ត្រីប្រហុក ចាប់ផ្ដើមសម្បូរ ឬដល់រដូវត្រីត្រូវ ចាប់ពីថ្ងៃទី២៩ ខែធ្នូ ឆ្នាំ២០២២ ដល់ថ្ងៃទី០៣ ខែមករា ឆ្នាំ២០២៣។ បើតាមរដ្ឋជលផល ត្រីត្រូវខ្លាំងនៅដាយត្រីតាមដងទន្លេសាប នៅភូមិសាស្ត្រខេត្តកណ្ដាល និងរាជធានីភ្នំពេញ។

 

បើតាមកសេចក្ដីជូនដំណឹងពីរដ្ឋបាលជលផល «ត្រីត្រូវ» ចាប់ផ្ដើមត្រូវ ដោយសារត្រីចាប់ផ្ដើមបន្លាស់ទីចេញពីបឹងទន្លេសាប បឹង ស្ទឹង និងព្រែកនានា ចូលទៅទន្លេសាប ទន្លេមេគង្គ និងទន្លេបាសាក់។ ប៉ុន្តែត្រីសម្បូរនេះ គឺអាស្រ័យនឹងអាកាសធាតុអំណោយផលផងដែរ ពោលគឺក្នុងករណីមេឃស្រឡះល្អ គ្មានភ្លៀងកក់ខេ ឬមិនទទួលរងឥទ្ធិពលភ្លៀង។

 

រដ្ឋមន្រ្តីកសិកម្ម វាយតម្លៃថា ត្រីឆ្នាំនេះត្រូវច្រើនខ្លាំង ដោយសារប្រសិទ្ធភាពនៃការទប់ស្កាត់បទល្មើសក្នុងបឹងទន្លេសាប កាលពីរដូវត្រីពងកន្លងមក ។  

 

លោក ឌិត ទីណា បានបញ្ជាក់ថា៖ «ខ្ញុំជឿជាក់ថា ត្រីធម្មជាតិរបស់យើងនៅមានលទ្ធភាពកកើតនិងរីកធំធាត់ឡើងកាន់តែច្រើន បើយើងនៅតែបន្តរក្សាបាននូវជំរកត្រីពងតាមព្រៃលិចទឹកទាំងឡាយ និងបែងចែកឲ្យមានរដូវនេសាទសមល្មមផ្តល់ពេលវេលាឱ្យមច្ឆាជាតិទាំងឡាយ អាចរីកលូតលាស់បន្តពូជពង្ស។ តុល្យភាពរវាងការអភិរក្ស និងផលិតកម្ម ជាគន្លឹះនៃនិរន្តរភាព»។ 
 

លោក ឌិត ទីណា អំពាវនាវឱ្យអ្នកនេសាទទាំងអស់បន្តគោរពច្បាប់នេសាទ ដើម្បីរក្សាធនធាននេះឱ្យបានយូរអង្វែង។ អ្នកប្រព្រឹត្តល្មើស នឹងប្រឈមទោសទណ្ឌយ៉ាងតឹងតែង៕