ជាតិ
យុវជនសកម្ម សេវាល្អ
ពោធិ៍សាត់៖ សាលាឃុំអន្សាចំបក់មិនទាន់មានជម្រាល តែមន្រ្តីតាំងចិត្តបម្រើសេវាដល់អ្នកមានពិការភាពឱ្យល្អ 30, Dec 2022 , 7:59 am
×
ដោយ៖ ឡំ សេងហុង (យុវជនអន្សាចំបក់)
ស្រុកក្រគរ, ពោធិ៍សាត់ ៖ អគាររដ្ឋបាលឃុំអន្សាចំបក់ពុំទាន់មានជម្រាលឡើងចុះសម្រាប់ពលរដ្ឋមានពិការភាពនោះទេ ដែលការណ៍នេះ បានបង្កការលំបាកខ្លះដែរដល់អ្នកមានជនពិការភាព នៅពេលពួកគេ មកទទួលសេវាសាធារណៈនៅសាលាឃុំ។ លោក ផាន់ សំបូរ មេឃុំអន្សាចំបក់ដែលស្ថិតក្នុងស្រុកក្រគរ ខេត្តពោធិ៍សាត់ បញ្ជាក់ថា ឃុំមិនមានលទ្ធភាពសង់ជម្រាលនេះទេព្រោះថវិកាចំណាយប្រចាំឆ្នាំក្នុងឃុំមានកំណត់។ «យើងមានផែនការធ្វើជម្រាលជនពិការហើយតែយើងជួបបញ្ហាខ្វះខាតថវិកា។ ឥឡូវនេះ មិនសូវមានជនពិការមកទទទួលសេវាដែរទេប៉ុន្តែបើសិន ពួកគេ(ជនពិការ)មក យើងផ្ដល់ឱ្យគាត់មុនគេ ហើយកម្រៃសេវា បើសិនវាតិចតួចយើងអាចជួយគាត់បានយើងនឹងជួយ»។ លោក សំបូរ បញ្ជាក់ដូច្នេះ។
ឃុំអន្សាចំបក់ នៅក្នុងស្រុកក្រគរខេត្តពោធិ៍សាត់ មានពលរដ្ឋរស់នៅប្រមាណ ១ម៉ឺននាក់ ក្នុងនោះជនពិការមាន ១២៣នាក់ដែលភាគច្រើនពិការដៃ ជើង និងភ្នែក។ សព្វថ្ងៃ មានពលរដ្ឋពិការតិចតួចប៉ុណ្ណោះ ពោលគឺរង្វង់៣ទៅ៤នាក់ ក្នុងមួយខែ ដែលមកទទួលសេវាសាធារណៈ នៅសាលាឃុំ។
បើតាមលោកមេឃុំអន្សាចំបក់ ប្រសិនបើនៅអគាររដ្ឋបាលឃុំ មានជម្រាលសម្រាប់ពលរដ្ឋមានពិការភាព នោះនឹងផ្តល់ភាពងាយស្រួល ក្នុងការធ្វើដំណើរ ដោយខ្លួនឯង ទៅរកសេវានៅសាលាឃុំ។ មេឃុំរូបនេះ បានអំពាវនាវដល់ រដ្ឋាភិបាល និងអង្កការនានា ជួយសង់ជម្រាលជនពិការ ២ កន្លែង ដែលនៅត្រង់ចំណុចមុខបន្ទប់ទឹក និងមុខសាលា។
ទោះជាយ៉ាងនេះក្តី មន្ត្រីឃុំ បានប្ដេជ្ញា បម្រើសេវាឱ្យកាន់តែប្រសើរបន្ថែមទៀត ដល់ពលរដ្ឋដែលមានពិការភាព។ លើសពីនេះ លោក ផាន់ សំបូរ ក៏បានលើកទឹកចិត្តដល់ពលរដ្ឋដែលមានពិការភាព ឱ្យមកទទួលសេវារដ្ឋបាល តាមតម្រូវការ ហើយពួកគាត់នឹងទទួលបានការផ្តល់អាទិភាពក្នុងការទទួលសេវាមុនគេ ហើយមិនបង់កម្រៃទៀតផង៕
(អត្ថបទនេះ គឺជាស្នាដៃរបស់ក្រុមយុវជន និងត្រូវបានរៀបរៀងឡើង ក្រោមជំនួយហិរញ្ញវត្ថុរបស់សហភាពអឺរ៉ុប និងទីភ្នាក់ងារសហប្រតិបត្តិការអភិវឌ្ឍអន្តរជាតិស៊ុយអ៊ែត តាមរយៈអង្គការតម្លាភាពកម្ពុជា និងអង្គការអាក់សិនអេតកម្ពុជា។ រាល់ខ្លឹមសារនៅក្នុងអត្ថបទនេះ គឺជាការទទួលខុសត្រូវរបស់ស្មេរ ឬផលិតករ ហើយមិនឆ្លុះបញ្ចាំងអំពីទស្សនៈរបស់សហភាពអឺរ៉ុប និងទីភ្នាក់ងារសហប្រតិបត្តិការ អភិវឌ្ឍអន្តរជាតិស៊ុយអ៊ែតនោះទេ)
Tag:
ជម្រាលជនពិការ
ឃុំអន្សាចំបក់
ពោធិ៍សាត់
© រក្សាសិទ្ធិដោយ thmeythmey.com