សៀវភៅអេឡិចត្រូនិក មិនអាចជំនួសសៀវភៅធម្មតាបានឡើយ

ជាតិ

សៀវភៅអេឡិចត្រូនិក មិនអាចជំនួសសៀវភៅធម្មតាបានឡើយ

14, Jan 2023 , 5:59 pm

រូបភាព

ដោយ: ប៉ូ សាគុន

ភ្នំពេញ៖ សៀវភៅអេឡិចត្រូនិក មិនអាចជំនួសសៀវភៅធម្មតាបានឡើយ បើទោះបីជាសៀវភៅទាំងពីរប្រភេទនេះ មានចំណុចខ្សោយ និងចំណុចខ្លាំងរៀងខ្លួនក្ដី។ ប៉ុន្តែវត្តមានសៀវភៅអេឡិចត្រូនិក បាននឹងកំពុងជួយបង្រ្គប់ចំណុចខ្វះខាតរបស់សៀវភៅធម្មតា សម្រាប់បំពេញតម្រូវការអ្នកអាន។

ចុចទីនេះដើម្បីទទួលបានព័ត៌មានរហ័ស

លោក ហុក សុទ្ធិ ប្រធានអង្គការស៊ីប៉ា បានលើកឡើងថា សៀវភៅអេឡិចត្រូនិក មិនអាចជំនួសសៀវភៅធម្មតាបានឡើយ ប៉ុន្តែសៀវភៅទាំងពីរប្រភេទនេះ បានជួយបំពេញចំណុចខ្វះខាត ឱ្យគ្នាទៅវិញទៅមក។ លោកថាប្រសិនបើសៀវភៅអេឡិចត្រូនិក អាចជំនួសសៀវភៅធម្មតាបានមែន នោះសៀវភៅគោលរបស់ក្រសួងអប់រំ នឹងត្រូវឈប់បោះដែរ។

ប្រធានអង្គការស៊ីប៉ារូបនេះសង្កត់ធ្ងន់ ដោយលើកបទពិសោធផ្ទាល់ខ្លួន និងការសង្កេតជាទូទៅថា អ្វីដែលធ្វើឱ្យមនុស្សចេះពិតប្រាកដ គឺសៀវភៅសរសេរធម្មតា។ លោកថាសៀវភៅអេឡិចត្រូនិក គ្រាន់តែមកជួយបន្ថែមចំណុចខ្វះខាត របស់សៀវភៅធម្មតាប៉ុណ្ណោះ ដោយវាមិនធ្ងន់ និងមិនរឹងមាំ ដូចជាសៀវភៅសរសេរឡើយ។

«សៀវភៅអេឡិចត្រូនិក និងសៀវភៅធម្មតា ពួកវាបានជួយបង្រ្គប់គ្នា ប៉ុន្តែមិនអាចជំនួសគ្នាបានទេ។ ដូច្នេះសៀវភៅធម្មតាមិនបាត់ទេ។ ប្រហែលជាខួរក្បាលមនុស្ស ត្រូវបានបង្កើតឡើងមក ជាមួយនឹងឧបករណ៍ឬក៏អ្វីមួយ ដែលអាចចាប់កាន់បាន ប្រសើរជាងអ្វីដែលយើងមិនអាចចាប់កាន់បាន ពិសេសពាក់ព័ន្ធនឹងការរៀនសូត្រ។ ទៅមុខមានការវិវឌ្ឍយ៉ាងណាទៀតខ្ញុំមិនដឹងទេ ប៉ុន្តែបច្ចុប្បន្នសៀវភៅធម្មតាមិនអាចបាត់បង់ឡើយ»។ នេះជាការមើលឃើញរបស់លោក ហុក សុទ្ធិ។

លោក ហុក សុទ្ធិ ប្រធានអង្គការស៊ីប៉ា (Credit)

ទោះជាយ៉ាងណា លោក សុទ្ធិ បានសង្កេតពីចរន្តពិភពលោក ដែលធ្លាប់កើតមានកន្លងមក ឃើញថាសៀវភៅអេឡិចត្រូនិក ហាក់មានសន្ទុះខ្លាំង លុបការអានសៀវភៅធម្មតា នៅពេលដាក់ឱ្យប្រើប្រាស់ដំបូងៗ។ ប៉ុន្តែក្រោយមកប្រមាណ១០ទៅ២០ឆ្នាំ ចរន្តនោះប្រែទៅរកការអានសៀវភៅធម្មតាវិញ ដែលវាកើតឡើង ក្នុងប្រទេសអភិវឌ្ឍន៍ ដូចជាសហរដ្ឋអាមេរិក ប្រទេសនៅប៉ែកអ៊ឺរ៉ុប និងជប៉ុនជាដើម។

