នាយប៉ុស្តិ៍នគរបាលអន្សាចំបក់ លោក ថេត សុវត្ថធី បានលើកឡើងថា ពីមួយឆ្នាំ ទៅមួយឆ្នាំ បទល្មើសហិង្សាក្នុងគ្រួសារ បានថយចុះជាលំដាប់ ក្រោយលោក និងអាជ្ញាធរ ភូមិ ឃុំ សហការគ្នា​ អនុវត្តវិធានការតឹងរឹង។ ជានិច្ចកាល លោកបានជំរុញការផ្សព្វផ្សាយ «លុបបំបាត់អំពើហិង្សាក្នុងគ្រួសារ» ដល់ពលរដ្ឋ ជាពិសេសសម្របសម្រួលឱ្យពួកគេ ដោះស្រាយទំ​នាស់ក្រៅប្រព័ន្ធតុលាការ។ 

 

លោក ថេត សុវត្ថធី ប្រាប់ដូច្នេះថា៖«ពាក្យថា អំពើហិង្សាហ្នឹង វាបានចែកក្នុងច្បាប់រួចស្រេចហើយ។ អ៊ីចឹងយើងយកតែច្បាប់ ទៅពន្យល់គាត់ ហើយយើងតែងណែនាំគាត់ថា ការឈ្លោះវាមិនចំណេញនោះទេ។ ករណីហិង្សានេះ យើងអាចសម្របសម្រួលក្នុងប៉ុស្តិ៍ហ្នឹង បានរហូតដល់ ៩៩ ភាគរយឯណោះ មានន័យថា យើងដោះស្រាយក្រៅប្រព័ន្ធ ព្រោះយើងអត់ចង់ឱ្យវែងឆ្ងាយដល់ តុលាការអីនោះទេ»។ 

 

អំពើហិង្សាក្នុងគ្រួសារ គឺជាជម្លោះ ឬការបំពាន ដែលកើតចេញរវាងមនុស្សពីរនាក់ ដែលមានទំនាក់ទំទងជិតស្និទ្ធ ដូចជាប្ដីប្រពន្ធ ឪពុកម្ដាយ និងកូននៅក្នុងបន្ទុកគ្រួសារជាដើម។ អំពើហិង្សាក្នុងគ្រួសារ កើតឡើងដោយសារ ការប្រើប្រាស់គ្រឿងស្រវឹង សារធាតុញៀន ឬមកពីកម្រិតនៃការអប់រំទាបជាដើម ដែលធ្វើឱ្យប៉ះពាល់យ៉ាងខ្លាំងដល់ ស្រ្តី កុមារ សង្គមជាតិ និងសេដ្ឋកិច្ចគ្រួសារ។

 

លោក ថេត សុវត្ថធី បានត្អូញត្អែរថា នៅពេលចុះទៅបង្រ្កាបបទល្មើសហិង្សាក្នុងគ្រួសារ តែងតែជួបការលំបាក ដោយសារជនបង្កមួយចំនួនតូច អាចបង្ករបួសស្នាមដល់សមត្ថកិច្ច។ ថ្វីដ្បិត ជាមួយការលំបាក ប៉ុន្តែនាយប៉ុស្តិ៍រូបនេះ តាំងចិត្តណែនាំ និងដាក់វិធានការតឹងរឹង ដើម្បីធ្វើយ៉ាងណាលុបបំបាត់ អំពើហិង្សាក្នុងសហគមន៍។