ក្នុងកិច្ចប្រជុំនៅទីស្នាក់ការ NOCC ថ្ងៃទី២៤ ខែមករា លោក វ៉ាត់ ចំរើន បានលើកឡើងពីការផ្តោតសំខាន់ ក្នុងកម្មពិធីរាប់ថយក្រោយ១០០ថ្ងៃ នៃដំណើរមកដល់ព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ ឱ្យមានភាពឱឡារិក ដើម្បីផ្សាយឱ្យបានទូលំទូលាយតាមបណ្តាស្ថានីយ៍ទូរទស្សន៍ ក៏ដូចជាប្រព័ន្ធផ្សព្វផ្សាយសង្គមទៅកាន់ប្រជាពលរដ្ឋ។ 

 

ជាមួយគ្នានោះដែរ ក្នុងនាមជាម្ចាស់ផ្ទះ កម្ពុជា ក៏បានអញ្ជើញនាយបេសកកម្មស៊ីហ្គេមមកពីបណ្តាប្រទេសអាស៊ីអាគ្នេយ៍ទាំងអស់ ចូលរួមក្នុងពិធីរាប់ថយក្រោយ១០០ថ្ងៃ និងមានសារថ្លែងសុន្ទរកថាជាសំឡេងពីលោក Dato Serik Chaiyapak Siriwat ប្រធានសហព័ន្ធកីឡាអាស៊ីអាគ្នេយ៍  ដើម្បីជាសក្ខីភាពបញ្ជាក់អំពីការត្រៀមខ្លួនបានរួចរាល់របស់ម្ចាស់ផ្ទះកម្ពុជា ជូនជនរួមជាតិ និងអន្តរជាតិ។

 

លោក វ៉ាត់ ចំរើន សង្កត់ធ្ងន់ថា៖«គ្រប់ផ្នែកទាំងអស់បានត្រៀមខ្លួនរួចរាល់ ទាំងផ្នែកសម្តែងសិល្បៈ វប្បធម៌ និងក្រុមកីឡា ប្រមាណ១០០០នាក់ ដើម្បីសម្តែងក្នុងពិធីដ៏មានសារសំខាន់នេះ។ ពិធីនេះនឹងមានការផ្សាយបន្តផ្ទាល់ពីបណ្តាញទូរទស្សន៍ បណ្តាញសង្គម ដើម្បីបញ្ជ្រាបព័ត៌មាននេះទៅកាន់សាធារជនផងដែរ»។ 

 

ក្រៅពីនេះ CAMSOC ក៏មានកិច្ចប្រជុំនាយបេសកកម្មស៊ីហ្គេម មកពីបណ្តាប្រទេសអាស៊ីអាគ្នេយ៍ទាំង១០ប្រទេស រួមទាំងកិច្ចប្រជុំប្រដាល់គុនខ្មែរអន្តរជាតិ ដោយមានសមាជិកចូលរួមសរុបប្រមាណ១០០នាក់ផ្សេងទៀត ហើយអ្នកទាំងនេះ ក៏នឹងចូលរួមពិធីរាប់ថយក្រោយ ១០០ថ្ងៃឆ្ពោះទៅធ្វើម្ចាស់ផ្ទះ ស៊ីហ្គេម ឆ្នាំ២០២៣ ដើម្បីបង្ហាញជូនអន្តរជាតិថា «កម្ពុជាបានត្រៀមខ្លួនរួចរាល់» Cambodia is Ready ផងដែរ៕