«ក្រោយបញ្ចប់កិច្ចប្រជុំ និងបានស្តាប់ពីបទបង្ហាញរបស់ភាគីកម្ពុជាពីវឌ្ឍនភាព និងការងារផ្សេងៗរបស់គណៈកម្មាធិការជាតិ CAMSOC ខ្ញុំឃើញថាគឺរួចរាល់ល្អ ពិតជាល្អណាស់»។ នាយបេសកកម្ម NOC ព្រុយណេ​ លើកឡើងដូច្នេះ ហើយលោកស្រីថា ពិតជារៀបចំបានល្អបើប្រៀបធៀបទៅនឹងការរៀបចំរបស់ប្រទេសព្រុយណេ កាលពីឆ្នាំ១៩៩៩ គឺកម្ពុជាមានលក្ខណៈស្តង់ដារអន្តរជាតិ។ មន្រ្តី NOC ព្រុយណេបន្តថាភាពរួចរាល់នេះមិនមានអ្វីជាឧបសគ្គទេគឺរង់ចាំតែដល់ថ្ងៃប្រកួតតែម្តង។

 

លោកស្រី Umikal Haji Abdulkarim និយាយថា៖«ទាំងការស្នាក់នៅ ហូបចុក ដឹកជញ្ជូន បច្ចេកទេស អ្វីផ្សេងមានលក្ខណៈទំនើបតាមស្តង់ដារស៊ីហ្គេម ខ្ញុំគិតថាមានតែការរង់ចាំដល់ថ្ងៃប្រកួតកីឡាស៊ីហ្គេមលើកទី៣២ នៅកម្ពុជាតែម្តង»។ មិនត្រឹមតែប៉ុណ្ណោះ នាយបេសកកម្មពិសេសរបស់ព្រុយណេ រូបនេះក៏លើកសរសើរពីការទទួលបានយ៉ាងល្អរបស់ម្ចាស់ផ្ទះផងដែរ។

 

«បដិសណ្ឋារកិច្ចនៅកម្ពុជា គឺទទួលបានល្អ ទាំងការដឹកជញ្ជូន សុវត្ថិភាព ខ្ញុំគឺជាភ្ញៀវមានលក្ខណៈ VIP ដែលបានមកដល់ទីក្រុងភ្នំពេញជាលើកទី២នេះ»។ លោកស្រី Abdulkarim បញ្ជាក់ដូច្នេះ។

 

គួបញ្ជាក់ថា គណៈកម្មការកីឡាជាតិអូឡាំពិកព្រុយណេ នឹងបញ្ជូនអត្តពលិកជម្រើសជាតិមកចូលរួមប្រកួតកីឡាស៊ីហ្គេមលើកទី៣២ ឆ្នាំ២០២៣ នៅកម្ពុជាមានចំនួនច្រើនជាងស៊ីហ្គេមលើកទី៣១ នៅប្រទេសវៀតណាម។ តាមការគ្រោងទុកនឹងមានជាង៤០នាក់ ដែលត្រូវលេងលើ១១ ទៅ១២ ប្រភេទកីឡា៕