លោក វ៉ាង ម៉ាប់នាយប៉ុស្តិ៍នគរបាលគោកខ្ពស់ បានអះអាងថា បច្ចុប្បន្ន​ នៅមូលដ្ឋានរបស់លោក ពុំមានក្មេងទំនើង ដែលបង្កចលាចល ដល់សង្គមទៀតនោះទេ ដោយសារភូមិនីមួយៗ មានកម្លាំងប្រជាការពារគ្រប់គ្រាន់ សម្រាប់ការល្បាត និងបង្រ្កាប់រាល់បញ្ហាអសកម្មភ្លាមៗ។  កន្លងទៅ ក្មេងទំនើងកើតឡើងដោយសារបញ្ហា​ គ្រឿងញៀន និងគ្រឿស្រវឹង ហើយពួកគេ តែងតែបង្កបញ្ហានៅតាមដងផ្លូវ កម្មវិធីបុណ្យ និងមង្គលការជាដើម។ ក្មេងទំនើងនេះ មានចាប់ពីអាយុ ១៦ឆ្នាំ ដល់ ៣០ឆ្នាំ។ បញ្ហាក្មេងទំនើង បានជិះឥទ្ធិពលយ៉ាងខ្លាំង ដល់ការរស់នៅរបស់ពលរដ្ឋ ជាពិសេសប៉ះពាលដល់ទ្រព្យសម្បត្តិសារធារណៈ និងក្រុមគ្រួសារ។
 

បើតាមលោក វ៉ាង ម៉ាប់ រាល់ការបង្រ្កាបបទល្មើសក្មេងទំនើង នៅតាមកម្មវិធីបុណ្យ និងមង្គលការ ពុំសូវជួបការលំបាកនោះទេ ដោយសារនៅទីនោះ មានប្រជាការពារនិងសមត្ថកិច្ច​យាមល្បាតគ្រប់គ្រាន់។ ប៉ុន្តែការបង្កបញ្ហា នៅតាមដងផ្លូវ ត្រូវបានចាត់ទុកជាបញ្ហាប្រ​ឈមដោយសារសមត្ថកិច្ចគ្រប់គ្រង សភាពការមិនបាន។
 

ជាវិធានការរបស់ប៉ុស្តិ៍នគរបាលគោកខ្ពស់ នៅពេលចាប់បានក្មេងទំនើង ត្រូវយកទៅអប់រំ និងធ្វើកិច្ចសន្យាបញ្ឈប់។  លោក ប្រាប់ដូច្នេះថា៖«ពីមុនគ្មានប្រជាការពារ នៅឃុំគោកខ្ពស់ មានក្មេងទំនើងច្រើន តែឥឡូវ កាត់បន្ថយអស់​ ហើយ ព្រោះយើងកត់សម្គាល់ថា នៅពេលមានពិធីការ ឬបុណ្យទាន មិនដែលឃើញសោះ។ ពីមុនវា មានបក្សពួក ជិះម៉ូតូបង្ហោះ និងបំពងសំឡេងឮៗ អ៊ីចឹង ប្រហែលមកដល់ឥឡូវនេះ ពួកគេយល់ដឹងច្រើនហើយ»។ 
 

 

ជាមួយគ្នានេះ លោក វ៉ាង ម៉ាប់ ប្ដេជ្ញាកាត់បន្ថយបញ្ហាក្មេងទំនើងឱ្យកាន់តែប្រើសើរថែមទៀត តាមរយៈការ ផ្សព្វផ្សាយដល់ពលរដ្ឋនៅមូលដ្ឋាន៕ 

 

អានអត្ថបទពាក់ព័ន្ធផ្សេងទៀត៖ យុវជនសកម្មសេវាល្អ