ទំនាក់ទំនងការទូតរវាងរុស្ស៊ី និងអេស្តូនី នឹងធ្វើត្រឹមថ្នាក់ភារធារីវិញ បន្ទាប់ពីប្រទេសទាំងពីរបណ្ដេញអគ្គរដ្ឋទូតរៀងៗខ្លួនចេញពីប្រទេស។ ដើមហេតុដែលនាំដល់រឿងនេះ ចាប់ផ្ដើមនៅថ្ងៃទី១១ ខែមករា ពេលបានប្រាប់ឱ្យរុស្ស៊ីកាត់បន្ថយចំនួនបុគ្គលិកនៅស្ថានទូតនៅទីក្រុងតាលិនត្រឹម៨នាក់ដែលស្មើនឹង​ចំនួនតំណាងអេស្ដូនីនៅទីក្រុងមូស្កូដែរ។

 

ថ្មីៗនេះ អេស្តូនី ក៏បានចូលរួមជាមួយបណ្ដាប្រទេសលោកខាងលិច​ក្នុងការ​បញ្ជូនអាវុធ​បន្ថែម​ទៅ​អ៊ុយក្រែន ហើយទទូចអាល្លឺម៉ង់ឱ្យផ្ដល់រថក្រោះប្រយុទ្ធ Leopard ឱ្យអ៊ុយក្រែនដើម្បីឆ្លើយតប​នឹង​ការ​ឈ្លានពានរបស់រុស្ស៊ី។

 

ខណៈអេស្ដូនីមានជំហរផ្ទុយពីរុស្ស៊ីបែបនេះ​ ក្រសួងការបរទេសរុស្ស៊ីប្រាប់ឱ្យប្រេសិតអេស្តូនីចាក​ចេញ​ពីក្រុងមូស្គូនៅខែក្រោយ ហើយប្រទេសទាំងពីរនឹងមានតំណាងភារធារីនៅរដ្ឋធានីនីមួយៗ​ជំនួសអគ្គរដ្ឋទូត។

 

«ក្នុងរយៈពេលប៉ុន្មានឆ្នាំចុងក្រោយនេះមេដឹកនាំអេស្តូនីបានបំផ្លាញទំនាក់ទំនងទាំងស្រុងជាមួយរុស្ស៊ីដោយចេតនា។ (ពួកគេ) ស្អប់ប្រព័ន្ធនយោបាយរុស្ស៊ីទាំងស្រុង»។ ក្រសួងការបរទេសរុស្ស៊ីបា​ន​បញ្ជាក់បែបនេះរួចបន្តថា ចំណាត់ការនេះគឺឆ្លើយតបនឹងការកាត់បន្ថយចំនួនបុគ្គលិក​ស្ថាន​ទូត​រុស្ស៊ី​នៅ​តាលិន។ 

 

ក្រោយក្រសួងការបរទេសរុស្ស៊ីប្រកាសបែបនេះ អេស្ដូនីឆ្លើយតបវិញដោយប្រាប់ប្រេសិតរុស្ស៊ីឱ្យ​ចាក​ចេញពីប្រទេសត្រឹមថ្ងៃទី៧ ខែកុម្ភៈ។ រដ្ឋមន្ត្រីការបរទេសអេស្តូនីលោក Urmas Reinsalu លើកឡើង​ក្នុងសេចក្ដីថ្លែងការណ៍មួយថា អេស្តូនីនឹង​បន្ត​គាំទ្រ​អ៊ុយក្រែន ខណៈ​ដែល​រុស្ស៊ី​កំពុង​រៀបចំ​ផែនការ​វាយ​ប្រហារ​ទ្រង់ទ្រាយ​ធំ ហើយ​អេស្ដូនី​​អំពាវនាវ​ដល់​ប្រទេស​ដែល​មាន​គំនិត​ដូចគ្នា​ផ្សេងទៀត​បង្កើន​ជំនួយ​ដល់​អ៊ុយក្រែន៕