«តាមខ្ញុំចាំនៅដើមឆ្នាំ២០០០ជាង សៀវភៅអេឡិចត្រូនិក បានកើនដល់៦០ភាគរយ ហើយការប្រើប្រាស់សៀវភៅសរសេរ មានតែប្រហែល៤០ភាគរយទេ។ ឥឡូវនៅសហរដ្ឋអាមេរិក និន្នាការនោះដើរផ្ទុយវិញ បានន័យថាការលក់សៀវភៅអេឡិចត្រូនិកមានតែ៤០ភាគរយ ការប្រើប្រាស់សៀវភៅធម្មតាកើនដល់៦០ភាគរយវិញ។ ហើយនៅអ៊ឺរ៉ុបនិងជប៉ុន សៀវភៅអេឡិចត្រូនិក កើនដល់៦០ភាគរយដូចគ្នា ប៉ុន្តែបច្ចុប្បន្ននៅសល់តែ២០ភាគរយ ហើយសៀវភៅសរសេរកើនដល់៨០ភាគរយវិញ»។ នេះជាការស្រាវជ្រាវរបស់លោក ហុក សុទ្ធិ។

លោក គឹម ពិនន់ អនុរដ្ឋលេខាធិការក្រសួងវប្បធម៌ និងវិចិត្រសិល្បៈ ក៏យល់ស្របគំនិតខាងលើ ដែលថាសៀវភៅអេឡិចត្រូនិក មិនអាចជំនួសសៀវភៅធម្មតាបានដែរ។ លោកថាបើសៀវភៅអេឡិចត្រូនិក វាយលុកសៀវភៅធម្មតាខ្លាំងមែន នោះការបោះពុម្ពសៀវភៅធម្មតា ក៏មិនអាចបន្ត។ ទោះជាយ៉ាងណា លោកនៅតែជឿថា មនុស្សនៅតែមិនអាចខ្វះសៀវភៅធម្មតាបានឡើយ ព្រោះសៀវភៅអេឡិចត្រូនិក ក៏មានចំណុចខ្សោយ និងភាពអវិជ្ជមានដែរ។

លោក គឹម ពិនន់ អនុរដ្ឋលេខាធិការក្រសួងវប្បធម៌ និងវិចិត្រសិល្បៈ

«នៅពេលទូរសព្ទអស់ថ្ម ឬគ្មានអ៊ីធឺណិត ក៏យើងមិនអាចមើលសៀវភៅអេឡិចត្រូនិកបានដែរ។ ដូច្នេះកុំបារម្ភថាសៀវភៅធម្មតានិងបាត់បង់»។ នេះជាការពន្យល់បន្ថែមរបស់លោក គឹម ពិនន់។

អនុរដ្ឋលេខាធិការក្រសួងវប្បធម៌ និងវិចិត្រសិល្បៈ បានឆ្លៀតសរសើរគុណតម្លៃអក្សរសិល្ប៍ថា បានជួយបង្ហាញផ្លូវអ្នកវិទ្យាសាស្ត្រផងដែរ។ លោកបានស្រង់សម្ដីអ្នកប្រាជ្ញមួយរូប ដែលមិនបានបញ្ចេញឈ្មោះថា “អ្នកវិទ្យាសាស្ត្រ ដើរតាមក្រោយអ្នកសិល្បៈ និងអ្នកអក្សរសិល្ប៍”។

«មើលរឿង ”ហង្សយន្ត” របស់ខ្មែរយើង កើតមានយូរមកហើយ នោះគឺជាការស្រមើរស្រម៉ៃរបស់អ្នកនិពន្ធ។ យន្តហោះកើតក្រោយរឿងព្រេងនេះទេ។ ជ្រែកទឹកជ្រែកដី ត្រចៀកទិព្វមាត់ទិព្វ ពេលនេះកើតឡើងទាំងអស់។ អក្សរសិល្ប៍ស្រមើស្រម៉ៃ ហើយបង្កើតវាតាំងពីយូរ តាំងពីអ្នកវិទ្យាសាស្ត្រ មិនទាន់បង្កើតវាឡើងមក»។ នេះជាការអះអាងរបស់លោក គឹម ពិនន់។

