លោក អឿន ពៀត បានលើកឡើងថា កន្លងមកធា្លប់បង្ក្រាប់បានការជួញដូរ និងប្រើប្រាស់គ្រឿងញៀនបានច្រើន តែបច្ចុប្បន្នស្ថានភាពបានស្ងប់ស្ងាត់។ បើតាមលោកមេប៉ុស្ដិ៍រូបនេះ ក្នុងឆ្នាំ២០២២ អាជ្ញាធរបង្រា្កបបានករណីជួញដូរ និងប្រើប្រាស់គ្រឿងញៀន២ករណី តែមានវត្ថុតាំងមិនច្រើននោះទេ បើធៀបនឹងឆ្នាំ២០២១។ លោកបញ្ជាក់ថាការថយចុះលើករណីគ្រឿងញៀននេះ ដោយសារអាជ្ញាធរ បានចុះផ្សព្វផ្សាយច្រើនដង ជុំវិញការប្រើប្រាស់គ្រឿងញៀន និងគ្រោះថ្នាក់សង្គម ព្រមទាំងសកម្មភាពផ្សេងៗទៀត ដែលធ្វើឱ្យប៉ះពាល់ដល់សុខភាព និងគ្រួសាររបស់ពួកគេ។ 
 

«ពួកខ្ញុំតែងតែចុះផ្សព្វផ្សាយភូមិឃុំមានសុវត្ថិភាព ជូនពលរដ្ឋជារៀងរាល់ខែ គឺវិលជុំអាច ៤ទៅ៥ដង នៅក្នុងភូមិទាំង១៨ ក្នុងសង្កាត់សំរោង»។ ​លោក ​អឿន ពៀត ​បញ្ជាក់បែបនេះ រួចបន្តលើកឡើងថា ការប្រើប្រាស់គ្រឿងញៀន មិនត្រឹមតែនាំផលវិបាកដល់សុខភាពប៉ុណ្ណោះទេ ប៉ុន្តែក៏ធ្វើឱ្យគ្រួសារ និងសង្គម គ្មានភាពសុខដុមផងដែរ។ ​លោក ​អឿន ពៀត បន្តថា៖ «គ្រួសារដែលមានសមាជិក​ប្រើប្រាស់គ្រឿងញៀន នឹងមានបញ្ហាសេដ្ឋកិច្ច បង្កហិង្សាក្នុងគ្រួសារ ដូចជាការគំរាមកំហែងយកលុយទៅទិញសារធាតុញៀន និងប៉ះពាល់ដល់សង្គមជាតិទៀតផង»។

 

ក្នុងនាមជាអាជ្ញាធរមានសមត្ថកិច្ច លោក អឿន ពៀត បានស្នើដោយទទូចដល់ប្រជាពលរដ្ឋ  ​មេភូមិ និងបញ្ហាការពារភូមិនីមួយៗ បន្តចូលរួមសហការគ្នាឱ្យបានសកម្មភាពថែមទៀត និងរួមគ្នា​លុបបំបាត់គ្រឿងញៀនពីក្នុងសហគមន៍៕

 

អានអត្ថបទពាក់ព័ន្ធផ្សេងទៀត៖ យុវជនសកម្ម សេវាល្អ