​

លោក សុខ រចនា មេប៉ុស្តិ៍ស្ដីទីនៃប៉ុស្តិ៍នគរបាលឃុំកណ្តោល បានបញ្ជាក់ថា បញ្ហាគ្រឿងញៀន នៅតែជាកង្វល់របស់អាជ្ញាធរនៅក្នុងការតាមដាន និងទប់ស្កាត់ ហើយក៏ជាបញ្ហាដែលអាជ្ញាធរពិបាកក្នុងការគ្រប់គ្រងផងដែរ។ លោក សុខ រចនា បន្ថែមថា បញ្ហាគ្រឿងញៀន គឺជារឿងដែលមានស្ថានភាពស្មុគស្មាញ និងទាមទារភាពច្បាស់លាស់លើការកំណត់មុខសញ្ញា  ហើយនេះកត្តាដែល​ធ្វើឱ្យការលុបបំបាត់បទល្មើសគ្រឿងមានការលំបាក សម្រាប់អាជ្ញាធរ។ 

 

«ខ្ញុំគិតទៅបញ្ហាដែលយើងពិបាកគ្រប់គ្រង គឺបទល្មើសគ្រឿងញៀន ដោយសារគឺយើងត្រូវការតាមដានមុខសញ្ញាច្បាស់លាស់ ឬរៀបចំជាបណ្តាញ នោះទើបយើងអាចឈានដល់ការបង្ក្រាបបាន។ អ៊ីចឹងបទល្មើសគ្រឿងញៀនគឺពិបាកក្នុងការបង្ក្រាប។ សម្រាប់ការបង្ក្រាបគឺទាមទារឱ្យច្បាស់លាស់ បើសិនជាយើងបង្ក្រាបទៅ យើងគ្រាន់តែសង្ស័យ យើងបង្ក្រាបទៅ ស្រាប់តែវាមិនមែនជាបទល្មើសគ្រឿងញៀន ឬក៏គាត់មិនបានជួញដូរ ឬក៏ប្រើប្រាស់ ហ្នឹងជាបញ្ហាដល់យើងវិញ»។  នេះជាការពន្យល់បន្ថែមរបស់ លោក សុខ រចនា ។

 

ទោះយ៉ាងនេះក្តី មេប៉ុស្តិ៍ស្ដីទីនៃប៉ុស្តិ៍នគរបាលឃុំកណ្តោល នៅតែខិតខំតាមដានបញ្ហានេះដោយយកចិត្តទុកដាក់ ព្រមទាំងរៀបចំនូវកម្លាំងក្នុងការយាមល្បាត នៅក្នុងភូមិសាស្ត្រឃុំ ទាំងយប់ទាំងថ្ងៃ ដោយសហការជាមួយកម្លាំងប្រជាការពារភូមិ។ គោលបំណងនៃការល្បាតនេះ គឺដើម្បីសង្កេតពីស្ថានភាពទូទៅនៅក្នុងឃុំ ជាពិសេសតាមដានសកម្មភាពនៃការលួចលាក់លេងល្បែងស៊ីសង បញ្ហាក្មេងទំនើង និងបញ្ហាគ្រឿងញៀន ដើម្បីការពារសុវត្ថិភាពជូនពលរដ្ឋ និងក្នុងគោលបំណងទប់ស្កាត់បទល្មើសនានាផង។  នេះបើតាមលោក សុខ រចនា ដោយលោកបាន ឱ្យដឹងថា នៅក្នុងឆ្នាំ២០២២កន្លងទៅ អាជ្ញាធរឃុំកណ្តោលបានបង្ក្រាបបទល្មើលគ្រឿងញៀន តែ១ករណីប៉ុណ្ណោះកាលពីឆ្នាំ២០២២ ដែលចំនួននេះ ថយចុះជាងឆ្នាំ២០២១ដែលមានបទល្មើសគ្រឿងញៀន ៣ករណី ត្រូវបានបង្ក្រាប​។  

 

លោក សុខ រចនា មេប៉ុស្តិ៍នគរបាលឃុំកណ្ដោល ពន្យល់ថាមូលហេតុនៃការថយចុះនៃបទល្មើសគ្រឿងញៀននេះ គឺមកពីអាជ្ញាធរបានបង្រ្កាប​ជាបន្តបន្ទាប់ ស្របពេលដែលប្រជាពលរដ្ឋមានការយល់ដឹង ពីបញ្ហាប្រឈមដែលបង្កដោយគ្រឿងញៀន។ ជាមួយគ្នានេះ អាជ្ញាធរឃុំ ក៏នៅតែបន្ត​ចុះផ្សព្វផ្សាយពីបញ្ហាគ្រឿងញៀន និងក្មេងទំនើង ដល់ប្រជាពលរដ្ឋ ដើម្បីឱ្យពួកគេបានយល់ដឹង​និងជួយណែនាំកូនៗ កុំឱ្យពួកគេលង់ខ្លួនតាមការអូសទាញ របស់ជនល្មើសផងដែរ៕

​

​

​អានអត្ថបទពាក់ព័ន្ធផ្សេងទៀត៖ យុវជនសកម្ម សេវាល្អ