«បន្ទាប់ពីនាំគ្រូជនជាតិគុយបាមកបង្វឹក មុនកីឡាជាតិលើកទី៣ យើងឃើញថាមានការអភិវឌ្ឍន៍គុណផលគួរឱ្យកត់សម្គាល់លើបច្ចេកទេសការប្រកួត និងលក្ខន្តិកៈនៃការប្រកួត ការដក់យកបាល់ក្រោម និងកើនជំនាញវាយសេវាជាដើម»។ លោក អាំង សិរីពិសិដ្ឋ អគ្គលេខាធិការសហព័ន្ធកីឡាបាល់ទះកម្ពុជា និយាយដូច្នេះ។

 

ទន្ទឹមនឹងសមត្ថភាពកើនឡើង លោកអគ្គលេខាធិការបន្តថា ការប្រកួតកីឡាស៊ីហ្គេមលើកទី៣២ ឆ្នាំ២០២៣ នៅកម្ពុជា រំពឹងថាវិញ្ញាសាបាល់ទះឆ្នេរខ្សាច់នឹងអាចប្រជែងបានមេដាយផងដែរ។

 

លោក អាំង សិរីពិសិដ្ឋ និយាយថា៖«អ្វីដែលយើងរំពឹងនោះគឺឈ្នះមេដាយនាស៊ីហ្គេម២០២៣ ដែលកម្ពុជាធ្វើម្ចាស់ផ្ទះ។ កីឡាបាល់ទះឆ្នេរខ្សាច់នេះក៏យើងមានបំណងមួយគឺចង់តេស្តសមត្ថភាពដែរ តាមរយៈការប្រកួតិមិត្តភាពក្នុងស្រុក ទោះពិបាកនឹងរកដៃគូប្រកួតក្តី»។

 

គួរបញ្ជាក់ថា មន្រ្តីសហព័ន្ធកីឡាបាល់ទះកម្ពុជា កំពុងស្វះស្វែងរកដៃគូសម្រាប់រៀបចំការប្រកួតមិត្តភាពលើវិញ្ញាសាឆ្នេរខ្សាច់នេះក្នុងពេលឆាប់ៗ ដោយលោកអគ្គលេខាធិការសហព័ន្ធ កំពុងទាក់ទងទៅសហព័ន្ធកីឡាបាល់ទះសឹង្ហបុរី និងវៀតណាមផងដែរ នេះបើតាមការផ្តល់បទសម្ភាសផ្ទាល់នៅថ្ងៃទី៧ ខែមករា កន្លងទៅ៕