ក្នុងកិច្ចសម្ភាសជាមួយសារព័ត៌មានថ្មីៗ នៅថ្ងៃទី៣១ ខែមករា ឆ្នាំ២០២៣ លោក គីមសួរ ភីរិទ្ធ លើកឡើងថា សមាជ គឺជាអង្គការកំពូលរបស់គណបក្សភ្លើងទៀន ដែលអាចធ្វើសេចក្តីសម្រេចសំខាន់ៗ រួមមាន គោលនយោបាយ និងយុទ្ធសាស្រ្ត ជាដើម។ លោក បន្តថា សមាជខាងមុខនេះ ក៏នឹងពង្រីកកម្លាំងបន្ថែមក្នុងជួរថ្នាក់ដឹកនាំគណបក្សភ្លើងទៀនផងដែរ ដើម្បីជំរុញការងារគណបក្សឲ្យកាន់តែមានប្រសិទ្ធភាព។    
 

អ្នកនាំពាក្យគណបក្សភ្លើងទៀន បញ្ជាក់ដូច្នេះថា៖«គោលបំណង គឺបុណ្ណឹង។ ការបោះឆ្នោត នឹងប្រពឹត្តទៅនៅខែ៧ អ៊ីចឹងយើង ត្រូវមានការត្រៀមខ្លួនឲ្យរួចរាល់ មានការសម្រេចចិត្ត មានគោលនយោបាយ និងយុទ្ធសាស្រ្តច្បាស់លាស់»។ 
 

គណបក្សប្រជាជនកម្ពុជា ដែលជាគណបក្សកាន់អំណាច ទើបនឹងធ្វើមហាសន្និបាតរួច កាលពីថ្ងៃទី២៨ និងថ្ងៃទី២៩ ខែមករា។ កម្មវិធីនយោបាយរបស់គណបក្សប្រជាជនកម្ពុជា សម្រាប់កសាងប្រទេសរយៈពេល៥ឆ្នាំទៅមុខទៀត (២០២៣-២០២៨) ត្រូវបានអនុម័តក្នុងមហាសន្និបាតនេះ។ 

 

លោក សុខ ឥសាន អ្នកនាំពាក្យគណបក្សប្រជាជនកម្ពុជា ថ្លែងក្នុងសន្និសីទកាសែតស្តីពីលទ្ធផលនៃមហាសន្និបាត យ៉ាងដូច្នេះថា៖«យើង មានសុទិដ្ឋិនិយមយ៉ាងឧដុង្គឧត្តមថា  ឆន្ទៈប្រជាពលរដ្ឋ នឹងប្រគល់ឲ្យគណបក្សប្រជាជន បន្តបេសកកម្ម និងការដឹកនាំប្រទេសកាន់តែមានការរីកចម្រើនទៅមុខទៀត»។ 
 

ការបោះឆ្នោតជាតិនីតិកាលទី៧ នឹងប្រព្រឹត្តទៅនៅថ្ងៃទី២៣ ខែកក្កដា ឆ្នាំ២០២៣៕