FFF បានប្រកាសពីការបន្តកិច្ចសន្យារបស់គ្រូបង្វឹកលោក Didier Deschamps កាលពីសប្តាហ៍មុន បន្ទាប់ពីលោក Deschamps បានដឹកនាំក្រុមមាន់គកបារាំងទៅកាន់វគ្គផ្តាច់ព្រ័ត្រ World Cup ជាលើកទីពីរ បើទោះបានត្រឹមរងជើងឯកក្រោយចាញ់អាហ្សង់ទីននៅវគ្គផ្តាច់ព្រ័ត្រនៅកាតា។ មុនបន្តកិច្ចសន្យានេះ លោក Zidane ត្រូវបានគេឡើងឡើងថាទំនងអាចក្លាយជាគ្រូបារាំង​​ស្នង​តំណែង Deschamps។
 

នៅពេលសួរថាតើ Zidane ដែលជួយបារាំងលើកពាន World Cup ឆ្នាំ ១៩៩៨ អាចជំនួស Deschamps វិញទេ លោក Le Graet ប្រធាន FFF បានឆ្លើយដោយបង្ហាញពីការមិនពេញចិត្តសម្រាប់ជម្រើសថ្មីជា Zidane ឡើយ។
 

ប្រធាន FFF ប្រាប់កាសែត RMC ថា៖«ខ្ញុំដឹងច្បាស់ថា Zidane តែងតែស្ថិតក្នុងជម្រើសរបស់ក្រុមបារាំង។ គាត់មានអ្នកគាំទ្រច្រើន អ្នកខ្លះកំពុងរង់ចាំការចាកចេញរបស់ Deschamps... ប៉ុន្តែពេលនេះគ្មានអ្នកណាសមជាង Deschamps ទេ?»។
 

អ្វីដែលគួរភ្ញាក់ផ្អើល លោក Le Graet បន្ថែមថា បើ Zidane ព្យាយាមខលទូរសព្ទមកខ្លួន ដើម្បីនិយាយរឿងតំណែងគ្រូបារាំង លោកនឹងមិនលើកទូរសព្ទឡើយ។
 

ការលើកឡើងរបស់លោក Graet​ ទៅកាន់ Zidane បែបនេះ បានធ្វើឱ្យ Mbappe ខ្សែប្រយុទ្ធបារាំង មិនពេញចិត្តឡើយ។ សមាជិកក្រុម Paris Saint-Germain រូបនេះ បានបង្ហោះលើបណ្តាញសង្គម Twitter ថា លោក Zidane ជាវិរបុរសរបស់បារាំងម្នាក់ដែរ មិនគួរលោក Le Graet និយាយមិនឱ្យតម្លៃបែបនេះទេ។
 

មិនត្រឹមតែ Mbappe ឡើយ រដ្ឋមន្ត្រីក្រសួងកីឡាបារាំងអ្នកស្រី Amelie Oudea-Castera ក៏ប្រតិកម្មនឹងការអត្ថាធិប្បាយរបស់ Le Graet ដែរ។ អ្នកស្រីនិយាយថា ប្រធានសហព័ន្ធកីឡាបាល់ទាត់ដ៏ធំបំផុតរបស់បារាំងមិនសមនិយាយពាក្យនេះទេ៕