ស្ថានតូតជប៉ុនប្រចាំកម្ពុជាបានចេញសេចក្ដីប្រកាសព័ត៌មានថា អ.វ.ត.ក មានតួនាទីសំខាន់ក្នុងការបញ្ចប់ដំណើរការសន្តិភាពទាំងមូលនៅកម្ពុជា ហើយជាកន្លែងពិភាក្សារកយុត្តិធម៌ដល់ជនរងគ្រោះនៃរបបខ្មែរក្រហម។ លើសពីនេះ ក៏ជាកន្លែងពង្រឹងនីតិរដ្ឋនៅកម្ពុជាផងដែរ។ 

 

ហេតុនេះ រដ្ឋាភិបាលជប៉ុន បានជួយដល់ អ.វ.ត.ក ២២ម៉ឺនដុល្លារ ដើម្បីបន្តការងារពាក់ព័ន្ធរឿងក្ដីខ្មែរក្រហមដែលនៅសេសសល់។ បើតាមសេចក្ដីប្រកាសព័ត៌មានរបស់ស្ថានទូតជប៉ុនចេញថ្ងៃទី២៦មករានេះ ជប៉ុនបានជួយដល់ អ.វ.ត.ក អស់ជាង៨៨,៩លានដុល្លារ ចាប់តាំងពីដំណើរការរឿងក្ដីខ្មែរក្រហមដំបូង មកដល់បច្ចុប្បន្ននេះ។ 

 

ទន្ទឹមនឹងនេះ រដ្ឋាភិបាលជប៉ុន សង្ឃឹមថា អ.វ.ត.ក នឹងបន្តកេរដំណែលរបស់ខ្លួន ទៅអ្នកជំនាន់ក្រោយ និងផ្សាព្វផ្សាយពីសារសំខាន់ នៃសមិទ្ធិផលដែលសម្រេចបានពីការកាត់ក្ដីខ្មែរក្រហមដល់សាធារណជនតាមរយៈមុខងារសេសសល់របស់ខ្លួន។ 

 

សូមជម្រាបថា ជប៉ុន និងបារាំង ជាសហប្រធាននៃក្រុមកិច្ចប្រជុំមិត្តរបស់ អ.វ.ត.ក។ ប្រទេសទាំងពីរ បានតាមដានដំណើរការរបស់តុលាការមួយនេះ យ៉ាងសកម្ម៕