ជាយូរមកហើយ ជនភាគតិចរ៉ូហ៊ីងយ៉ា រងការបៀតបៀនដោយអាជ្ញាធរមីយ៉ាន់ម៉ាដែលបង្ខំឱ្យពួកគេរត់​ទៅប្រទេសជិតខាងរួមមានថៃ បង់ក្លាដែស ឬទៅដល់ម៉ាឡេស៊ី និងឥណ្ឌូណេស៊ីជាដើម។ ជនភាគតិចរ៉ូហ៊ីងយ៉ាបប្រមាណ១លាននាក់កំពុងរស់ក្នុងជំរំនៅបង់ក្លាដែស។ 

 

ជាមួយស្ថានភាពលំបាកក្នុងជំរំភៀសខ្លួន ក្រុមសិទ្ធិមនុស្សក៏រាយការណ៍ពីការចាកចេញជាបន្តបន្ទាប់ដោយមាន៥០០នាក់កាលពីឆ្នាំ២០២១​ ហើយឡើងដល់ប្រហែល២,៤០០នាក់ក្នុងឆ្នាំ២០២២។ សកម្មជនសិទ្ធិមនុស្សអះអាងថា ការលុបចោលវិធានការទប់ស្កាត់ជំងឺកូវីដ-១៩ អាចជាកត្តាមួយ។

 

ថ្លែងក្នុងសេចក្ដីថ្លែងការណ៍មួយ UNHCR បានលើកឡើងថា ជនភាគតិចរ៉ូហ៊ីងយ៉ាប្រមាណ៥០០នាក់​បានទៅដល់ឥណ្ឌូណេស៊ីក្នុង៦សប្ដាហ៍ចុងក្រោយនេះខណៈដែលប្រទេសផ្សេងៗមិនបានជួយជ្រោ​ម​ជ្រែងនោះឡើយទោះបីមានការអង្វរអំពាវនាវក្ដី។ UNHCR បញ្ជាក់ថា  ឆ្នាំ ២០២២ ជាឆ្នាំដែល​ជន​ភាគ​តិចមួយក្រុមនេះរងគ្រោះច្រើនបំផុត។ នៅដើមខែធ្នូ ទូកដែលបានដឹកមនុស្ស១៨០នាក់​បា​ន​លិច ហើយមនុស្សទាំងអស់នោះត្រូវបានសន្និដ្ឋានថាស្លាប់។
 

ស្របពេលជាមួយគ្នានេះ មន្ត្រីទីភ្នាក់ងារគ្រោះមហន្តរាយក្នុងតំបន់ឥណ្ឌូណេស៊ីលើកឡើងថា មាន​ទូក​មួយទៅដល់ឆ្នេរក្នុងខេត្ត Aceh នៅថ្ងៃទី២៦ ខែធ្នូ ជាមួយជនភាគតិចរ៉ូហ៊ីងយ៉ាចំនួន១៧៤ នាក់។ ពួកគេខ្សោះជាតិទឹក អស់កម្លាំង និងត្រូវការការថែទាំសុខភាពជា​បន្ទាន់​ក្រោយ​បា​ន​ធ្វើ​ដំណើរ​ឆ្លង​សមុទ្រ​រាប់សិបសប្ដាហ៍។ អ្នករួចផុតពីសេចក្ដីស្លាប់មួយចំនួនបានរៀបរាប់ប្រាប់ពីសេចក្ដីស្រែកឃ្លាន និងការ​អស់សង្ឃឹម។ អ្នកធ្វើដំណើរ២០នាក់បានស្លាប់អំឡុងពេលធ្វើដំណើរ៤០ថ្ងៃពីបង់ក្លាដែសទៅ​ទឹកដីឥណ្ឌូណេស៊ី៕