កញ្ញា​ សុង សុធាវី៖ យើងឃើញថានៅប្រទេសកម្ពុជា មានតំបន់ទេសចរណ៍សម្បូរបែប ទាំងវប្បធម៌ ប្រវត្តិសាស្រ្ត ធម្មជាតិ។ល។  សម្រាប់ទេសចរចិន តើលោកស្រី គិតថាគាត់ចាប់អារម្មណ៍តំបន់គោលដៅណាខ្លះ នៅពេលដែលពួកគាត់នឹងមកកម្សាន្តនៅកម្ពុជាឆាប់ៗនេះ? 
 

លោកស្រី ឆាយ ស៊ីវលីន៖ សម្រាប់ទីផ្សារចិន ឃើញថាតំបន់វប្បធម៌ខេត្តសៀមរាប នៅតែជាទីពេញនិយម ហើយតំបន់ឆ្នេរមាត់សមុទ្រកម្ពុជាយើង ក៏អ៊ីចឹងដែរ។ ក្រៅពីហ្នឹង យើងបានរៀបចំតំបន់អេកូទេសចរណ៍មួយចំនួនទៀតផងដែរ។ 

 

កញ្ញា សុង សុធាវី៖ នៅក្នុងប្រទេសកម្ពុជាយើងមានទេសចរជាច្រើនមកពីតំបន់ផ្សេងៗគ្នា ហើយមានការលើកឡើងថា ពេលដែលទេសចរចិនបានទៅដល់ទីនោះ ទេសចរដែលជាជនជាតិអឺរ៉ុបចាប់ផ្តើមថយចុះវិញ! តើលោកស្រី បារម្ភទេខ្លាចបាត់បង់អ្នកទេសចរទាំងនោះ ហើយមានវិធានការដូចម្តេចករណីនេះ?

លោកស្រី ឆាយ ស៊ីវលីន៖ ត្រង់ចំណុចនេះ យើងទទួលស្គាល់ថា  នៅពេលទេសចរចិនគាត់ទៅកម្សាន្តនៅតំបន់ណាទាំងក្រុមៗ នោះទេសចរប៉ែកអឺរ៉ុបគាត់ឆ្លាស់គ្នា ឬ ចង់ជៀសចេញ ព្រោះការចូលចិត្តគឺខុសគ្នា រវាងពួកគាត់។ ទេសចរចិន គាត់ចូលចិត្តធ្វើអីលឿនៗ និយាយឮៗ និងបង្ហាញពីអារម្មណ៍ដោយមិនសូវលាក់លៀម តែការបង្ហាញបែបហ្នឹងវាអាចរំខានដល់អារម្មណ៍ទេសចរផ្សេងទៀត ដែលពួកគាត់ចូលចិត្តបែបស្ងប់ស្ងាត់  និយាយសំឡេងតិចៗ ហើយលាក់ទុកក្នុងចិត្ត។ល។ តែជនជាតិចិនគាត់ចូលចិត្តនិយាយឮៗ ហើយប្រកូកប្រកាសហៅគ្នាឱ្យមកទិញរបស់នៅទីនេះថោក និងល្អ អ៊ីចឹងទៅ។ របៀបរបបនៃការដើលេងខុសគ្នានេះហើយ ទើបតំបន់ណាដែលជនជាតិចិនទៅដល់ ទីនោះគឺជនជាតិអឺរ៉ុបគាត់ជៀសចេញសិន។

ដោយឡែកសម្រាប់យើងដែលជាអ្នករៀបចំគឺ ដឹងច្បាស់ ស្គាល់ច្បាស់ ពីចរិតលក្ខណៈរបស់ភ្ញៀវ ទៅតាមទីផ្សារនីមួយៗ អ៊ីចឹងយើងនឹងធ្វើការបែងចែក តំបន់ណាចិនគាត់ឧស្សាហ៍ទៅ គឺទៅពេលព្រឹកអ៊ីចឹងទៅ។ ឯទេសចរអឺរ៉ុបគាត់ទៅកម្សាន្តវេនផ្សេងគ្នា ដើម្បីកុំឱ្យជល់គ្នាទៅមិនសប្បាយចិត្តរៀងខ្លួន។ ឯខាងចិន ក៏គាត់មិនសប្បាយចិត្តដែរនៅពេលដែលគេឃើញគាត់ហើយគេជៀសចេញអ៊ីចឹង! ហើយបើមានច្រកចូលពីរ យើងឱ្យពួកគាត់ដើចូលផ្សេងអ៊ីចឹងទៅ។ យើងតែងតែធ្វើអ៊ីចឹង ដើម្បីបំបាត់បញ្ហាទាំងអស់នេះ។ 

