កិច្ចប្រជុំរយៈពេលជាង៤ម៉ោងបានបិទបញ្ចប់ទៅដោយរលូននឹងទទួលបានជោគជ័យដែលមានការអញ្ជើញចូលរួមពីនាយបេសកកម្មពិសេសរបស់គណៈកម្មការស៊ីហ្គេម(NOC)ក្នុងតំបន់អាស៊ីអាគ្នេយ៍ រួមមាន កម្ពុជា(ម្ចាស់ផ្ទះ) ថៃ វៀតណាម ឡាវ មីយ៉ាន់ម៉ា ម៉ាឡេស៊ី សឹង្ហបុរី ឥណ្ឌូណេស៊ី ទីម័រខាងកើត ហ្វីលីពីន និងព្រុយណេ។

 

លោក វ៉ាត់ ចំរើន អគ្គលេខាធិការគណៈកម្មាធិការជាតិ CAMSOC បានបញ្ជាក់ថា កិច្ចប្រជុំពិសេសនាយបេសកកម្មនេះ គឺទទួលបានការវាយតម្លៃខ្ពស់ពីបណ្តាប្រទេសទាំង១០ ថាកម្ពុជាហាក់បីដូចជារួចរាល់ទាំងស្រុងក្នុងការរៀបចំទទួលធ្វើជាម្ចាស់ផ្ទះព្រឹត្តិការណ៍កីឡាស៊ីហ្គេមលើកទី៣២ ឆ្នាំ២០២៣។

 

លោក វ៉ាត់ ចំរើន និយាយថា៖«ការរៀបចំទទួលស៊ីហ្គេមនេះគឺយើងទទួលបានការសហការគ្នាយ៉ាងល្អ។ អ្វីដែលយើងបញ្ជាក់បាននូវពេលនេះគឺយើងទទួលបានការគាំទ្រពីប្រទេសទាំងអស់ថាយើងពិតជាបានត្រៀមខ្លួនរួចរាល់អស់ហើយ ជាពិសេសខាងតំណាងសមាជិកសហព័ន្ធកីឡាអាស៊ីអាគ្នេយ៍ បានកោតសរសើរថាយើងពិតជាធ្វើការបានល្អក្នុងការត្រៀមលក្ខណៈ»។

 

ព្រឹត្តិការណ៍ប្រកួតកីឡាស៊ីហ្គេម លើកទី៣២ ឆ្នាំ២០២៣ នៅកម្ពុជា នៅសល់ត្រឹមរយៈពេល ៩៩ថ្ងៃទៀតប៉ុណ្ណោះ គិតត្រឹមថ្ងៃទី២៦ ខែមករា ឆ្នាំ២០២៣។ កីឡាទាំងអស់មាន៣៧ ប្រភេទ និងមានជាង៦០០ វិញ្ញាសា បូករួមនឹងវិញ្ញាសាសម្តែងមួយផងដែរ៕