ចំណែកអ្នកស្រី ខ្លូត វិបុលឡា ប្រធានបណ្ណាល័យជាតិ បានលើកឡើងថាសៀវភៅអេឡិចត្រូនិក ដើរតួយ៉ាងសំខាន់ក្នុងការរក្សាទុកឯកសារ ពិសេសឯកសារកម្រ ឯកសារចាស់ៗ និងឯកសារដែលអ្នកនិពន្ធ បោះពុម្ភមិនសម្រាប់លក់។ អ្នកស្រីថា ស្របពេលដែលការនិពន្ធមានការរីកចម្រើន ក៏ដូចជាអ្នកនិពន្ធមានការកើនឡើង ការបោះពុម្ពជាអេឡិចត្រូនិក ក៏ត្រូវបានដាក់នៅក្នុង App ជាច្រើនដែរ ដើម្បីឱ្យសាធារណជន អាចចូលទៅអានសៀវភៅ ឬស្រាវជ្រាវឯកសារផ្សេងៗបានគ្រប់ពេល។

អ្នកស្រី ខ្លូត វិបុលឡា ប្រធានបណ្ណាល័យជាតិ

បន្ថែមពីនោះ សៀវភៅអេឡិចត្រូនិកមានច្រើនភាសា ដែលងាយស្រួលសម្រាប់ការសិក្សាស្រាវជ្រាវ។ ប្រធានបណ្ណាល័យជាតិ លើកឡើងថា គុណប្រយោជន៍របស់សៀវភៅអេឡិចត្រូនិក គឺជួយថែរក្សាឯកសារបានយូរអង្វែង ទាំងឯកសារច្បាប់ដើម និងច្បាប់ចម្លង។

«ពេលនេះបណ្ណាល័យជាតិ មិនអនុញ្ញាតឱ្យមានការបើកមើលសៀវភៅចាស់ៗទៀតទេ ព្រោះវាមានការពុកផុយ។ ក្នុងបណ្ណាល័យជាតិ មានឯកសារចាស់ៗជាច្រើន ដូច្នេះដើម្បីរក្សាឯកសារច្បាប់ដើម ដែលជាសម្បត្តិបេតិកភណ្ឌជាតិ បណ្ណាល័យជាតិបានរៀបចំស្កេនឯកសារទាំងនោះ ចូលក្នុងប្រព័ន្ធឌីជីថល ហើយបញ្ចេញទៅតាមប្រព័ន្ធអេឡិចត្រូនិក»។ នេះជាការពន្យល់របស់អ្នកស្រី ខ្លូត វិបុលឡា។

អ្នកស្រី ខ្លូត វិបុលឡា ក៏បានលើកឡើងដែរថា បណ្ណាល័យជាតិ គឺជាកន្លែងប្រមូលផ្ដុំរាល់ការបោះពុម្ពគ្រប់ប្រភេទ។ អ្នកស្រីបន្ថែមថា បណ្ណាល័យជាតិកម្ពុជា ដើរតួជាបណ្ណាល័យជាតិផង ជាបណ្ណាល័យសាធារណៈផង និងជាបណ្ណាល័យសម្រាប់កុមារផង។ ទាំងនេះដើម្បីជំរុញឱ្យកូនខ្មែរ ស្រឡាញ់ការអាន។ បណ្ណាល័យជាតិ ក៏បានទាក់ទងទៅអ្នកនិពន្ធ ឬអ្នកបោះពុម្ពឯកសារមួយចំនួន ដែលបោះពុម្ពសៀវភៅមិនសម្រាប់លក់ ដើម្បីយកសៀវភៅទាំងនោះ ទៅថតទុកជាឯកសារ តម្កល់នៅក្នុងបណ្ណាល័យជាតិផងដែរ។

លោក ហុក សុទ្ធិ ប្រធានអង្គការស៊ីប៉ា បានលើកឡើងថា ដើម្បីបង្កើតទម្លាប់អាន អ្នកអានគួរតែរកសៀវភៅណា ដែលងាយស្រួលអាន ងាយស្រួលយល់ ដែលធ្វើឱ្យអារម្មណ៍សប្បាយរីករាយនឹងការអានជាមុនសិន។ លោកបន្ថែមថា សៀវភៅចែកជា២ប្រភេទ ១ជាប្រភេទឯកសារ គឺពាក់ព័ន្ធនឹងការស្រាវជ្រាវ និងការពិត។ ២ជាប្រភេទប្រឌិតកថា គឺប្រលោមលោក និងចម្រៀងជាដើម ដើម្បីបំពេរនិងលួងលោមអារម្មណ៍មនុស្ស៕

Tag:

សៀវភៅ

អក្សរ

អក្សរសាស្ត្រ

អក្សរសិល្ប៍

បណ្ណាល័យ