ក្រសួងការបរទេស បញ្ជាក់ក្នុងសេចក្តីប្រកាសព័ត៌មានថា ដំណើរទស្សនកិច្ចរបស់លោក ប្រាក់ សុខុន ទៅកាន់ប្រទេសជប៉ុននាពេលខាងមុខនេះ បង្ហាញពីការបន្តប្តេជ្ញាចិត្តយ៉ាងមោះមុតរបស់រដ្ឋាភិបាលទាំង២ ក្នុងការពង្រឹងទំនាក់ទំនងល្អប្រពៃ ដែលមានស្រាប់ និងភាពជាដៃយុទ្ធសាស្ត្រគ្រប់ជ្រុងជ្រោយ ដែលទើបត្រូវបានបង្កើតឡើងនាពេលថ្មីៗនេះ សម្រាប់ផលប្រយោជន៍ទៅវិញទៅមក។
 

ផ្អែកតាមសេចក្តីប្រកាសព័ត៌មានដដែល លោករដ្ឋមន្រ្តីបរទេសកម្ពុជា នឹងជួបលោក ហាយ៉ាហ្ស៊ី យ៉ូហ្ស៊ីម៉ាសា រដ្ឋមន្រ្តីការបរទេសជប៉ុន ហើយនឹងមានជួបដាច់ដោយឡែកមួយទៀត ជាមួយសម្ព័ន្ធសភាមិត្តភាពជប៉ុន-កម្ពុជា និងសមាគមជប៉ុន-កម្ពុជា។ ក្រៅពីជំនួបទាំងនេះ លោកប្រមុខការទូតកម្ពុជា នឹងចូលរួមក្នុងពិធីជប់លៀងរម្លឹកខួបលើកទី៧០ឆ្នាំនៃការបង្កើតទំនាក់ទំនងការទូតកម្ពុជា-ជប៉ុន៕