«អត្តពលិករូបណា ពិនិត្យឃើញមានសារធាតុហាមឃាត់ ប្រឆាំងនឹងច្បាប់របស់អង់ទីដូពីងគឺត្រូវដកចេញពីការប្រកួត។ នេះគឺជាច្បាប់របស់អន្តរជាតិ មិនមែនកម្ពុជាចេះតែដាក់ចេះតែដកទេ នៅគ្រប់ប្រភេទកីឡាទាំងអស់»។ នេះជាការលើកឡើងរបស់លោកអគ្គលេខាធិការ CAMSOC ។

ការអះអាងរបស់លោក វ៉ាត់ ចំរើន បែបនេះក្រោយបញ្ហាអង់ទីដូពីង កើតឡើងក្នុងប្រភេទកីឡាកាយវប្បកម្មនាពេលកន្លងទៅ និងឈានដល់ដកចេញពីស៊ីហ្គេមលើកទី៣២ ឆ្នាំ២០២៣ ទៀតផង។ 

 

លោកវ៉ាត់ ចំរើនបញ្ជាក់ទៀតថា ប្រសិនមានកីឡាករ-កីឡាការិនី កម្ពុជាណាជាប់ពាក់ព័ន្ធនឹងសារធាតុញៀនហាមឃាត់ គឺគ្មានករណីលើកលែងឡើយ ដ្បិតនេះជាច្បាប់របស់ទីភ្នាក់ងារប្រឆាំងសារធាតុហាមឃាត់ពិភពលោក (WADA)។

 

«អត់មានលើកលែងទេ ឱ្យតែប៉ះពាល់គឺត្រូវតែគោរពច្បាប់របស់ WADA របស់ពិភពលោក។ WADA ដាក់មកម៉េចយើងត្រូវតែគោរពអ៊ីចឹង»។ លោក វ៉ាត់ ចំរើន បង្ហាញពីការប្រកាន់គោលជំហរម៉ឺងម៉ាត់បែបនេះ ទោះបីមានការស្នើសុំ ឬអន្តរាគមន៍បែបណាក៏ដោយ។

 

គួបញ្ជាក់ថា ករណីកីឡាករកាយវប្បកម្មកម្ពុជា ពីររូបគឺត្រូវបានពិនិត្យឃើញថាបានប្រើសារធាតុហាមឃាត់ក្នុងកីឡា«អង់ទីដូពីង» កាលពីពេលកន្លងទៅដោយកីឡាករ ផាន់ ណារិទ្ធ និងកីឡាករ ស៊ាង ម៉េងសាង មានជាប់ពាក់ព័ន្ធនឹងការប្រើប្រាស់ថ្នាំចាក់បញ្ចុះជាតិ ស្តេរ៉យ ក្នុងការប្រកួតកីឡាជាតិលើកទី៣។​ វិញ្ញាសាប្រភេទកីឡាកាយវប្បកម្មកម្ពុជា ត្រូវបានដកចេញពីការប្រកួតកីឡាស៊ីហ្គេម លើកទី៣២ ឆ្នាំ២០២៣៕