ខណៈរុស្ស៊ីនឹងបង្កើនការលុកលុយរបស់ខ្លួននៅអ៊ុយក្រែន អាម៉េរិក និងលោកខាងលិចបាន សម្រេចបញ្ជូនជំនួយយោធាបន្ថែមទៀតសម្រាប់ក្រុងកៀវ។ កាលពីថ្ងៃទី១៩ ខែមករា រដ្ឋាភិបាលស៊ុយអ៊ែតប្រកាសបញ្ជូនអាវុធ  ក្នុងទំហំទឹកប្រាក់៤១៩លានដុល្លារ។ 

 

ទន្ទឹមនេះ មុនកិច្ចប្រជុំមេដឹកនាំការពារជាតិមកពីប្រហែល៥០ប្រទេស និងសម្ព័ន្ធយោធាណាតូ នៅឯមូលដ្ឋានទ័ពអាកាស Ramstein អាម៉េរិក និងហ្វាំងឡង់ក៏បានប្រកាសបញ្ជូនរថក្រោះ បន្ថែមផងដែរ។ ចំណែក អាល្លឺម៉ង់នៅត្រូវការភ្លើងខៀវពីសម្ព័ន្ធមិត្ត។

 

ស្របពេលដែលលោកខាងលិចនៅតែបន្តផ្ដល់ជំនួយរថក្រោះបែបនេះ អ្នកនាំពាក្យវិមានក្រេមឡាំង លោក Peskov លើកឡើងជាថ្មីម្ដងទៀតថា ការផ្គត់ផ្គង់សព្វាវុធដូចជារថក្រោះនឹងមិនធ្វើ 

ឱ្យមានការផ្តាស់ប្ដូរអ្វីឡើយ ប៉ុន្តែវានឹងធ្វើឱ្យមានបញ្ហាបន្ថែមទៀតសម្រាប់អ៊ុយក្រែនផ្ទាល់ ក៏ដូចជាប្រជាជនផងដែរ។

 

«យើងឃើញមានការភាន់ច្រឡំយ៉ាងខ្លាំងដែលគិតថាអ៊ុយក្រែនអាចទទួលបានជោគជ័យនៅលើសមរភូមិ។ នេះគឺជាការភ័ន្តច្រឡំយ៉ាងខ្លាំងរបស់សហគមន៍លោកខាងលិច ដែលនឹងត្រូវបង្ក ឱ្យមានការសោកស្ដាយច្រើនជាងមួយដង ហើយពួកយើងប្រាកដក្នុងចិត្តបែបនេះ»។ អ្នកនាំ ពាក្យវិមានក្រេមឡាំងសង្កត់ធ្ងន់បែបនេះរួចបន្ថែមថាមធ្យោបាយដើម្បីទប់ស្កាត់ភាពតានតឹងគឺត្រូវយកចិត្តទុកដាក់លើការព្រួយបារម្ភជាយុទ្ធសាស្រ្តដែលរុស្ស៊ីបានបញ្ជាក់នៅពីរបីសប្តាហ៍ មុនពេលបញ្ជូនកងកម្លាំងប្រដាប់អាវុធរបស់ខ្លួនចូលទៅអ៊ុយក្រែន។

 

ឆ្លើយទៅកាន់សំណួរក្នុងសន្និសីទកាសែតមួយពីការផ្គត់ផ្គង់​សព្វាវុធ​កាន់តែ​ទំនើប​ទៅ​កាន់​​អ៊ុយ​ក្រែ​ន​មាន​ន័យ​ថា​ជម្លោះ​កាន់តែ​កើនឡើង​ឬយ៉ាងណា លោក Peskov សង្កត់ធ្ងន់ថា ការណ៍នេះពិតជាបង្កឱ្យមានភាពតានតឹងកើនឡើង ព្រោះបណ្ដាលោកខាងលិចបង្កើនការ ចូលរួមដោយប្រយោលពេលខ្លះដោយផ្ទាល់ពីសំណាក់សមាជិកប្រទេសសម្ព័ន្ធយោធាណាតូក្នុងសង្គ្រាម៕