នាហេតុការណ៍ដ៏គួរឱ្យភ័យខ្លាចនោះ កីឡាករក្រុម Melbourne City អ្នកចាំទី Tom Glover បានចាកចេញពីទីលានដោយនៅលើផ្ទៃមុខពោរពេញដោយឈាម បន្ទាប់ពីត្រូវបានអ្នកគាំទ្រខាងក្រុម Melbourne Victory យកធុងដែកគប់ចំនៅពេលដែលពួកគេបានរត់ចូលអុកលុកក្នុងទីលាននាកីឡដ្ឋាន Rectangular។ ជាលទ្ធផលការប្រកួតរវាងក្រុមក្នុងទីក្រុងតែមួយដូចគ្នាត្រូវបានអាជ្ញាកណ្តាលសម្រេចផ្អាកមិនបន្តការប្រកួតតែម្តង។
 

ក្រោយហេតុការណ៍ដ៏អាក្រក់នេះ ស្ថាប័នបាល់ទាត់កំពូលអូស្ត្រាលី FA បានដាក់ទណ្ឌកម្មយ៉ាងធ្ងន់ធ្ងរចំពោះក្លិប Melbourne Victory ដោយត្រូវកាត់ ១០ពិន្ទុទាំងរដូវកាលនេះ និង៣រដូវកាលបន្ទាប់ទៀត ក្រោមមូលហេតុនៃការប្រព្រឹត្តិខុសរបស់អ្នកគាំទ្រ។ 
 

មិនត្រឹមតែប៉ុណ្ណោះ ក្រុម Melbourne Victory ក៏ត្រូវបានហាមឃាត់ចំពោះការលក់សំបុត្រចូលទស្សនាសម្រាប់ទីកន្លែងអង្គុយដែលអ្នកគាំទ្របានរត់ចូលទីលានពីទីតាំងអង្គុយនោះ ហើយក៏ហាមឃាត់អ្នកគាំទ្រមិនឱ្យទៅទស្សនាការប្រកួតក្រៅទឹកដីផងដែររហូតចប់រដូវកាល។ ចំពោះការដាក់ទណ្ឌកម្មដូចខាងលើនេះ​ FA ក៏បានគណនាបន្ថែមដែលថាការដាក់ទណ្ឌកម្មទាំងនេះនឹងធ្វើឱ្យក្លិបខាតបង់ប្រាក់បន្ថែមប្រមាណ ១០០,០០០ដុល្លារអូស្ត្រាលី។
 

បើតាមលោក ​James Johnson ប្រធាន FA នេះជាហេតុការណ៍ដ៏អាក្រក់បំផុតមិនធ្លាប់មានសម្រាប់ការប្រកួតនៅប្រទេសអូស្ត្រាលីចាប់តាំងពីការបង្កើតលីគកំពូល A League ពីឆ្នាំ ២០០៤ មក។
 

«ការប្រកួតក្នុងទីលាននេះគឺជារឿងដ៏គួរឱ្យភ័យខ្លាច និងសុវត្ថិភាពសម្រាប់កីឡាករយើងជារឿងចាំបាច់និងសំខាន់បំផុត រួមទាំងក្រុមមន្រ្តីនៃការប្រកួត។ អ្នកដែលចូលអុកឡុកក្នុងទីលានដោយខុសច្បាប់ បានបង្កការខូចខាតសម្បត្តិក្នុងទីលាន និងបានប្រើអំពើហិង្សា និងពាក្យសម្តីមិនសមរម្យ រួមទាំងការបង្ករបួសដល់កីឡាករនិងមន្ត្រីការប្រកួត។ នេះជាទង្វើរដែលហួសព្រំដែន។[…]។»។ លោក Johnson បាននិយាយក្នុងសេចក្តីថ្លែងការណ៍របស់សហព័ន្ធ FA បែបនេះ។
 

ក្រៅពីការដាក់ទណ្ឌកម្មនិងពិន័យលើក្រុម Melbourne Victory អ្នកគាំទ្រចំនួន ១៧នាក់ដែលមិនត្រូវបានបញ្ជាក់អត្តសញ្ញាណ ដែលបានបង្កសកម្មភាពក្នុងហេតការណ៍នោះក៏ត្រូវបានសហព័ន្ធហាមឃាត់ពីវិស័យបាល់ទាត់ពេញមួយជីវិតផងដែរ។
 

ស្របគ្នាទៅនឹងការដាក់ទណ្ឌកម្មពីសំណាក់សហព័ន្ធ FA ក្នុងប្រទេសក្រុម Melbourne Victory បានចេញសេចក្តីថ្លែងការណ៍ទទួលស្គាល់កំហុសរបស់ខ្លួនដែលបង្កឡើងដោយអ្នកគាំទ្រ និងមិនដាក់ពាក្យប្តឹងឧទ្ធរណ៍ចំពោះការពិន័យនោះវិញទេ៕