ក្នុងកិច្ចសម្ភាសជាមួយសារព័ត៌មានថ្មីៗ តាមទូរស័ព្ទ នៅព្រឹកថ្ងៃទី១៩ ខែធ្នូ លោក មាស វីរិទ្ធ លើកហេតុផលធំ១ ក្នុងចំណោមហេតុផលធំៗដទៃទៀតថា គ្រឿងញៀន បន្តហូរចូលកម្ពុជា ដោយសារចរន្តទីផ្សារគ្រឿងញៀនលើពិភពលោក នៅតែបន្តកើនឡើង។ លោក អះអាងដូច្នេះថា៖«ភាគច្រើន [នៃគ្រឿងញៀន ដែលយើងចាប់បាន] គឺមានទិសដៅនាំចេញទៅប្រទេសទី៣»។ 
 

យ៉ាងណាក៏ដោយ លោកអគ្គលេខាធិការរូបនេះ មិនអាចបញ្ជាក់បាននោះទេថា ប្រទេសទី៣ ដែលឧក្រិដ្ឋជន តែងនាំចេញគ្រឿងញៀនចេញពីកម្ពុជាទៅច្រើនជាងគេនោះ គឺជាប្រទេសមួយណា។ លោក លើកឡើងថា បច្ចុប្បន្ន អាជ្ញាធរកម្ពុជា កំពុងសិក្សាស្រាវជ្រាវ និងផ្លាស់ប្តូរព័ត៌មានជាមួយប្រទេសជិតខាង ដើម្បីទទួលបានព័ត៌មានលម្អិតអំពីករណីនាំចូលនិងនាំចេញគ្រឿងញៀនពីកម្ពុជា។ 
 

សមត្ថកិច្ច ទើបនឹងចាប់បានគ្រឿងញឿនជិត៩០០គីឡូក្រាម ក្នុងខេត្តព្រះសីហនុ នៅពាក់កណ្តាលខែធ្នូ ឆ្នាំ២០២២នេះ។ ករណីនេះ អាចចាត់ទុកជាករណីបង្ក្រាបគ្រឿងញឿនដ៏ធំចុងក្រោយ នៅជិតដំណាច់ឆ្នាំ២០២២នេះ។ 
 

ជាការកត់សម្គាល់ មេខ្លោងគ្រឿងញៀនធំៗ គឺជាជនបរទេស ដោយក្នុងនោះ ភាគច្រើន គឺជាជនជាតិចិនដីគោក​និងចិនតៃវ៉ាន់។ ជាក់ស្តែង មុខសញ្ញាជនសង្ស័យ ដែលពាក់នឹងគ្រឿងញៀនជិត៩០០គីឡូក្រាមខាងលើ គឺភាគច្រើនជាជនជាតិចិនដីគោក និងជាចិនតៃវ៉ាន់។ 
 

យោងតាមរបាយការណ៍ ក្នុងឆ្នាំ២០២១ សមត្ថកិច្ចកម្ពុជា ចាប់បានគ្រឿងញៀនជាង៤,៥តោន ឯកាលពីឆ្នាំ២០២០ គ្រឿងញៀនប្រមាណ៣តោន ត្រូវរឹបអូសបាន៕