ការសង់ជម្រាលជនពិការនេះ ជាគោលការណ៍មួយរបស់អាជ្ញាធរសង្កាត់ ដើម្បីសម្រួលដល់ការធ្វើដំណើររបស់ប្រជាពលរដ្ឋដែល​មានអ្នកពិការភាពជាពិសេស។ ​ ក្រៅពីសង់ជម្រាល មន្ត្រីរដ្ឋបាលសង្កាត់ ក៏យកចិត្តទុកដាក់ខ្លាំង នៅពេលដែលពលរដ្ឋដែលមានពិការភាពមកទទួលសេវានៅសង្កាត់ដែរ ដោយការរៀបចំឱ្យពួកគាត់ទទួលបានសេវាមុនគេ និងមិនមានការរើសអើង​នោះទេ។ ជនមានពិការភាពដែលមានស្ថានភាពក្រីក្រ អាជ្ញាធរសង្កាត់ ក៏ផ្តល់​បណ្ណសមធម៌ជូនផងដែរ។

 

នេះបើតាមលោកចៅសង្កាត់ ចៀប តុប ដោយលោកបានបញ្ជាក់បន្ថែមថា៖ «ពីដើមមកអត់មានជម្រាល តែខ្ញុំខំប្រឹងរកជំនួយ ដើម្បីធ្វើវាទុកឱ្យអ្នកជំនាន់ក្រោយទៀតបានប្រើប្រាស់ទៅថ្ងៃអនាគត មិនមែនមានប្រយោជន៍តែខ្លួនឯងទេ។ អ្នក(មាន)ពិការ(ភាព) ក្នុងសង្កាត់ខ្ញុំ ក្ដោបទិន្នន័យអត់បានអស់។ អ៊ឹចឹងពិបាកប្រាប់ ព្រោះខាងប៉ុស្ដិ៍គេអ្នករៀបចំ»។

លោក ខៀវ ភក្រ័ ជាពលរដ្ឋដែលមានពិការភាពម្នាក់រស់នៅភូមិកណ្ដែក សង្កាត់សំរោង ។ បុរសវ័យ​៥៦ឆ្នាំរូបនេះ រៀបរាប់ថា រូបគាត់ពេញចិត្តចំពោះការផ្ដល់សេវារបស់រដ្ឋបាល​សង្កាត់ ព្រោះអាជ្ញាធររួសរាយរាក់ទាក់ មិនរើសអើង និងយកចិត្តទុកដាក់ខ្លាំងនៅពេល​ដែលគាត់ទៅរកសេវានៅសង្កាត់។ លោក ខៀវ ភ័ក្រ បានបញ្ជាក់ថា៖« ការទទួលសេវានៅសង្កាត់សំរោង មិនតម្រូវបង់ថ្លៃនោះទេសម្រាប់អ្នកពិការ តែខ្ញុំឱ្យទឹកតែពួកគាត់តិចតួច បើថាទារពួកគាត់មិនទាមទារអីទេ! ចំពោះខ្ញុំ»។
  

​

អានអត្ថបទពាក់ព័ន្ធផ្សេងទៀត៖ យុវជនសកម្ម សេវាល្អ