ជាតិ
នយោបាយជាតិ
ថ្ងៃ៧មករា៖ សម្ដេច ហ៊ុន សែន បន្តប្រកាសកម្ចាត់ក្រុមអ្នកនយោបាយជ្រុលនិយម 07, Jan 2023 , 10:50 am
× សម្ដេចនាយករដ្ឋមន្ត្រី ហ៊ុន សែន ដែលជាប្រធានគណបក្សប្រជាជនកម្ពុជាបានប្ដេជ្ញាកម្ចាត់ក្រុមអ្នកនយោបាយដែលសម្ដេចហៅថា ជាក្រុមជ្រុលនិយម និងដែលអាចបង្កឱ្យមានការបែកបាក់ជាតិ។ សម្ដេច ហ៊ុន សែន បានប្រកាសសារនយោបាយនេះនៅក្នុងទិវា៧មករាឆ្នាំ២០២៣នេះ ដែលត្រូវបានរៀបចំនៅលើទីធ្លាកោះពេជ្រ។
សម្តេចប្រធានគណបក្សប្រជាជនកម្ពុជាបានថ្លែងយ៉ាងដូច្នេះ៖«ខ្ញុំសូមគូសបញ្ជាក់ថាជូនជនរួមជាតិថា យើងត្រូវកម្ចាត់នយោបាយជ្រុលនិយមរបស់ទណ្ឌិតក្បត់ជាតិ និងបក្សពួកដែលកំពុងគេចខ្លួនរស់នៅក្រៅប្រទេសឱ្យអស់ពីសង្គមជាតិយើង។ [យើង] មិនត្រូវទុកឱ្យវាបន្តបំពុលសង្គម បំផ្លាញដំណើររីកចម្រើន និងបង្កការបែកបាក់ជាតិ ដែលនឹងនាំដល់គ្រោះមហន្តរាយជាថ្មីទៀតសម្រាប់ប្រជាជាតិយើង។»។
សម្តេចនាយករដ្ឋមន្ត្រីក៏បានអំពាវនាវដល់បុគ្គល និងក្រុមអ្នកនយោបាយណាដែលពាក់ព័ន្ធនឹងអ្នកនយោបាយជ្រុលនិយមក្បត់ជាតិ ត្រូវកែប្រែខ្លួន ដើម្បីចៀសផុតពីវិធានការច្បាប់។
បើតាមប្រសាសន៍របស់សម្ដេច ហ៊ុន សែន ការប្ដេជ្ញានេះត្រូវបានធ្វើឡើងដើម្បីធានារក្សាសន្តិភាព សមិទ្ធផលដែលរដ្ឋាភិរបស់លោកបានដឹកនាំកសាងក្នុងអំឡុងពេល៤៤ឆ្នាំកន្លងមកហើយ និងដើម្បីធានាថា «គ្មានការកើតជាថ្មីនូវសង្គ្រាមបែកបាក់ជាតិ និងអំពើប្រល័យពូជសាសន៍ដូចពីអតីតកាល»។
សម្ដេចនាយករដ្ឋមន្ត្រីបានពន្យល់យ៉ាងដូច្នេះ៖«យើងគប្បីចងចាំថា គឺកត្តាផ្ទៃក្នុងរបស់ជាតិ ដែលជាកត្តាកំណត់នៃជ័យជម្នះ រីឯកត្តាខាងក្រៅគ្រាន់តែជាកត្តាជះឥទ្ធិពលប៉ុណ្ណោះ។ ក្នុងន័យនេះ ប្រជាជាតិមួយដែលមានឯកភាពជាតិ ប្ដូរផ្ដាច់ការពារឯករាជ្យ សេរីភាពរបស់ខ្លួន មិនអាចត្រូវអនុភាពខាងក្រៅណាធ្វើឱ្យបរាជ័យបានឡើយ។»។
នៅក្នុងសុន្ទរកថា សម្ដេច ហ៊ុន សែន បានរម្លឹកឡើងវិញពីព្រឹត្តិការណ៍រដ្ឋប្រហារ១៨ខែមីនាឆ្នាំ១៩៧០របស់សេនាប្រមុខ លន់ នល់ ដែលសម្ដេចចាត់ទុកថា ជាចំណុចចាប់ផ្តើមដែលនាំកម្ពុជាធ្លាក់ក្នុងភ្នក់ភ្លើងសង្គ្រាមផ្ទៃក្នុង រហូតបង្កឱ្យមានរបបប៉ុល ពត ដែលសម្លាប់ពលរដ្ឋខ្មែរជាង៣លាននាក់យ៉ាងអយុត្តិធម៌៕
© រក្សាសិទ្ធិដោយ thmeythmey.com