 

កញ្ញា សុង សុធាវី៖  តាមការសង្កេតឃើញរបស់នាងខ្ញុំ មិនថាតែនៅភ្នំពេញ និងខេត្តសៀមរាប មានទេសចរអឺរ៉ុបច្រើន ដែលការមកដល់របស់ពួកគាត់ជាដំណឹងល្អ សម្រាប់ប្រទេសកម្ពុជា តែមានការលើកឡើងថា  កម្ពុជាជាគោលដៅទេសចរចុងក្រោយបន្ទាប់ពីថៃ និងវៀតណាម! តើលោកស្រីចូលរួមដូចម្តេច ហើយ CATA នឹងផ្សព្វផ្សាយពីសក្តានុពលទេសចរណ៍បែបណាទៀតទៅកាន់ពិភពលោក? 
 

លោកស្រី ឆាយ ស៊ីវលីន៖ យើងក៏ទទួលស្គាល់ថាកន្លងមក កម្ពុជាជាគោលដៅទេសចរចុងក្រោយនៅឥណ្តូចិន។ អ៊ីចឹង វៀតណាម ឡាវ កម្ពុជា ឬក៏ វៀតណាម ថៃ កម្ពុជា ដែលមូលហេតុដោយសារតែ ជើងហោះហើរយើងមិនមានហោះហើរទៅដល់ប៉ែកអឺរ៉ុប ប៉ារីស អាល្លឺម៉ង់អី យើងមិនមានទេ។ អ៊ីចឹងគេត្រូវជ្រើសរើសប្រទេសណា ដែលគេនឹងមកដល់មុនដូចជាប្រទេសវៀតណាម ថៃ សិន ទើបគេបន្តដំណើរមកប្រទេសកម្ពុជា ហើយវាជាមូលហេតុដែលយើងមិនអាចទាញទេសចរជាគោលដៅរបស់យើងតែម្តងបាន។
 

តែទោះជាយ៉ាងណា នៅពេលកូវីដនេះ យើងក៏មានការផ្សព្វផ្សាយច្រើនដែរ។ ពិសេសនៅពេលប្រមុខរដ្ឋប្រកាសបើកប្រទេសហ្នឹង គឺមុនគេដែលកម្ពុជាជាគោលដៅចម្បងតែមួយគត់ ដែលអ្នកឆ្លងកាត់ទីណាបន្តិចហើយ គឺអ្នកមកកម្ពុជាតែម្តង ព្រោះថាយើងមានសក្តានុពលទេសចរណ៍ច្រើនណាស់ ដោយមិនមែនមានតែប្រាសាទអង្គរវត្តតែមួយមុខទេ គឺយើងមានអ្វីៗជាច្រើន មានសម្បត្តិបេតិកភណ្ឌពិភពលោកច្រើន ទេសចរណ៍ធម្មជាតិឆ្នេរខ្សាច់របស់យើង ដែលជាប់លំដាប់ពិភពលោក តំបន់កែច្នៃ ប្រវត្តិសាស្រ្ត។ល។ ពិសេសជនជាតិខ្មែរយើង ជាជនជាតិមួយមានភាពរួសរាយរាក់ទាក់ ដែលយើងលែងបានច្រើនថ្ងៃ ដោយមិនដូចជាការផ្សព្វផ្សាយរបស់ប្រទេសជិតខាងយើងថា មកកម្ពុជាតែ ២ថ្ងៃ ឬ ៣ថ្ងៃគឺគ្រប់គ្រាន់នោះទេ៕