អន្តរជាតិ
ប្រធានាធិបតីអែលសាវ៉ាឌ័រ បន្តសង្គ្រាមប្រឆាំងក្មេងទំនើងដែលបង្កហិង្សានៅតាមមូលដ្ឋាន
25, Dec 2022 , 8:29 pm
ប្រតិបត្តិការបង្ក្រាបក្រុមយុវជនទំនើងកន្លងមកនៅអែលសាវ៉ាឌ័រ។ រូបថត EPA
×![]()
ដោយ: ធីតា
ទាហាន និងប៉ូលិសជាង១០០០នាក់នៅប្រទេសអែលសាវ៉ាឌ័រ បានរួមគ្នា កាលពីថ្ងៃសៅរ៍កន្លងមក លើប្រតិបត្តិការបង្ក្រាបក្រុមក្មេងទំនើងនៅក្នុងសង្កាត់មួយ។ នេះជាការអនុវត្តតាមបញ្ជារបស់លោកប្រធានាធិបតី Nayib Bukele ដើម្បីទប់ស្កាត់អំពើហិង្សាដែលតែងតែបង្កដោយក្រុមក្មេងពាល។
«ទាហានជាង១០០០នាក់ និងប៉ូលិស១៣០នាក់ ត្រូវចេញបង្ក្រាបអំពើឧក្រិដ្ឋកម្មនៅសង្កាត់ Tutunichapa យ៉ាងសកម្មបំផុត»។ លោក Nayib បានសរសេរយ៉ាងដូច្នេះនៅលើបណ្តាញសង្គម Twitter របស់ខ្លួន។ សង្កាត់ដែលស្ថិតនៅក្នុងក្រុង San Salvador មួយនេះ ត្រូវបានគេស្គាត់ថា ជាតំបន់ចរាចរណ៍គ្រឿងញៀនដ៏ល្បីល្បាញបំផុតមួយ។
កាលពីថ្ងៃទី៣ ខែធ្នូ កន្លងមក កងកម្លាំងប្រដាប់អាវុធអែលសាវ៉ាទ័រជិត១ម៉ឺននាក់ ត្រូវបានពង្រាយនៅក្រុង Soyapango ដោយនៅពេលនោះ សមាជិកក្រុមទំនើងប្រមាណ៥០០នាក់ ក៏ត្រូវបានចាប់ខ្លួនផងដែរ។ នេះបើតាមរបាយការណ៍រដ្ឋាភិបាលអែលសាវ៉ាឌ័រ។
ប្រតិបត្តិការបង្ក្រាបក្មេងទំនើងនៅ Tutunichapa ចាប់ផ្តើមកាលពីថ្ងៃសៅរ៍ ហើយបន្តរយៈពេល១ខែ។ តម្រុយនេះនៃប្រតិបត្តិការនេះ កើតឡើង បន្ទាប់ពីអាជ្ញាធរឃាត់ខ្លួនមនុស្សចំនួន៦នាក់ដំបូង ពាក់ព័ន្ធនឹងការជួញដូរគ្រឿងញៀន។
លោកប្រធានាធិបតីអែលសាវ៉ាឌ័រ បានបញ្ជាក់លើ Twitter ដដែលថា៖ «ក្រុមភេវរជន, ក្រុមអ្នកជួញដូរគ្រឿងញៀន និងសមាជិកក្រុមក្មេងពាលទាំងអស់ នឹងត្រូវយកចេញពីសង្កាត់នេះ។ ពលរដ្ឋស្មោះត្រង់ មិនត្រូវមានអ្វីដែលគួរឲ្យភ័យខ្លាចនោះឡើយ ដោយពួកគេអាចបន្តសកម្មភាពធម្មតា»។
កាលពីថ្ងៃទី២៧ ខែមិនា មេដឹកនាំតំបន់អាម៉េរិកកណ្តាលមួយនេះ ស្នើសភាចេញអនុម័តលើការប្រកាសដាក់ប្រទេសក្នុងស្ថានភាពអាសន្ន ដើម្បីបង្ក្រាបក្រុមក្មេងទំនើងដែលតែងតែបង្កហិង្សា។ សង្គ្រាមនេះ បានឈានដល់ការចាប់ខ្លនមនុស្សជាង៦ម៉ឺននាក់ផងដែរ។
ទោះបីជាយ៉ាងណាក៏ដោយ ប្រតិបត្តិការនេះ ក៏នាំឲ្យមានចលនាបាតុកម្មទាមទារការដោះលែងឪពុកម្តាយ និងមនុស្សផ្សេងទៀតផងដែរ ដោយក្រុមអ្នកតវ៉ាអះអាងថា អ្នកទាំងនោះ មិនជាប់ពាក់ព័ន្ធនឹងសកម្មភាពក្រុមក្មេងទំនើងនោះឡើយ៕
Tag:
ក្មេងទំនើង
អែលសាវ៉ាឌ័រ
© រក្សាសិទ្ធិដោយ thmeythmey.com
