«សម្រាប់អ្នកដែលបានព្យាយាមបង្កើតបញ្ហាជាមួយរុស្ស៊ី ពួកគេនឹងភ្ញាក់ផ្អើលនៅពេលបានឃើញ ថាតើយើងបានឆ្លើយតបយ៉ាងមានប្រសិទ្ធភាពយ៉ាងណា ចំពោះការគំរាមកំហែងផ្នែកសេដ្ឋកិច្ច និងផលិតកម្មមកលើរុស្ស៊ី។ ហើយប្រទេសនេះបានទប់ទល់នឹងការគំរាមកំហែងដល់សេដ្ឋកិច្ចរុស្ស៊ីប្រកបដោយប្រសិទ្ធភាព ហើយសេដ្ឋកិច្ចរុស្ស៊ីនឹងកើនឡើងបន្តិចនៅឆ្នាំ ២០២៣។» នេះជាការលើកឡើងរបស់ប្រធានាធិបតីរុស្ស៊ីនៅថ្ងៃទី៩ ខែកុម្ភៈ។

 

សេដ្ឋកិច្ចរុស្ស៊ីបានផ្លាស់ប្តូរយ៉ាងខ្លាំងបន្ទាប់ពីមានជម្លោះរុស្ស៊ី-អ៊ុយក្រែនបានផ្ទុះឡើងកាលពីចុងខែកុម្ភៈឆ្នាំមុន។ ធនាគារធំៗនៅក្នុងប្រទេសនេះត្រូវបានដកចេញពីប្រព័ន្ធហិរញ្ញវត្ថុសកល SWIFT។ ពួកគេ​ក៏​ត្រូវ​បាន​រារាំង​មិន​ឱ្យ​ចូល​ប្រើប្រាស់​បច្ចេកវិជ្ជា​បស្ចិម​ប្រទេស ព្រមទាំងដាក់​កម្រិត​មិន​ឱ្យ​នាំ​ចេញ​ប្រេង និង​ឧស្ម័ន។

 

ជារួមទាំងរដ្ឋាភិបាល និងធនាគារកណ្តាលនៃប្រទេសរុស្ស៊ីទទួលស្គាល់ថាមានពិតជាមានការលំបាក។ ប៉ុន្តែទីក្រុងម៉ូស្គូនៅតែចចេសថា សេដ្ឋកិច្ចរបស់ខ្លួននៅតែរឹងមាំ ហើយការដាក់ទណ្ឌកម្មបានជះឥទ្ធិពលត្រលប់ទៅវិញដល់ប្រទេសលោកខាងលិច ដែលជំរុញឱ្យមានអតិផរណា និងតម្លៃប្រេងឥន្ធនៈកើនឡើង។

 

កាលពីឆ្នាំ ២០២២ សេដ្ឋកិច្ចរុស្ស៊ីហាក់មានសុទិដ្ឋិនិយមយ៉ាងខ្លាំង នៅពេលដែលផលិតផលក្នុងស្រុកសរុបក្នុងត្រីមាសទី១ បានកើនឡើង ៣,៥ភាគរយ។ ទោះជាយ៉ាងណាក៏ដោយ GDP បានបន្តធ្លាក់ចុះជាប់ៗគ្នានៅក្នុងត្រីមាសទីពីរ និងទីបី ដោយសារតែឥទ្ធិពលនៃទណ្ឌកម្មរបស់លោកខាងលិច។ នៅក្នុងឆ្នាំនេះ អ្នកវិភាគបានព្យាករសេដ្ឋកិច្ចរុស្ស៊ីនៅតែអាចបន្តធ្លាក់ចុះ ២ភាគរយទៀត។  

 

រុស្ស៊ី​គឺប្រទេសដែលពឹង​ផ្អែក​ច្រើន​លើ​ការ​នាំ​ចេញ​ថាមពល​ដែល​មាន​ចំនួន ៤០ភាគរយនៃ​ចំណូល​សហព័ន្ធ។ កាលពីថ្ងៃទី ១០ ខែមករា រុស្ស៊ីបានកត់ត្រាឱនភាពថវិកាដែលស្មើនឹង ២,៣ភាគរយនៃផលិតផលក្នុងស្រុកសរុបក្នុងឆ្នាំ ២០២២ ច្រើនជាងពីរដងនៃគោលដៅដែលបានកំណត់៕