ប្រធានគណៈកម្មាធិការរៀបចំការប្រកួតអូឡាំពិកប៉ារីសលោក Tony Estanguet បាននិយាយថា ការចេញផ្សាយនៃការរចនានិមិត្តសញ្ញាប្រភេទកីឡា គឺជាសញ្ញាសម្គាល់នៃការរាប់ថយក្រោយនៃព្រឹត្តិការណ៍ដែលនឹងបើកប្រកួតនៅថ្ងៃទី២៦ ខែកក្កដា ឆ្នាំ ២០២៤។ 
  

រូបតំណាងប្រភេទកីឡាទាំងអស់នោះភាគច្រើនមានផ្ទៃពណ៌ ផ្កាឈូក ខៀវ និងស្វាយ ដែលស្ទើខុសប្លែកពីការប្រកួតលើកមុនៗទាំងស្រុង។
 

«វាជារូបរាងថ្មីសម្រាប់ការប្រកួត ជាការប្រមូលផ្តុំគ្នានៃពណ៌ ដោយភាគច្រើនជាពណ៌ផ្កាឈូក ខៀវ និងពណ៌ស្វាយ ដើម្បីរៀបចំតុបតែងអាគារអូឡាំពិក។ គ្រប់ទីកន្លែងនានានឹងស្ថិតក្រោមរូបភាពដ៏គួរឱ្យរីករាយ ព្រោះថានេះគឺមិនដូចការប្រកួតពីមុនៗនោះទេ។»។ លោក Estanguet បាននិយាយបែបនេះក្នុងសេចក្តីថ្លែងការណ៍។
 

លោក ​Estanguet ក៏បានបង្ហាញអំពីរូបភាពតំណាងប្រភេទវិញ្ញាសារកីឡាទាំងអស់ផ្សេងៗទៀត ក្នុងចំនួនសរុប ៦២ប្រភេទផងដែរក្នុងពេលធ្វើសេចក្តីថ្លែងការណ៍នោះ។ 
 

រូបតំណាងប្រភេទកីឡា ឬ(Pictograms) និងនិមិត្តសញ្ញា ត្រូវបានប្រើប្រាស់ដំបូងគេបង្អស់នៅក្នុងការប្រកួតអូឡាំពិកទីក្រុងតូក្យូឆ្នាំ ១៩៦៤ ដើម្បីជាផ្លូវក្នុងការបង្ហាញនិងកំណត់អត្តសញ្ញាណនៃប្រភេទកីឡាអូឡាំពិកផ្សេងៗ។
 

ចំពោះស្លាកសញ្ញាថ្មីទាំងនេះ មគ្គុទ្ទេសក៍ស្លាកសញ្ញាអូឡាំពិក នឹងផលិតហើយចែកចាយទៅដល់ក្រុមអ្នកផ្សព្វផ្សាយដើម្បីជួយឱ្យពួកគេកំណត់បានយ៉ាងងាយស្រួលនូវអត្តសញ្ញាណរូបតំណាងប្រភេទកីឡាបែបថ្មីទាំងនេះ៕