តភាពកម្ពុជាបារាំង នៅមុខស្ថានទូតបារាំងក្នុងរាជធានីភ្នំពេញ។
សម្តេច ហ៊ុន សែន បានរៀបរាប់យ៉ាងដូច្នេះ៖«មានរឿងមួយដែលខ្ញុំគួរតែនិយាយប្រាប់អ្នកទាំងអស់គ្នានៅទីនេះ ទាក់ទងនឹងការរកឃើញថ្មីៗ និងជាការគួរឱ្យភ្ញាក់ផ្អើលសម្រាប់ខ្ញុំ។ ៣ថ្ងៃ មុនខ្ញុំមកដល់ទីនេះ [យើងបានរកឃើញ] មានរូបសំណាកមួយដែលត្រូវបានសាងសង់ក្នុងឆ្នាំ ១៩២៥ ហើយត្រូវបានខ្មែរក្រហមវ៉ៃកម្ទេចចោលក្នុងឆ្នាំ ១៩៧៧។ ខ្ញុំបានយល់ព្រមជាមួយរដ្ឋមន្ត្រីក្រសួងដែនដីនគរូបនីយកម្មរួចហើយ យើងនឹងកសាងរូបសំណាកនេះឡើងវិញ ដែលជានិមិត្តរូបនៃការសាមគ្គីភាពរវាងបារាំង និងកម្ពុជា ហើយដាក់នៅទល់មុខស្ថានទូតបារាំងតែម្ដង។ សង្ឃឹមថា លោកប្រធានាធិបតី មិនជំទាស់នឹងគម្រោងនេះទេ។»។
បើតាមសម្តេចនាយករដ្ឋមន្ត្រី ហ៊ុន សែន ប្រមុខរដ្ឋាភិបាលទាំងពីរក៏នឹងជជែកអំពីការកំណត់កាលបរិច្ឆេទនៃការរៀបចំប្រារព្ធខួបទី៧០នៃទំនាក់ទំនងការទូតរវាងភ្នំពេញ និងប៉ារីសផងដែរ៕
© រក្សាសិទ្ធិដោយ thmeythmey.com
